#MontessoriEgypt البداية #مونتيسوري_مصر

Date posted: March 11, 2013


MamaBaby

البدايات بالنسبة لي دايما أصعب من النهايات … بداية مقال … بداية علاقة … بداية مجال عمل … البدايات صعبة … دايما محتاجة دفعة قدرية علشان ابتدي أي حاجة! يعني أنا لو اتسبت في حالي كدة مش هعمل أي حاجة و هكون راضية و مبسوطة!

بدايتي مع المونتيسوري كانت سلسلة من الصدف أخدت شكل هرمي لحد لما اتحركت جوايا الرغبة في التدوين من جديد!

الحكاية تبتدي من خامة قماش خيمة كائن المروة رخا! ممكن أسميها قماشة حقوقية أو خيمة انسانية مثلا! أي موقف بواجهه أو أي سؤال باتسأله بلاقي الإجابة في شوية حقوق أنا مؤمنة بيها و مقتنعة أنها حقوق ليا و لغيري. خيمتي واسعة و فضفاضة و قماشتي مظلة لأقليات المجتمع بكل أشكالهم!

الأمومة بتغير … الواحد بقى بيوفر طاقته و بينتقي معاركه و صراعاته. العدسة بتعمل زووم على قضايا مختلفة تماما عن كل اللي شغل بالي قبل كدة. فجأة العلاقات العاطفية و مشاكل المجتمع و أسئلة القراء تضائلت في أهميتها بالمقارنة برحلة الأمومة اليومية.

و أنا حامل وعدت آدم بحاجات كتير؛ وعدته اني هحبه حب مطلق بغض النظر عن مزاياه أو عيوبه. وعدته انه اتولد حر و هيفضل حر يختار مسارات حياته بدون تأثير مني. قررت اني احترمه من و هو نقطة بيضا على شاشة السونار في الأسبوع الخامس من تكوينه. شهور الحمل بالنسبة لي كانت تدريب على التخلي عن أنانيتي و عن كل عزيز و غالي هيقف بيني و بين آدم. 

فطرتي و غريزتي حددت شكل الولادة و ما بعدها من علاقة بيني و بين الانسان الصغير دا لكن كنت حاسة بغربة كعادتي بسبب افكاري و قناعاتي و قراراتي. رجعت تاني مروة المجنونة اللاسعة في عينين ناس كتير. لجأت للنت و للكتب لحد لما لقيت فصيلتي من البشر.

في التدوينات دي هوثق فلسفة ماريا مونتيسوري و د. سيرز و د. سارة باكلي استشهادا بكتبهم و مقالاتهم و رحلتي مع آدم. و هشير لمجموعة من الأمهات المدونات الرائعات حول العالم اللي استفدت منهم و لسة لحد النهاردة باتعلم منهم ازاي أتحرر من الصورة التقليدية الكئيبة للخلفة و اللي بيخلفوا! 

الكتب:

Gentle Birth, Gentle Mothering: A Doctor's Guide to Natural Childbirth and Gentle Early Parenting Choices By Sarah Buckly

  The Attachment Parenting Book : A Commonsense Guide to Understanding and Nurturing Your Baby By William Sears

The Baby Book, Revised Edition: Everything You Need to Know About Your Baby from Birth to Age Two By William Sears

Secret of Childhood By Maria Montessori

The Discovery of the Child By Maria Montessori

The Absorbent Mind by Maria Montessori

Teach Me to Do It Myself: Montessori Activities for You and Your Child 

 

 

Bookmark and Share