انا مخنوقه يامروه ومش عارفه ازاي ده حصل
بأختصار اناكنت بحب حد مهم اوي وله مركز مرموق بس كان مجوز وعند اولاد وبعدين كان
بيعملني الاول كويس بس عشان فرق السن 35 سنه انا عندي 20 وهو 53 سنه عشان كده بدأ يغير عليا جدا ويقولي البسي ومش تلبسي وكان محرمني اقف مع زمايلي
المهم اتعرفت علي شاب محترم اوي لان التاني مكنش كده كان بيحب جسمي وحبي ليه اتضح ده بعد فتره
المهم كلمته وقلتله ان العلاقه بينا ياريت تكون علاقه اب وبنته
قالي اناهعرف السبب ولازم اعرف
مروه انا منكرش اني كنت بحبه اوي بس الشاب اليي اتعرفت عليه من وراه هديه من عند ربنا ليا
وكمان كان قعدني من الشغل لاني كنت بشتغل في الصيف
التاني اكبر مني بسنه بس
ومعايا في الكليه
بجد لما شفته حسيت انو
واحشني جدا
رغم ان اول مره اشوفه وحسيت ان كله نور وصفاء
عملت ايميل تاني وبدات اكلمه
انا دلوقتي خايفه
عليه من التاني
وخايغه علي تعييني في الكليه
وتقديراتي لاني واصل اوي وممكن يأذيني
انا مش عارفه انام وخايفه يكون اعجابي بواحد يخسرني مستقبلي ويخسرني الانسان ده
مع العلم اني والله كويسه بس اعمل ايه في قلبي
دايما بدور علي الحب يمكن لاني مش لاقياه في حته تانيه
البيت يعني
انا دلوقتي عايزه اعرف انا اللي عملته ده صح ولاغلط
وياريت اعرف اكلمك اكتر بس بجد يا مروه انا صح ولا غلط
انا عرفت متاخر انو ده غلط
وانا مكنش ينفع خصوصا انه مش هيجوزني طبعا بسبب انو مجوز وبسبب مركزه الكبير
ومنكرش ان انا كنت بحبه بجنون بس كان معيشني في قفص
ومش عايز غير جسمي وبس
ولما قررت ابعد كل اللي همه انو يعرف السبب
لمجرد انو يزلني مش اكتر
انا الخطوه دي عايزه اعملها من زمان لانو مكتفني ومش عارفه اشوف حالي
عارفه يعني ايه مش بتكلمي حد ولا تعرفي حد
ولا في شغل
ولما لاقيت الانسان الصح خايفه عليع وعليا منه
اعمل ايه؟
—————————————
انا مش من حقى اصدر عليكى احكام و لا احاسبك على نواياكى
بس انا زعلانة عليكى
انتى غلطتى فى حق نفسك
أول غلطة انك ترتبطى بحد ارتباط مصلحة … زى اللى بتصاحب معيد عشان يذاكر لها و اللى بتخرج مع واحد عشان يصرف عليها و اللى بتسلم واحد جسمها عشان تترقى فى الشغل
تانى غلطة انك تدخلى فى علاقة مع حد انتى عارفة انه بيستغلك … هو مش عايز يتجوزك و مش بيحبك و الموضوع كله جنس و بس – حتى لو مش جنس كامل
تالت غلطة انك تقبلى تكونى علاقة سرية .. عشيقة يعنى. انتى عارفة ان انا مش ضد انك تحبى و تتحبى و انك تصاحبى و لا حتى انك تكونى زوجة تانية لكن انا ضد انك تبقى علاقة مشينة فى الخفا
رابع غلطة انك بتسمعى كلام اى حد … ايوة ما هو الراجل دا اى حد … بأى حق يقولك البسى و ما تلبسيش و اشتغلى و ما تشتغليش و كلمى و ما تكلميش؟
دلوقتى انتى قابلتى حد و عجبك
ممكن برده يكون حد غلط .. ساعتها هتعملى إيه؟ هترجعى للراجل الأولانى؟
انا مش عايزاكى تتحولى لنوع البنات اللى بتسيب واحد عشان واحد
تعملى ايه بقى فى الراجل الشايب العايب دا؟
طول ما انتى خايفة هيبتزك بخوفك … يبقى أول حاجة ماتخافيش منه .. لأنك لو بصيتى للموضوع من زاوية تانية دا هو اللى المفروض يخاف منك … انتى ممكن تهدى بيته و سمعته و شغله و مستقبله و تعمليله فضيحة بجلاجل و انتى مسيرك تتخرجى و حكايتك هتتنسى لكن هو هيتجرس و لا حرامى الأوتوبيسات
تانى حاجة لأ يعنى لأ .. ماينفعش تقولى لأ بضعف و لا بتردد … أرفضى العلاقة دى بقوة و بثقة و بحسم و هو هيبعد
فى مثل ذكورى مقرف بيقول ان الست لما تقول لأ بيبقى قصدها تقول أيوة .. عشان كدة لازم تبقى لأ بتاعتك واضحة لا تقبل الشك
تالت حاجة ماتقوليلوش على زميلك لا يأذيه
سبب قطع العلاقة هو: العلاقة غلط و انا مش مرتاحة و لو عايز نكمل تقول لمراتك و تتقدم رسمى
لو قلتى كدة بقلب جامد هيجرى بعيد
و من فضلك
أرجوكى
حبى نفسك شوية و ماتقبليش عليها الإهانة
