قبل الكلام احب ان ابدا امسي علي الاول وبجد يعني بصراحه ودا مش مجامله
بس بجد طريقتك عجباني
وامثلتك جميله جدا
بصي يا مروه اولا انا ن بورسعيد
تانيا انا صح سمعت تسجيلات حلقاتك سواء براديو او بالبرامج عامه
بس انا مشكلتي في جزئيه صغيره ملقتهاش
دلوقتي انا طبعا عشت بعادات ومجتمع
بالسعوديه يعني
المشكله عندي مش بكلامي معاهم اقدر اتكلم
بس البدايه عندي اني مش عارف اكلم بنات لما يكونوا بمجموعه
يعني انا بيبقى كلامي كله لو فتحت كلام مع بنت
اجي اقولهم لو سمحت
بلاقي 6 او 5 بيبصولي
طب انا بقى ابص لمين فيهم؟؟؟؟؟
المهم مرا حصلت لي وبصيت لواحده معينه بالذات
هما كانوا 3 فالمهم كلمت البنت دي بالذات وقعدت اسالها عن حاجات بالقرصات والورق وكدا
وانا بقى بتكلم لقيت صحابها الاتنين سيبنها وسبقوها
وخلوها لوحدها معايا
بعد ما سابوها لقيت بتسرع بالكلام وعاوزه تمشي وقلقانه
فقالت الاجابات على السريع ومشيوا
اصلا بالدايه اول ما كنت ماشي قدامهم وافتكرت اني عندي كام سؤال كنت عاوز اسئله لاي حد معايا
بس الصدفه اني لقيتهم ورايا كانوا مروحين
المهم فانا فجاه لفيت لهم وقلت السلام عليكم
طبعا هما كانوا بيضحكوا وكدا مجرد سلمت وكدا
وشهم اتغير360 درجه
حتى سالتهم مالكوا كانكم شفتوا بعبع يعني
قالوا لا مفيش واتكلمنا بالدراسه فقط
فالمشكله عندي اني لما اكون عاوز حد اكلمها بتكون بمجموعه بجروب
ازاي اجبها بقى
وهيا معاهم على طووول مش بتسيبهم ابدا
وعاوز اسئلك سؤال كمان هوا في مشكله لما البنت تقول اسمها
ولا الاسم بقى عوره
اصلي بتحرج من بعض البنات يقولوا لي عاوز الاسم بايه؟؟؟؟؟؟؟؟؟؟
او تقولك لما تعوزني تبقى قولي لو سمحت ؟؟؟؟؟؟؟؟
او انا مش بقول اسمي للشباب؟؟؟؟؟؟؟؟؟؟
برايك ليه بقولوا كدا بقى
المشكله 3
لما اجي اتكلم محدش بيفهم كلامي من اول مرا لازم اعيد صياغته مرا تانيه علشان يفهموا
هل دا عبط
ولا مشكله بيا
وبعدين كل اللي بقابلهم للاسف من النوع اللي مش بيحب يتكلم
وردهم بحدود خالص
الا واحده لقيتها بتبتسم كدا وفتحت نفسي اسال كام سؤال كمان
انا بقول ان في بنات بيجروك بالكلام وفي بنات بيطنشوك بالكلام
في بنات تساعدك انك تكلمها مرا تانيه وفي بنات لا
انا بقول الابتسامه هي اللي بتحدد
اصلي بترعب او بخاف شويه لما الاقي كانوا بيضحكوا وفجاه وشهم كشر
بحسس ان شويه وحضربك او يزعقوا
وبعدين انا بالمحاضرات لما يكون في حاجه فيتاني وعاوز اخدها من بنت معينه مبعرفش
بخاف من رده الفعل تقولي مثلا مستعجله
او دلوقتي دلوقتي
او تقولي مش كامله وبتهرب
او تقولي شوف غيري
او تحرجني وتقولي الشباب عندهم ومرا قلتلهم وانا عارف انهم مكتبوش راحت قامت قدامي ورايحه لهم وقالت الشاب دا عاوز ورق وكدا وطلعوا الورق
مرا كنت بدرس معين بايام المراجعه
فالمستر قال محدش يكتب حاجه افهموا وبعدين اكتبوا فالمهم التزمت لاني بحب الالتزام والاحترام
والباقي فضل يكتب
فانا كنت قاعد بالاخر وكدا
فخلصت الحصه والمستر قال اكتبوا
لقيت المجموعه كلها خرحت وانا لوحدي بكتب
فعلى طول المجموعه التانيه دخلت
فانا كتبت سطرين ولقيت العدد بيزيد
فقلت حنزل اجيب من اي حد اعرفه من الشباب لاني مبعرفش بنات
فملقتش زمايلي اللي اعرفهم صح في شباب تانين بس متهور كدا وكول اوي ومش معاهم اوراق
