سلام عليكم
انا طبعا كنت عديت علي مدونتك علي فترات متباعدة قبل كدة
انما الصراحة دي اول مرة يجي علي دماغي اني اكتبلك عن نفسي
) هو غالبا النوت الي كتبتيه علي الفيسبوك من شوية بتاع مواطن سمج خلاني اروح علي المدونة و اقراه و اقرا مواضيع تانيةعجبني انك فاتحة قلبك لكل الناس يمكن تساعديهم
قلت طيب اجرب ابعتلك ما انا جربت اصدقاء و اطباء نفسيين و منفعوش
عشان كدة قفلت باب المكتب عليا و قلت محدش يدخل و ها انا ذا
انا مهندس بشتغل برة مصر متجوز و عندي طفلين
ليه اتجوزت؟
يمكن عدم نضوج فكري
كنت عايز استقل بحياتي
المهم عمري محسيت اني بحب مراتي
مجاليش الاحساس ده اطلاقا
هي طيبة و بنت ناس و بتحبني
و انا محبتهاش و مش عارف
حاولت كتير و فشلت و الدنيا ضاقت جدا عليا
حتي العلاقة الجنسية بالنسبة لي متجردة من اي متعة
جاتلي فرصة اني اسافر سافرت فورا مش لاسباب مادية اطلاقا بس كنت بهرب من واقع مش عارف اتصرف فيه
مقدرشي اطلقها و ادمرها خصوصا و انا صارحتها كذا مرة بشعوري و كان رد فعلها انها متمسكة بيا يمكن مبحترمشي رد فعلها و يخليني ابعد اكتر عنها بس في نفس الوقت انا مين عشان ادمر انسانة بتحبني
في البلد الي انا فيها حبيت
حبيت حب مكنتش جربته قبل كدة
حسيت اني انا مكنتش عايش و فضلنا مرتبطين شهور
و كعادة الحياة احياناً مكملناش لاسباب كتيرة هي ملهاش ذنب فيها
بس بعد التجربة دي مرجعتش زي مانا
حالتي بقت اصعب
بقيت عارف يعني ايه انسان يعيش مع حد هوة بيحبه و لما بقارن بين حبي و جوازي بنهار
حياتي بقت صعبة جدا بقيت بدخل في علاقات لمجرد المقارنة مع تجربة حبي
و كل علاقة بتستهلكني اكتر و حالتي بعديها بتبقي اسواء
تعبت جدا
مبقاش حتي لشغلي الي كنت بعشقة اي معني في حياتي
رحت لاطباء نفسيين فعلا ملهمشي اي لازمة
عمال ادخل في علاقة و اطلع منها لمجرد الاستكشاف يا تري الحب هلاقيه في العلاقة دي و لا لاء
و طبعا حلقة مفرغة لان العلاقة الي بتبتدي كدة اصلا محكوم عليها بالفشل
لنل عموما مش عارف انا كتبتلك ليه
اصلا حتي الكتابة مش بتعبر عن الي جوايا
——————————
أهلا يا مشمش
تعالى نقسم مشكلتك نصين
النص الاول مشكلتك مع مراتك
النص التانى مشكلة بحثك عن الحب الجارف
طبعا انت عارف الكلام اللى انا هقوله بخصوص مراتك و ان مالهاش ذنب و ان دى انانية منك و الكلام دا
بس طبعا انت مش باعت لى علشان اسمعك كلمتين و امشى
موضوع مراتك لازم تحسمه معها و مع نفسك
من اول انت ليه مش قادر تحبها … لممكن تغير فى نفسك ايه علشان ترضى بحياتك معها … و بعدين الحوار معها و الاختيارات المتاحة … و الاختيارات هى انك تنفصل عنها او انك تتجوز عليها لما تقابل الحب اللى انت بتدور عليه
بس سؤال خطر فى بالى فجأة …. انت قلبت الدنيا فى رحلة البحث الحب و الكلام دا … تفتكر هى كانت بتعمل ايه و انت مهملها كدة؟ تفتكر هى لجأت لمين علشان يحسسها انها انثى و مرغوبة؟ ا انها انسانة و مسموعة؟ او انها محبوبة و فعلا تستاهل تتحب؟
دى بس مجرد أسئلة تفكر فيها قبل ما تقرر هتعمل ايه فى حياتك
موضوع بقى رحلة البحث …. لو استمريت بنفس الطريقة أخرتك الفشل و الاحباط
ليه؟
لانك بتجرى ورا سراب
كل علاقة و لها مذاق خاص
لكن انت بتدور على حاجة كانت مع واحدة و الواحدة دى مش هترجع تانى
انت بتطالب كل واحدة تعرفها انها تكون واحدة تانية
و طبيعى ان دا مش هينجح
تعمل ايه؟
قبل ما تدخل اى علاقة … اعرف انت مين اصلا … انت عايز ايه … و اللى انت عايزه دا هتلاقيه فين و لما تلاقيه هتقدم ايه فى المقابل و اللى انت هتقدمه دا كفاية و لا لأ
انت محتاج تتصالح مع نفسك و محتاج تفهم ان المرحلة الاولى فى اى علاقة بتبقى لفترة و تنتهى او تتطور ….. غير كدة هتفضل من علاقة لعلاقة لحد ما الاحباط يقضى عليك
