fbpx
مونتيسوري مصر- تقدمها مروة رخا

و رمى عليها اليمين و سابها مصدومة

 

هاي يا مروة ازيك

انا بحبك جدا وبحب اسمع حلقاتك

بصي انا مشكلتي .. انا مخطوبة لواحد قبل ما اتخطبلة كان في شوية تحديات علشان نتخطب يعني اهلة ماكانوش موافقين علي وفي الفترة دي كنت حاسة ان هو دة الشخص اللي انا بحبة جدا وقعدنا 6 شهور وكنت متعلقة بية جدا وبحبة ولكن بعد ما اتخطبنا وزالت التحديات حسيت ان حبي لية خلص ومابقتش بحبة وبالصدفة النهاردة سمعت الحلقة بتاعتك اللي كانت في دريم عن التحدي وان الطبيعة البشرية بتحب الشخص اللي يعملها تحدي وتحس انها فازت بية ولكن التحدي دة بالنسبالي زال خالص لانه اتدلق علي جدا بعد الخطوبة وبقي يديني بغباء لدرجة اني بقيت بشتكي من كتر وجودة وعطاءة لي تخيلي ؟يعني ما بقتش قادرة احتمل عطاءة وطيبته

ودلوقت اناعايزة اسيبة بس هو بجد انسان كويس وبيحبني وبيقدملي كتير بس انا مش قادرة احس بية خالص مع ان قبل الخطوبة كنت منجذبالة جداااا وبحبه ولكن كل دة راح بعد الخطوبة

المشكلة التانية اني كنت مخطوبة لواحد قبلة ودة كان فعلا بقي مغلبني وعاملي طول الوقت تحدي وهو كان مقطع السمكة وديلها زي ما بيقولوا وكنت سعيدة جدا معاه بس هو سابني لاني تقريبا انا اللي كنت بالنسبالة مملة لاني كنت متاحة بالنسبالة طول الوقت فتقريبا حصلة نفس اللي حصلي حاليا مع خطيبي الحالي ودلوقت ابتديت افكر فية تاني واتمني ارجعله لاني حسيت اني ما حبتش حد غيره ويمكن دة يكون بسبب انه ممنوع وانه فضل طول الوقت عاملي تحدي  

انا بفكر افك الخطوبة لان مشاعري ناحية خطيبي الحالي فترت بس بقول لنفسي طيب وبعدين يعني ممكن اندم علية لانه بجد انسان كويس وكل الناس اللي حوالي   شايفين كدة وانا كمان شايفة كدة بعقلي لكن مشاعري ناحيتة خلصت وفي نفس الوقت مش حاسة اني فرحانة اني هتجوزة حاسة بالملل وماعنديش قدرة اني اديلة مشاعر او اي حاجة

تنصحيني باية ؟ وازاي الواحد في الحالة دي يعرف الحب الحقيقي اللي ممكن يستمر معاه طول العمر وهل لعبة الحب دي بتفضل( الشد والجذب والتحدي ) فترة معينة وبعدين تنتهي ولا لأ؟

————————————————-

يا مشمشة

 

تخيلى ان فى واحدة تانية معاه فى الشغل بتحوم حواليه و انه ممكن يضيع منك … يمكن وقتها تقدريه
 
فى كتاب اسمه السابعة و النصف مساء و هو مجموعة من القصص لحوالى 7 كتاب
 
فى قصة من القصص شبه حكايتك و حكاية بنات كتير
 
الملخص
ان البطلة متجوزة واحد … و من اول القصة خالص و هى قرفانة منه … قرفانة تكلمه و قرفانة تسمعه .. شكله و هو نايم بيقرفها … شكله و هو بياكل بيقرفها … شكله و هو قاعد بيقرا الجرنان بيقرفها … كلام الحب بتاعه بيقرفها … مش طايقاه .. و رافضة تخلف منه
 
حياة باردة فاترة مقرفة
 
طول القصة انتى سامعة من طرف واحد
 
اللى هو البطلة
 
و عايشة معها القرف بتاعها و الزهق بتاعها
 
و فى الاخر قررت انها تطلب منه الطلاق لانها قرفت منه و من عيشتها
 
روحت البيت و قالت له احنا محتاجين نتكلم
 
و هو قال لها انهم فعلا محتاجين يتكلموا و طلب انه يبتدى
 
و هى وافقت
 
قام قالها انه قرف منها و من برودها و من عدم اهتمامها بيه و من عدم تقديرها لوجوده و من لوية بوزها و من شرودها الدائم
قال لها انه حاول يرضيها بكل الطرق بس فى ستات مش عايزة اللى يحبها و يرضيها و عايزة اللى يبهدلها و يهينها
قال لها انه غلط غلطة واحدة فى حقها
انه اتجوز عليها
و ان مراته دلوقتى حامل و انه عايز يكون جنب طفله اللى جاى مع الست اللى بتحبه فعلا
 
و رمى عليها اليمين و سابها مصدومة
 
(أنا قريت القصة دى من زمان فممكن يعنى تلاقى شوية تحابيش من عندى – لكن المهم ان المعنى وصل)
 
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”