احب اعرض على حضرتك مشكله تواجههنى كشاب فى مقتبل العمر – 26سنه
طبعا حضرتك تعرفى كويس ان دلوقتى الشباب والفتيات بيدوروا لما ييجوا يتجوزوا على الشكل الجميل .
انا شاب ابحث الان عن شابه جميله مثقفه تساعدنى على اعباء الحياه وترتقى بى الى اعلى وتساعدنى على النجاح والتفوق.
وعرفت بنات كتير واتصاحبت عليهم وعادى جدا، ولما جيت اختار اخطب قلت ادور على بنت الناس المحترمه نفس المستوى الاجتماعى وحددت مواصفات معينه عايزها فى البنت اللى حاخطبها.
وكانت تقريبا كل المواصفات موجوده فى بنت الجيران ماعدا الجمال الباهر، فهى ليست جميله جدا .
المشكله فى كشاب ارى البنات فى الشارع وفى التليفزيون اللى اثر علينا كشباب انه عايز واحده تبقى شكلها عامل ازاى
او زى النجمه الفلانيه او شعرها يكون عامل ازاى، المهم انى عايز فعلا وبادور على ده انى الاقى واحده جميله.
فهل كل بنت انثى؟ وهل كل واحده بتبقى جميله؟ وهل الجمال الشكلى ده حالاقيه مثلا بعد الزواج منها ؟
واعمل ايه مع البنت هيه ماتتعيبش دينا واخلاقيا واجتماعيا وثقافيا بس هيه مش جميله الجمال اللى انا عايزه.
هل انا اللى اقدر اخليها جميله بعد الزواج مثلا وتهتم بنفسها ، انا مش عايزها تضيع منى لانها فرصه .
————————–
أحييك على شجاعتك
فى ناس كتير بتفكر زيك لكن لا تملك الجرأة انها تعبر عن اللى جواها بالشكل دا
انا مش هقدر اقول لك اتجوز واحدة و انت حاسس بنفور تجاهها
لكن فى فرق بين النفور و بين التوقعات الغير واقعية
يعنى مثلا
البنات باهرات الجمال اللى انت بتتكلم عليهم دول و نجمات الكليبات
انت تعرف شكلهم بيبقى عامل ازاى من غير الحبشتكانات؟
بيبقوا اقل من العادى .. اقل بكتير
الشعر معمول و الوش مدهون و الحواجب مرسومة و الشفايف متلونة و الاضاءة و اللبس و الاخراج
كل دا بيخليهم ناس تانية خالص
طبعا انا مش هكلمك عن التدخل الجراحى و النفخ و القص و اللزق
و بعدين فى فرق بين الجمال و الأنوثة
الجمال مظهر خارجى .. ودا مع الوقت هتتعود عليه و هيختفى انبهارك بيه
فى مثل بيقول ان وراء كل امرأة جميلة رجل قرف من خلقتها
اما بقى الأنوثة دى لها صلة بال
attitude
و دا كمان هيبان مع الوقت .. لما هى تاخد عليك اكتر
انا مش باقنعك بجارتك لانى مش عايزة اشيل مسئوليتك
انا بس باوضح لك شوية نقط يمكن تساعدك فى اتخاذ قرارك
فى بقى كام نقطة كدة على الهامش زعلونى منك
يعنى ايه صاحبت كتير و لما جيت تختار واحدة تتجوزها اخترت واحدة بنت ناس و محترمة؟ دى اسمها ازدواجية و بنت الناس المحترمة دى من حقها ترتبط بواحد احترم نفسه و صانها هو كمان
و موضوع انك مستخسرها و شايفها فرصة .. انت بتتكلم عنى بنى آدم مش عربية لقطة و لا حتة أرض متصقعة
و فكرة انك تغيرها بعد الجواز دى فكرة مش حلوة .. لانها اول حاجة هتقولها لك .. انت واخدنى كدة! لو فى حاجة مش عاجباك فيها قولها من دلوقتى علشان انتم الاتنين تكونوا على بينة
