مروه انا وحيده جدا جدا الدنيا بلنسبالي فاضيه وقاسيه دي حقيقه مش اكتئاب
بابا اتوفي من سنه ونص ومن سعتها الدنيا ضلمت
ماما متوفيه من وانا ٣ سنين وبابا اتجوز وحده عاديه خلفت اخويه الصغير الي فلجامعه دلوقتي
اتجوزت حد انبهرت بيه وحطيت كل مشاعري نحيتو بس فوجئت بقسوتو فكل المواقف مشكلتي عشان اشرحها عايزه حلقات مسلسل
بس عندي حاجه جميله مقولتلكيش عليها عندي ولد قمر عندو ٥ سنين هو املي حاجه
كمان انا ممتي مكنتش مصريه وبلتالي مليش قرايب من ناحيه ممتي ومليش علاقه بقرايب بابا لاننا كنا عايشين فلخليج ومليش صحبات معدا معارف بسيطه
عندي ٢٨ سنه متجوزه جوزي عندو ٣٩ وكان مقطع السمكه وديلها
انا بصحي من نومى الصبح زي ناس كتير عشان اربي ابني واعمل الحجات الروتينيه
مبشتغلش
انا عارفه اني حيرتك
بس انا سؤالي ازاي اخلي ابني ميحسش بلوحده والحزن والخوف من الزمن الي جوايه؟ انا بحاول احسسه بلامان والسعاده بس هو ورث مني الاحساس القوي وبخاف يحس بلى بحس بيه
مروه انا مش مكتئبه الدنيا بجد بقت وحشه والناس مبقوش طيبين ومعظم الناس بقو نفسيتهم تعبانه وحاقدين علي بعض عايزه اقولك حاجه بس ارجوكي متفتكرنيش مغروره انا حلوه شويه وظروفي الماديه الحمد لله كويسه والناس بتشوف الجانب ده بس وفي ناس بتحسد بس مبيبصوش علي الي جوه الواحد مفيش حد يدي حنان لا صديقه مخلصه ولا اب ولا ام ولا حد وفنفس الوقت لازم ادي حنان لابني واهتمام وسعاده لجوزي وابني والبطاريه فاضيه ملهاش شاحن
—————————————–
أنا أسفة انى اتأخرت فى الرد عليكى
كان عندى شغل كتير
و كمان جوز خالتى مات
انا بقى عايزة أكلمك عن جوز خالتى اللى مات
بناته كانوا منهارين
مراته – اللى هى خالتى – كانت متماسكة نسبيا
بس البنات كانت حالتهم صعبة جدا
و انا حاولت اخفف عنهم
لعبنا لعبة فى العزاء
ان كل واحدة تقول موقف حلو للمرحوم
و فضلنا كدا لحد ما البنات ابتدوا يضحكوا
اكتشفوا انه ساب لهم كم من الذكريات يكفى فوق العمر عمرين
و وعدت نفسى انى يوم لما هخلف
هعمل زى الراجل دا
تخيلى افتكروا الحضن و الابتسامة و مسكة الإيد و الكلمة و عاداته فى البيت و نكته اللى كان بيقولها
الحاجات الصغيرة دى هى اللى بتدوم
انا عارفة انها زاوية مقبضة شويتين
بس فكرى فى الموضوع دا
عايزة ابنك يفتكرك ازاى؟
