حبيبتى مروة
انا دائما باتابع مقالاتك و ارائك فى التليفزيون و المجلات و حقيقى معجبة جدا بتفكيرك
انا عندى مشكلة و محيرانى و كان نفسى طبعا اقابلك شخصيا عشان اتكلم معاكى براحتى بس انا طبعا عارفة انا مقابلة المشاهير من اصعب ما يمكن . عموما انا هحكى لكى مشكلتى و انتى حاولى ما تزهقيش منى.
انا لى صديقة من سنين و علاقتنا حلوة الحمد لله . و فى شخص معين على علاقة بها و المفروض انهم يتجوزو مع العلم انها هتكون زوجة تانية لانه متجوز و عنده اولاد . المهم باختصار و بدون اى ذنب لى فى هذا الموضوع فوجئت من فترة ان هذا الشخص بيكلمنى و يعبر عن اعجابه الشديد بى من فترة طويلة و انا كنت ملاحظة ذلك بس كنت باحاول ابعد .
المهم لما اتكلمت معاه حسيت انى مشدودة له و بناءا على العلاقة القديمة مع صديقتى كنت شايفة انه محترم جدا و مش بتاع لعب و لا تسالى و جد جدا. و انا كنت شايفة انه مش بيعطى الموضوع بتاعهم اى اهتمام لانه من فترة و هو بيحاول يبعد عنها بس باسلوب محترم عشان مش عايز يتسبب فى ضرر لها باى شكل من الاشكال مع العلم ان عنده اسباب معينة فى الابتعاد عنها و لكن المشكلة انها مش عايزة تعطى له اى فرصه و متعلقة به جدا و عشان اكون صريحة اكتر هو كده كده مش هيتجوزها فى كل الحالات حتى لو انا لم اكمل علاقتى معه.
المشكلة انها متعلقة به جدا لانه رجل بمعنى الكلمة و مش بيحب اى احد يزعل منه و بالرغم ان عمرها مش كبير و لا يتعدى الثلاثين و لكن عندها احساس ان مافيش غيره فى الدنيا كلها . الموقف الان انى معجبة به فعلا و نفسى اكمل معاه بظروفه و فى نفس الوقت مش عايزنها تزعل مننا و احنا كل ده صابرين الى ان تفكر فى انسان تانى غيره.
و لكى اكون صريحة معاكى اكتر انا مش شايفة انه بيعطى لها وعود و لكن هى علطول لا تعطى له فرصة لاى حاجة و خاصة ملاحقته بالتليفونات و المقابلات و هو بيحاول يعتذر كثير و لكن هى لا تهدأ.
على فكرة احنا كلنا بنشتغل فى مكان واحد و نرى بعض بشكل مستمر و انا فعلا محتاجة له لانه فعلا رجل بالمعانى الحقيقية
و مو ضوع انه متزوج لا يمثل لى اى مشكلة لانى مش واخدة الموضوع على انه ورث لازم استولى عليه بل بالعكس انا باعطى له مساحة من الحرية و هو فعلا جدير بالثقة . بالاضافة الى ذلك ان ماما لا يوجد لديها مشكلة فى هذا الموضوع و لما صارحتها بالموضوع كامل كان رايها انى لو فعلا انا عايزاه لابد ان انتظر الى ان ينتهى الموضوع بينهم لكى لا نسبب اى نوع من الالم لصديقتى حيث انها رقيقة المشاعر جدا
مش هطول عليكى اكتر من كده بس في حاجة انا نسيت اقول لكى عليها و هى ان بالرغم من تمسكها به جدا فان والدها لم و لن يوافق عليه نهائيا لانه متزوج .
انا محتاجة انى اسمع رأيك فى هذا الموضوع ضرورى يا مروة و مش عايزه اخسره و لا عايزة اخسرها ولا اجرحها
شكرا لكى
—————————
