كنت اتمني اني اتقابل معاك علشان انا حد مش بعرف اكتب كويس ومش بعرف اعبر عن نفسي
بس مافيش مشاكل هاحاول بس معلش اتحمليني لو اسلوبي هيكون ركيك ومش هايوصل المعلومة كويس
انا عندي 35 سنة متجوزة وعندي بنت وولد (بنتي 10سنيني وابني 5 سنين
بنت وحيدة لأم وأب كانوا دايماً مختلفين في كل شئ وكل حاجة وعشان كنت صغيرة ماكنتش عارفة اية سبب الخلاف الدائم دة …بس كنت كل اللي أعرفه اني كنت بخاف مووووت اني ابعد عن ماما مش حب علي قد ماهو خوف
ماما كانت راجل البيت هي المتحكمة في كلشئ وبابا حد مكبر دماغة عن كل شئ ووصلني ولنا صغيرة بشكل او بأخر ان البعد عن ماما معناه الحرمان من كل ماهو آمان عدد من السنين والدنيا باظت بينهم وحصل الأنفصال
ومن قبل القنبلة دي ماتفرقع في حياتي كنت بدأت اتغير من ناحية ماما كتي ربسبب مواقف كتير
وبدأت من الوقت دة ادور علي اي حاجة تطلعني من
البيت اللي انا مش لاقية فية راحتي دة ولا حتي لاقية فية اي تفاهم من اي حد ولا حتي اهتمام لأنها بدأت تهتم بكل حاجة ليها علاقة بية حتي ان مكاني جنبها اتغير وبقيت انام برة في الأنترية وجوزها الجيد بقي ينام جنبها
والمقدمة دي توصلني بشكل او بأخر اني احاول افهمك انا اخترت جوزي علي اي اساس …..لأنه حد طيب مووووت ووقتها كنت معتقدة انه الشخص الوحيد اللي ممكن اقول له علي حقيقة مشاكلى و مشاكل عيلتى
وانا ماكنش عندي استعداد اني اتجوز حد وابدأ حياتي معاه بكدب وعلشان كدة حكيت له وكان رد فعلة زي ماتوقعت ….مش مهم انت الأهم عندي مش ماما وبابا
وعلي كدة كان هو دة السبب الوحيد اللي اخترت بية جوزي عشان اتجوزة…لكن بعد سنين وعشرة طويلة اتضح لي ان الطيبة وحدها عمرها ماكانت كفاية لآزم يكون راجل فيه مميزات كتير غير الطيبة..انا دلوقتي بحبه اوي مافيش مشاكل لكن بحبة زي ما بحب ابني حاسة انه حد مسئول مني لكن انا فين انا مسئولة من مين انا اتسند علي مين
وعشان كدة بدأ الفصل التاني من حياتي اللي ماكنتش اتوقع انه ممكن يحصل مهماحد
حاول يقنعني بكدة
اني ادور علي الراجل دة في عيون اي حد يقابلني او يكلمني
في شخص او حالة في خيالي بأتمني اني الاقيها ….بعيش في موووود بأرسمه لنفسي واتمني اني الآقية
نفسي بقي اتغير …نفسي احس اني بفكر صح عمري ماعرفت اخد قرار في حياتي علي طول سيباها للظروف زي مايحصل هاعمل ماعنديش هدف
عاوزة اتغير دلوقتي علشان اعرف اربي بنتي صح اعرف اعلمها تاخد قرار وتعرف يكون ليها هدف
مروة ..انا مش عارفة انا بكتب لك لية مش عارفة ارتب افكاري مش عارفة انا عاوزة منك اية او عاوزاكي تعمليلي او تقوليلي اية …بس انا تايهة وتعبانة جداً ومش عارفة اعمل اية
انا اسفة علي الرسالة الهبلة دي ولو مش وصلتي منها لحاجة مافيش مشكلة ولو مش عاوزة تردي بردو مافيش مشكلة
بس لو عاوزة تساليني عن اي حاجة تفهمي منها اي حاجة عشان تردي عليا بأي حاجة (ههههههه
انا موجودة
____________________________________________________
اهلا يا مشمشة
انت الزمن دار و لف و حطك مكان مامتك
و خايفة بنتك تشوف اللى انت شوفتيه و فى الآخر تختار زى ما انت اخترتى و الدايرة تكمل
علشان بنتك تختار صح و تتعلم صح و شخصيتها تبقى قوية
لازم تديها مساحة تغلط و مساحة تحلل غلطاتها و مساحة تتعلم من غلطاتها
بنتك عندها 10 سنين دلوقتى
و زى اى ام انت خايفة عليها
لكن الخوف دا ممكن هو اللى يقتلها من جوة
انا عايزاكى تفتحى لها قنوات للاحتكاك بالناس
بنات و ولاد
رياضة
رحلات
انشطة
هوايات
فسح
علشان الفلاتر بتاعتها تقوى .. علشان تعرف تقرا الناس و تفهم مين كويس و مين وحش
و عوديها تحكيلك
تحكيلك علشان تفكروا سوى و تحللوا سوا مش علشان تفرضى عليها رأيك
دورك كأم هو النصح و الارشاد
مش انك تعيشى حياتك مرتين .. مرة فى جسدك و مرة فى جسدها
أما موضوع الرجالة التانية و احتياجاتك … أنا مش هعلق عليه … اعملى اللى نفسك بنتك تعمله لما تكبر
