ليه الجنس مش بيخلى الولد يحب البنت

Date posted: September 26, 2010


مساء الخير يا مروه 🙂
انا شفت السايت بتاعك صدفه امبارح وبصراحه منمتش الا لما قرأته كله
بصي
انا عندي عقد وكلاكيع وبلاوي كتير قوي فحياتي رغم اني يادوب تميت ال 21 سنه
طبعا دي عايزه صفحات كتير

بس اولا انا لفت نظري فى رد ليكي علي مشكله انه (الجنس مش بيخلي الولد يحب البنت) انا عايزه اعرف ليه
ليه لما بنت بتنام مع ولد بتحبه
والعكس لا..؟؟

ده طبعا اول سؤال..و فى سؤال تانىخلاني اقوم من النوم جري عشان اكتبه لكي


انا بيني وبين شخص علاقه بدأت بجنس وبس
وبعدين بقي فيها بعض الصداقه والجانب الانساني بدل الجنس البحت
وهو دايما بيقول علي انسانه كويسه وطيبه قوي فنظره
وهو فري جدا كمان كل اصحابه ومجتمعه ووسطه فري جدا
——–
الموضوع بقي
انا بدأت اتعلق بيه
كل شويه بتعلق زياده
وعايزه اعرف
هل ممكن يتعلق بي او يحبني؟؟
مش بتكلم عن جواز__بس عن حاجه اكبرواشمل من الجنس والتهريج بس
—-
انا كتير بقرأ حتي فمواقع اجنبيه
ان الجنس مع راجل
بيخليكي تفقديه ويخليه مش شايف فيكي اي حاجه(لا ذكاء ولا تعليم ولا طيبه ولا صدق…) مش بيشوفك الا اداه للجنس بس
هل ده صح؟
ياريت ارجوكي تكلمينا عن الموضوع ده شويه
وبجد اسفه عالاطاله

هنتظر ردك

_________________________

بصى يا مشمشة
 
انا باتهاجم كتير علشان رأيى فى موضوع الجنس و العلاقات الجنسية قبل الزواج
 
انا مش ضدها
انا كمان شايفة انها حاجة طبيعية فى مراحل التعارف
زى ما الناس بتتعرف عاطفيا و عقليا و بيتكلموا فى مبادئهم و افكارهم و معتقادتهم
 
لازم كمان جسديا يتقاربوا
 
فى جوازات كتير بتبوظ بسبب النفور و عدم التوافق الجنسى … فى احصائية بتقول ان لو العلاقة الجنسية مش ناجحة بتمثل 85% من فشل الجواز و ان العلاقة الجنسية لو ناجحة بتمثل 15% من نجاح الجواز
 
معادلة صعبة جدا
 
لكن
 
و ركزى بقى فى لكن دى
 
احنا الناس عندنا رقصوا على السلم و اتكعوروا وقعوا على وشهم يعنى لا الولاد و البنات احتفظوا بعذريتهم و نقائهم بجد لحد الجواز و لا اقاموا علاقات مبنية على الصراحة و النضج
 
الولاد كدابين و بيغنوا على البنات .. اسطوانات الحب و الغرام و الهيام و انتى بتاعتى و انتى مراتى و انا بحبك و ما اقدرش اعيش من غيرك و انا باحترم المرأة المتفتحة و العذرية دى جهل و تخلف الخ الخ
و هو كل اللى عايزه يقضى شوية وقت لطيف و خلاص
 
لا عايز يتجوز و لا يستقر و لا يرتبط بجد
هو بيطرى على نفسه العيشة و خلاص
 
البنات بقى مش عايزين يتحملوا نتيجة اختياراتهم
 
تنام معاه و تنهار لما يسيبها
تنام معاه و يركبها عفريت عدم الأمان و تبقى حاسة انها عملت عملة و انه هيسبها اكيد
تنام معاه علشان تخليه يحبها .. مش علشان هو فعلا بيحبها و هى بتحبه
 
بتعتبر الجنس تضحية
 
و دا غباء
علشان كدة فى ردودى بقول ان الجنس مش بيخلى الولد يحب البنت و يقدرها .. لانه من الاول بيتسلى
 
و بقول للبنات يتحملوا مسئولية و نتائج اختياراتهم .. السبب الوحيد اللى يخليكى تنامى مع واحد هو انك عايزة تنامى معاه … سابك بقى .. المجتمع رفضك .. حياتك اتنيلت .. دى مسئوليتك الشخصية
 
لكن للاسف لا البنات واضحة مع نفسها و لا الولاد واضحين مع البنات اللى بيعرفوهم .. كله غرقان فى الكدب و التمثيل
 
سؤالك التانى
 
هو يعرف عنك ايه غير جسمك علشان يحبه؟
 
دا سؤال بجد مش مقصود منه الهجوم خالص

Bookmark and Share