الحنين و الذكريات و الفراغ العاطفى

Date posted: October 8, 2010


هاى يا مروه ازيك ؟؟ انا كنت بعتلك من حوالى سنه كده رسالتين و انتى حطتي واحده منها عالسايت هنا بعنوان "انا خليت نفسي من المسئولية" و التانيه كنت بحكيلك على اللى حصل بعد كده و انتى قولتيلى انى الحق نفسي و اسيبه

و كان الملخص بتاعهم ان انا وواحد كنا بنحب بعض و اتخطبنا و بسبب بخله معايا و انه مكنش بيسال عليا وانه كان مانعنى من شغل و كورسات و تغيير اللبس و مشاكل كتير انا وضحتهالك فى الرسالة اللى فاتت ياعنى, احنا فعلا سبنا بعض و بقالنا اكتر من سنة دلوقتى ,

انا فى السنة دى الحمد لله اشتغلت فى مكانين وشغلت نفسي اوى بين كورسات و شغل و تدريب فى شغل و بدات اتاقلم عالحياه و كان بيجيلى لحظات كتير اوى احس انى الحمدلله انى سبته و ساعات اتخيل انى باتجوز واحد تانى احسن و الحياه قد ايه هتكون حلوه لو اتجوزت واحد يهتم بيا و يحبنى بجد و ساعات افكر فيه تانى, و فى خلال السنه دى ماحولتش اعرف عنه اى حاجه حتى مابقتش اروح الاماكن اللى روحناها مع بعض و لا اسمع اى اغنيه تفكرنى بيه و اى حد كان بيحاول يكلمنى عليه كنت بخليه يسكت عشان كنت بحاول اخرج نفسي منه على قد ما اقدر

على الرغم من ان اى واحده من العيله بتتخطب او تتجوز ,اسمع من اهلى خصوصا بابا كلام عنه و ان شاء الله ربنا يكرمك و ده و ده و ده , وانا بدايق لما بابا يحس انى مثلا مدايقه ان حد هيتجوز معانى العكس, المهم من كام يوم كده بدات افتكره تانى و كمان زود الموضوع لما بابا فتح الموضوع تانى و قاللى ان حد شافة فى العربيه مع واحده تانية فى وضع مش كويس , هو طبعا قاللى كده عشان المفروض انى افرح انه طلع مش محترم كمان ,

بس انا من ساعتها يا مروه وقبلها بشويه متدايقه و مخنوقه و جه الموضوع ده كمان و زود, بفكر طب هو كان بيخوننى كمان ؟؟ ولا هو لحق يحب واحده تانيه و يعرفها و ياخدها ؟؟ و كان فين التدين اللى كان بيقولهولى ؟؟ ده بيقوللى اننا حرام نخرج !!!و حتى لو ده محصلش هو ياترى فاكرنى و لا لا ؟؟ و قاعده افتكر كل حاجه حلوه يا مروه من ساعه ما شفته لحد اى موقف صغير قد ايه انا كنت ببقى مبسوطه بيه و قد ايه انا عمرى ما شفت السعاده دى , و زاد الموضوع كمان ان جالى عريس و كالعاده محستش باى حاجه ناحيته و ده طبعا خلانى اتدايق اكتر , اللى هو انا عمرى ما هحب حد تانى و عمرى ما هلاقى الفرحه دى تانى , و ازاى هسمح لواحد تانى يلمسنى بعده , وازاى هستحمل حد تانى و هقدر اعدى ؟؟ بصي حاسة بحاجات كتييييييييييير اوى و كلها حاجات المفروض ان تكون اخدت وقتها و عدت خلاص , بس انا دلوقتى كانى لسة سايباه امبارح , و كأن السنه دى كلها ماكنتش موجوده , و حتى لما بنام بحلم بيه !! انا مش عارفه اعمل ايه ؟؟ انا شاغله نفسي و بخرج و بشوف اصحابى بس فى كل ده انا بفكر فيه لسه !! ياريت يا مروه تنصحينى

_________________________________

اللى انتى بتمرى بيه دا طبيعى جدا
 
دا اسمه فراغ عاطفى
 
انتى مشتاقة للحب و الارتباط و الاستقرار … و دا حقك طبعا
 
و مافيش حد مناسب ظهر
 
علشان كدة غصب عنك بتلاقيكى بتسترجعى ذكريات علاقة اقرب ما تكون للى انتى بتدورى عليه
 
لحد هنا عادى
 
لكن الغلطة بقى انك تفضلى تحيى فى الذكريات دى لحد ما المشاعر كمان تصحى و ترجع تسيطر عليكى تانى
 
انا عارفة ان كلامى دا خيال علمى بالنسبة لك
 
لكن صدقينى هو دا اللى بيحصل
 
مخنا مخلوق بطريقة غريبة و معقدة
 
و من السهل جدا انه يخدعنا بحاجات مش واقعية
اعتبريها يا ستى نوع من انواع الهلوسة
 
اقنعى نفسك ان اللى انتى حاسة بيه دا نتيجة احتياجك للحب مش لانك فعلا لسة بتحبى الأخ اياه
اقنعى نفسك انه لو كان فيه الخير ما كانش رماه الطير
افتكرى انتى قد ايه ما كنتيش سعيدة معاه و قد ايه ما كانش مناسب و قد ايه عيوبه كانت مضايقاكى
 
و اكتبى … اكتبى ليه سابك و سبتيه و عيوبه و جرحه و تحكمه و سخافته … فكرى نفسك انك تستاهلى احسن من كدة و انك حتى لو رجعتى للولد دا هترجعى للقرف و الاكتئاب تانى.
 
و فى نفس الوقت
حاولى تفتحى الباب شوية علشان الخير يدخل
Bookmark and Share