مروة رخا لمجلة احنا – الموضة السنة دى محزق

Date posted: April 18, 2012


 

الموضة السنة دى محزق

أم آدم (مروة رخا سابقا)

الواحد كدة بيبقى قاعد لا بيه و لا عليه  تقوم تهب رياح الحنين للزمن الجميل و حاجة تجيب حاجة و تلاقينى بكتب مقال زى دا!

إيييه دنيا!

فين أيام الزمن الجميل لما كانت الموضة فى برامج التليفزيون علاقات عاطفية؟ كان الواحد مش ملاحق على الشغل! من قناة لقناة و من برنامج لبرنامج  و الأشية كانت معدن! إشى مشاكل قراء و إشى  مداخلات مستمعات و مستمعين و إشى تصوير خارجى مع "عامة الشعب" قدام المول الكبير إياه  و حوارات و لقاءات و حكايات و رويات و حكم و مواعظ و خبرات حياتية ياما!

فين لما كانت الموضة تنمية بشرية و برمجة عصبية و قانون الجذب و العلاج بالطاقة؟ و لا أيام موضة الأبراج و التوافق حسب برجك و برج الحبيب؟ مواضيع متنوعة مبهرة! فين لما كانت الموضة فنانين و فضايح و نميمة؟ فين زمان لما برامج التوك شوز بتاعة الصبح و الضهر و بليل و أخر الليل كانت بتعج و بتشغى بضيوف يتكلموا فى الحب و الصداقة و الأخوة و شوية سياسة متدارية على شوية دين من تحت لتحت؟ فين النقاشات العميقة و المناظرات الجدلية العظيمة عن الفيسبوك و تأثيره على نسيج المجتمع المصرى؟ و لا الأفلام الوثائقية عن تأثير نموذج الحبيب التركى مهند على العلاقات الأسرية و الحياة العاطفية لكل شاب و فتاة مصرية؟

فين الأيام الجميلة لما كان المدون من دول "يسفخ" الرئيس قبل ما يبقى سابق كل تدوينة و التانية و لا حد يرد عليه؟ فين أيام مكالمات التهديد و الوعيد لما كانت بتيجى من "unknown number"؟ فين قعدة البورصة و الجريون و التكعيبة و استوريل؟ فين أيام تويتر الهادى الجميل و الفيسبوك اللى كله خناقات شخصية و خلافات أسرية؟ أيام الهيافة المبهجة! كانت أيام مسلية كلها مرح! يناكفوا النشطاء و النشطاء يناكفوهم و كل كام شهر يضربولهم واحد و لا اتنين و خلاص!

اتبدلت أحوالنا من حال لحال!

الموضة بقت برامج دينية بترد على المشاكل العاطفية! و الخبراء الاستراتيجيون ملوا البلد و غرقوا القنوات و سيطروا على كل الحوارات! لوك لوك فى كل حاجة! صداع صداع! الموضة فزاعة تخوف الناس و تحسسنا ان نهاية الحضارة وشيكة لا محال! الموضة خناق و زعيق على نعمل إيه فى الفلوس اللى اتسرقت و اتهربت! الموضة نعم و لا! الموضة اخوان و برلمان! الموضة سياسة! الموضة نخبة! الموضة مصطلحات! الموضة قانون! الموضة عسكر و حرامية و قضاة و متهمين! الموضة أحزاب و انتخابات و مرشحين!

سوسن و سعاد فى نفس واحد: "الموضة السنة دى محزق"

ضحك و كركعة رقيعة … و عمت الفرحة أرجاء المكان!

Bookmark and Share

Facebook comments: