بصى يا مروة لو واحد ييجى يطلب من البنت اللى مرنبط بيها فلوس ده عادى و لا أستغلال ؟ فيه واحد مفهمنى انه بيحبى ألخ ألخ ألخ المهم بقاله فتره عمال ل شويه يقولى انه عمال يدفع فلوس هنا و هنا و هنا كشغل او كديون او كألتزامات ده مش مشكله المهم هو عنده دلوقتى دروب و محتاج فلوس مش علشان معهوش لاء هو بيقول نه معاه بس ودايع فى البنك و بيقبض فوايدها بس لحد ما ييجى فوايدها دى هو محتاج فلوس يمشى بيها نفسه و لما قولتله طب ممكن تاخد من اخواتك لاء اخواته البنات مينفعش و هو مبيطلبش منهم فلوس و اخوه التانى مسافر و هيبعتله فلوس اخر السنه و هو مش قادر يحكيله على موقفه ووضعه هنا فانا قولت هعرض عليه انى اديله الفلوس دى و انا مقتنعه ان الراجل مينفعش انه ياخد حتى من خاطبته فلوس راحوه فين اهله كلهم او اصحابه علشان ميتبقاش غير خطبته مثلا انا قولت هو لو زى ما بيقول انه مبيقدرش يستلف من حد بس انا حاجه تانيه انا الوحيده اللى عارفه كل ظروفه دى انه هيقول لاءءءءءءء ازاى انتى تقولى حاجه زى كده او انا لا يمكن اخد فلوس من بنت فجات بيه بيقولى اوكى ماشى لو تقدرى تبعتيلى حاجه عارفه الحاجه دىدى هتكون كام 3 او اربع تلاف المشكله مش فكبر المبلغ المشكله عندى حتى لو كانت فى 10 جنيه ازاى ولد يقبل انه ياخد من بنت فلوس حاسيت ساعتها انه بينصب عليا او انه عرفنى بس علشان يمثل و ياخد منى فلوس فانا هختبره فحاجه هقوله ان انا مينفعش اسحب المبلغ ده من غير ما حد يعرف من اهلى فانا هقولوهم اللاول و هشوف هو هيقولى ايه بس انا مش عارفه اذا كان عادى انه يستلف و لا لاء؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!
————————————
اهلا يا مشمشة من حيث المبدأ و العرف و السائد .. ما ينفعش راجل يمد ايده على فلوس اخته و لا خطيبته و لا مراته و لا اى بنت فى حياته
لكن مش عيب ان البنت تقف جنب اللى بتحبه فى وقت زنقة و الا هتبقى ندلة
—————-
دا كدة الكلام العام اللى انا عايزة اقوله لك بقى .. ان فى حاجة جوا كل بنت اسمها الحاسة السادسة .. الحاسة دى دايما صادقة لكن احنا اللى بنفضل نسكتها و نكتم صوتها
انت عارفة انه مش عيب ان البنت تقف جنب اللى بتحبه لكن انت جواكى صوت بيقول انه نصاب و انه استغلالى
الحاسة السادسة دى بتشتغل ازاى؟
بتجمع كل مواقف الانسان دا معاكى و بتحللها فى عقلك الباطن و بتستشف اللى بين السطور و ورا الكلام و بتكون انطباع عن الشخص دا
دى مش اول مرة تحسى انك مع شخص غلط
دى مش اول مرة تحسى ان العلاقة مش مظبوطة
لكن كل مرة كنت بتسكتى صوت الحاسة السادسة
المرة دى بقى زادت عن حدودها علشان كدة الصوت كان اعلى من انك تتجاهليه
لو انت رأيك فى حبيبك انه رمة و نصاب و استغلالى يبقى بغض النظر عن موضوع الفلوس ..العلاقة دى مش هيجى من وراها خير
