انا بعد ماقرأت ليكى مقالات كتير
قررت ابعتلك لانى بستريح لارائك
اتعرفت على واحد عن طريق النت
طيب اوى وحنين اوى … المهم انا اول ماعرفته كان شكله واحد عايز يعلق بنات والسلام
عادى بيقضى وقته وانا كنت كاشفه الموضوع دا
لكن صرحللى انه معجب بيا
وانا ماكنتش معجبه بيه اصلا ولا بحبه بس ممكن اكون اتعودت اتكلم معاه او مشدوده ليه
المهم وافقت على الموضوع بس على امل انى اعرفه كويس ويااحبه يااماحبوش
وطبعا كنا لازم نتقابل عشان ماينفعش نت وبس وفعلا خرجنا مع بعض وكان بعلم ماما لانها صاحبتى اوووووووى وعارفه الموضوع كله مش بعمل حاجه غلط ولا بخبى عنها حاجه
وعجبته طبعا وعجبنى وبدات اتشد ليه اكتر وعشان انا مش للتسليه حبيت اخلى الموضوع رسمى اكتر … خليته جيه فرح اختى واتكلم مع ماما وقالها بمجرد ماامسك شغل لانه لسه متخرج هيتقدمللى وكده وانه بيحبنى فعلا … ومامته كمان كانت عارفه بس مااعرفش بقى كان حاكيلها عنى ومقتنعه بيا انى ابقى زوجه ليه بعد كده ولا كانت معتبراها فتره هتعدى فى حياه ابنها وخلاص ولحد دلوقتى بردو مااعرفش
المهم اننا بما اننا مرتبطين فبيجيللى الجامعه وبنخرج مع بعض هو من بلد تانيه فى مصر بردو بس انا من القاهره
وخلال خروجتنا بقى اتضحللى حاجات كتير عن شخصيته
اولهم بخله … كان ممكن كل خروجه معايا قبلها واحنا بنتكلم يقولى هتعزمينى بهزار
بس مره فعلا عملتها وعزمته وهو استنانى لحد ماجيبت الاوردر وماحاولش يدفع مانا اللى عازماه بقى
مره تانيه جيه يحاسب على حاجه هو طلبها ماكنش معاه فكه فانا اكيد هديله وفعلا اديتله… واما فك جيه يدينى فلوسى طبعا مارضيتش اخدها ومن اول مره وحط الفلوس تانى فى جيبه
مره تالته بهزار طبعا كنا راكبين العربيه وقالى ادفعى بقى وانا عشان اشوف اخره
فعلا طلعت ودفعت وقالى لاء وخلاص انا طلعت
بس فى الاخر خد منى بردو وانا اللى دفعت
فى الفالنتين انا جيبتله هديه وهو ماجابليش قولت يمكن يجيبللى فى عيد ميلادى ولا الهواااااااا ماجابليش
زهقت بقى روحت واجهته بكل حاجه طبعا اتكسف جدااااااا وصراحه من ساعتها ماعملش حاجه من دى تانى هى الفتره اللى اتظبط فيها مش كبيره عشان احكم عليه بس اهو مااعملش
هو لسه مااشتغلش يامروه ودى مشكله بردو احنا بقالنا مع بعض سنه
وصراحه بينفذللى كل اللى اطلبه منه عشان يراضينى يعنى بنات بطلهم خلاص وحتى اللى يعرفهم اتعدل فى كلامه معاهم وموبايله بقى خالى من البنات بجد وكذا مره اختبرته ونجح يعنى اهو بيحبنى
بس المشكله الاولى بخله!!!!!!
والتانيه بقى سلبيته
انا اللى عملته سى فى وقدمتله فى الشركات
واما شركه كلمته باباه قاله استنى اما عمك يجيبلك وكانت خناقه بينى وبينه
طيب مانت مش وراك حاجه روح وجرب المهم راح بس بعد مشكله طبعا… ومااتقبلش بردو… جيبتله تانى ومارضاش يروح
كل دا على اساس ان حد من اصحاب باباه او عمه اللى فى الخارج يجيبوله شغل كويس
مش عارفه انا بحبه وهو بيحبنى بس مش متقبلاه بالعيوب دى
دا غير انه من المنوفيه وشقته هناك يعنى هسيب القاهره وهبقى فى بيت عيله بس شقتى لوحدى
مش عارفه اعمل ايه محتاره عقلى رافض الموضوع وقلبى بيقولى كملى لانه بيحبنى اوى وحنين عليا اوووى وانا كمان بحبه
معلش رغيت كتير بس دا لانى محتاره اوووووى
———————————————-
انتى اكبر من سنك و تفكيرك ناضج و انا سعيدة جدا بعلاقتك بمامتك
أولا موضوع البخل دا موضوع مش لطيف خالص و دا طبع لكن الكلام اللى انتى حكيتيه دا ما اسموش بخل بالمعنى المعروف
دا اسمه جليطة و قلة ذوق
يا هو مستخسر فيكى
يا ابوه كدة و هو كبر متخيل ان دا عادى
ثانيا موضوع السلبية
فى شباب كتير زيه كدة … بدل الحماس و النشاط و البتاع تلاقيهم عواجيز و كسالى
المشكلة هنا مش فى كسله
المشكلة هنا فى الفرق بينك و بينه
يعنى انتى كلها شوية و تتخرجى و تعملى لنفسك سى فى عظيم و تروحى تعملى انترفيوهات هنا و هنا
و هتاخدى كورسات و تطورى نفسك
و تكبرى و تترقى
و هو هيفضل محلك سر
و ساعتها مش هيملا عينيك
و هتحصل مشاكل كتير
و الكارثة بقى لما تشتغلى و تقابلى شباب زى الورد متطلعين كدة و عارفين راسهم من رجليهم
ساعتها هتحسى انك شربتى مقلب
ثالثا موضوع الشقة اللى مش فى القاهرة
دا يتوقف عليكى انتى و هو
يعنى فى بنات ماعندهاش مانع تعيش فى محافظة
و فى ولاد من محافظات بينقلوا القاهرة
يعنى الموضوع دا يتوقف على انتى عايزة ايه و هو عايز ايه و ممكن تتفقوا على ايه
لكن اللى انا حاسة بيه من كلامك انك رجعتى فى كلامك
انك خلال السنة دى كبرتى و هو زى ما هو
و حاسة ان مش هو الشخص المناسب
زى ما تكونى كدة قررتى انك عايزة تنهى الموضوع و مستنيا منى الزقة الأخيرة
