انا اكتشفت ان والدى (66 سنة ) بيعرف واحدة واتاكدت فعلا شوفت ماسجات على الموبايل بتاعة وسمعتة اكتر من مرة وهو بيكلمها بالصدفة وهو مكنش واخد بالة منى كنت فى الاول فاكرة ان الموضوع نزوة وهيروح لحالة لكن الموضوع بقالة اكتر من سنة وكمان زاد لدرجة انة بيكلمها فى اليوم اكتر من مرتين تلاتة وكمان قدامنا وقدام والدتى على انها واحد صاحبة طبعا المشكلة انة والدتى متعرفش حاجة تماما ومش واخدة بالها من اى حاجة وانا مش قادرة اقولها حاجة لانى خايفة عليها جدا وكمان حاسة انة الموضوع بين والدى والى بيكلمها كبير مش مجرد كلام بس لاء انا حاسة انة فى زواج
مع العلم ان والدتى مش عيانة ولافى اى مشاكل بينهم
طبعا مش قادرة اقولك الاحساس الى جوايا اية ووالدى نزل من نظرى اد اية ومش عارفة اعاملة كويس ولا عارفة اتصرف ازاى اقول لوالدتى ولا اسكت ولا اواجه والدى
___________________________
اهلا يا مشمشة
أنا عارفة ان كلامى مش هيعجبك
و عارفة ان فى ناس كتير ممكن تعترض على اللى هقوله
بس انا هقول و خلاص
كل انسان فينا ما يملكش فى الدنيا دى غير انه بتحكم فى نفسه … يعنى انتى مسئولة عن نفسك و قراراتك و اختياراتك و عواقبها …. و بس
لا ليكى كلمة و لا رأى فى اختيارات ابوكى او امك او حتى ولادك لما تخلفى
باباكى عنده 66 سنة … و عمل اللى قدر عليه علشان يحافظ على جو و شكل و استقرار الأسرة … اللى عمله حلو و لا وحش مش مهم .. المهم انه عمل اللى هداه ليه عقله و فكره
مش معنى انه اتجوز ان فى عيب فى مامتك و مش معنى انه مخبى انه كداب
الله اعلم الست التانية دى مين و لا دخلت له ازاى و لا نوع علاقتهم ايه … المهم انها اختياره و هو حر فى اختياراته
و هو على قد ما قدر بعدكم عن الموضوع دا
ليه يقع من نظرك؟ هو عمل ايه؟ و اللى عمله دا تأثيره المباشر عليكى ايه؟
تعملى ايه؟
و لا حاجة … كأنك ماعرفتيش حاجة
أى تصرف هيؤدى الى جرح فظيع لمامتك و غضب من باباكى و فضايح ملهاش لازمة
افتكرى دايما ان الواحد مننا لا بيختار اهله و لا ممكن يغيرهم و لا ينفع يحاسبهم
كل اللى فى ايدك تعمليه هو محاولات للتفهم و التماس الأعذار لان ما حدش عنده الحقيقة كاملة
