fbpx
مونتيسوري مصر- تقدمها مروة رخا

ملاهى المجلس الأعلى للقوات المسلحة #Jan25 #SCAF

 

 

أنا ساكتة بقالى كتير أوى!

قلت بقى أركز فى الحمل و الولادة بلا ثورة بلا جيش بلا شرطة بلا مبارك بلا شعب بلا بتاع!

و كل شوية أحمد على عيد (واحد صاحبى يمكن تعرفه أو ماتعرفهوش) يبعت يسألنى فين تعليقى على اللى بيحصل … و كل مرة مش برد عليه.

يكلمنى فى التليفون أعمل عبيطة!

يبعتلى رسايل أعمل مش واخدة بالى … و فى الأخر قررت أتخلص من توقعاته العالية لمقالى المنتظر و أكتب له كلمتين له و للزمن!

شوف يا أحمد

أنا حاسة ان احنا فى الملاهى و ان موضوع الثورة دا كله عامل زى مغامرة فى الأدغال اللى جوا الملاهى و تحت اشراف صاحب المراجيح و من تصميم متخصص الترفيه و المغامرات! 

أيوة!

ما هو انت لما تروح الملاهى و تركب عربية تلف بيك فى متاهات و مغارات و تسمع من حواليك صوت زئير الأسد و حفيف الأفعى يبقى انت كدة فى الأدغال و من وقت للتانى يطلع لك قرد من اليمين و بغبغان من الشمال علشان جو الأدغال يتسبك صح! لكن مهما طالت الجولة فى الأخر هتنزل من العربية و تخرج برة المغارة و هتلاقى الدنيا زى ما سيبتها بالظبط!

تركب مرجيحة من اللى بيطلعوا فى العالى و يلفوا فى الهوا و ينزلوا بسرعة … الأدرينالين يضرب فى نافوخك و تصرخ من الخوف و النشوة و الإثارة و سرعة الأحداث و بعدين تنزل على الأرض معدتك مقلوبة و إيدك متلجة و قلبك هيقف من كتر الدق و الضخ! و انت فوق عايز تنزل و تهتف بسقوط اللى صمم المرجيحة اللعينة و أول لما تنزل تبقى عايز تطلع تانى فوق علشان حياتك يبقى لها معنى … و صاحب المرجيحة يقطعلك تذكرة ورا تذكرة و انت تفضل تتمرجح لحد ما فلوسك تخلص أو الملاهى تشطب!

و بتاع النشان لا محصل مولد شعبى و لا ملاهى افرنجى … لازق كام صورة لكام حرامى على الحيط و بيسلمك البندقية علشان تفش  غلك … فى الأخر انت فلوسك هتخلص على الخرطوش و أصحاب الصور لا اتصابوا و لا اتقتلوا و لا اتحاسبوا و لا اتحاكموا! مبروك عليك الدبدوب!

و فى بيت المرايات هتدخل و تشوف نفسك أسد … هتشوف نفسك مارد عملاق … هتحس بالزهو و الأمل و القوة … صاحب الملاهى عايز يقفل … هتخرج من بيت المرايات و ترجع لنفسك و لحجمك و لعيشتك.

حقك تختار مغامرة .. هتلعب لعبة الثورة و الانقلاب و تطهير البلاد … هتقتل و تتقتل … هتتظاهر و تهتف و تكر و تفر … هيطلع عليك العسكر و البلطجية … مش هتعرف دا من دا و هتضرب و تنضرب … و بعدين وقتك هينتهى و اللعبة هتخلص … بيتك بيتك … اسمع كلام صاحب المراجيح!

و انت مروح صاحب الملاهى هيسلم عليك و يتمنى انك تكون قضيت يوم سعيد مثير حافل و هيديلك كارت خصم 10% على الزيارة الجاية و يوعدك بزيارة مجانية لو جبت خمسة من اصحابك … صاحب الملاهى عايزها مليونية سلمية اسلامية مدنية سلفية صوفية مهلبية علشان نلهى الأغلبية فى الملاهى المحلية!

 

 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”