فقلت مفيش بديل الا اروح لبنت معينه كدا لقيتها لواحدها
فالمهم البنت مقصرتش وقالت اوك طيب جات لسه تطلع الورق
صاحبتها جات وقالت ايوا لو عاوز الورق على فكره عند الشباب قلتلها لا انا عارف معندهم ولو عندهم كنت ما جيت لكم
فراحت قالت لا ازاي دول معاهم وراحت والهي زي ما بقولك اخدت نفسها وراحت لهم وقالت الورق وكدا
وانا معرفتش ارد من سرعه تصرفاتها باي كلمه
وراحت لهم وقالوا لها اه
طبعا علشان بنت والولد طلعها من مناطق عجيبه الورق دا
من جوا البنطلون
دي بس عشان بنت لو انا كان قالي مكتبتش
فهيا قالت له الشاب دا عاوز الورق
وراحت اخدت صاحبتها ومشوا وفضلت البنات تبص عليا وفي بعضهم يضحك
وبعدهم سكتوا ومتاثرين
انا اخدت نفسي مهموم من الموقف دا
فمش عارف البنات معاملتهم وحشه ليه كدا ومحدش بيفتح قلبه ليا
او يساعدني انا على الاقل اني اتكلم معاهم تاني
انا مش عارف المشكله هل فيا ولا فيهم ولا انا منحوس
ولا انا مش بعرف اختار
وبعدين انا لو رحت كلمت بنت يعني مش بسال الا بكام نقطه معينه
مثلا
هاي ازيك عامله ايه وكدا
وابدا باللي انا عاوزه وقولهم ميرسي وامشي
دا كلامي بس مع البنات
امتا بقى افتح حوارات تانيه معرفش
ارجو اجابه واسف جدا للاطاله
بس دا كلام كان نفسي اقوله وجوايا يعني لاني معنديش صحااااااااااااااااااااااااااااااااااااب بجد بالبلد دي
الكل بينشغل بصحابه اللي من زمان ايام الاعدادي وكدا
اللي عارفين بعض اوي
———————————
اهلا يا مشمش
انت مشكلتك لها حل .. بس حل فى ايدك انت بس … و علشان اكون دقيقة هو حل فى راسك
مصطفى .. كل البنات مولودين برادار فى مخهم .. الرادار دا بيلقط اشارات جسد و صوت و ووش الرجل
اول ما ولد يمشى ناحيتها قرون الاستشعار بتحس دا زميل عادى و لا صياد
لو زميل عادى بتبقى عادية
لو صياد بيبقى يومه اسود
من صد لتريقة لتجاهل لكلام مقطوم لسخافة
انت بقى بتتصرف كصياد … لغة جسدك … طريقة كلامك … نبرة صوتك … كل حاجة فيك بتتحول من زميل لواحد بيعاكس
ايوة بيعاكس كأنه فى الشارع
اولا لما تحب تكلم بنات تقف فى وشهم مش تيجى من ضهرهم … زى اللى بيعاكس
ثانيا لما تيجى تنده ما تقولش لو سمحت دى … زى برده اللى بيعاكس
ثالثا انت لما بتسأل على الاسم بعد نمرة واحد و اتنين بيبقى شكلك واحد غريب بيسأل واحدة غريبة عن اسمها
..
فطبيعى هتصده
رابعا كل كلامك عن موضوع الورق و المحاضرات و رد فعل البنات بيقول حاجة واحدة بس … ان زميلاتك بيقولوا لك بطريق غير مباشر .. بطل استعباط
خامسا انت من كتر لبختك و خوفك من الاحراج كلامك بيطلع مش مترتب و صوتك بيطلع مش واثق من نفسه فالبنت اللى قدامك بتحس انك مش بتتكلم بنية صافية .. وراك حاجة يعنى … فبتصدك اكتر
طول ما انت حاطت حاجز نفسى بينك و بين زميلاتك و طول ما انت بتتعامل بمنطق الصياد كل ما هما هيتسلوا بيك و يتفننوا فى احراجك
الحل؟
انسى انك راجل
و انسى انها بنت
و افتكر انكم زمايل فى الانسانية … كلمها زى ما بتكلم واحد صاحبك
انت لو رحت كلمت ولد هتتكلم بنفس الطريقة؟ هتبص له بنفس الطريقة؟ هتسأل عن اسمه بنفس الطريقة؟ هتتلبخ و انت بتكلمه نفس اللبخة؟
الموضوع كله فى دماغك
و البنت بتكره احساس انها مستهدفة او انها فريسة او انها صيدة … طول ما انت مخك بيفكر فى ولد و بنت طول انت هتفضل متبهدل كدة
