fbpx
مونتيسوري مصر- تقدمها مروة رخا

 

السلام عليكم

انا عندى 23 سنة
خريج طب أسنان

ازيك يا مروة …انا متابعك من فترة من اول لما جتلي دعوة على الفيس بوك لكتابك الرائع جدا جدا (شجرة السم) بجد الكتاب روعة مع انه لو كان باللغة العربية اكيد كان هايوصل لناس اكتر واكتر

عندي مشكلة يا مروة …هيا مش مشكلة على قد ماهيا حالة قائمة عاوز اخرج منها

انا كنت مرتبط …من سنتين اتعرفت على زميلتي في الكلية والغريب شوية اني اتعرفت عليها اون لاين

كانت بداية التعارف حدوث خلاف بيننا على احد المنتديات …طلبت ايميلها عادي جدا وهيا استجابت برضه طبيعي عشان نحل الخلاف

اتكلمنا …وبدانا نتكلم كتير جدا جدا واتعلقنا ببعض

ايام واتقابلنا في الكلية …طبعا كان لقاء رهيب جدا مش هاقدر اوصفه

وكل مكان مشينا فيه وكل كلمة قولتها او سمعتها فاكرها من ستنتين وكأناها من 5 دقايق

لو فضلت اتكلم عن اليوم دا هاتزهقي مني

لحد دلوقتي مفيش مشكلة

المشكلة بقى ظهرت بسبب اني من محافظة وهيا من محافظة تانية

انا الولد الوحيد من اسرة ميسرة ماديا …

انا كلية طب أسنان وهيا برضه زميلتي في الكلية لكن اصغر مني بسنة

والدي بارك الله له ..جابلي شقة عشان يضمن مستقبل ابنه الوحيد غير انه كبير سنا وبالمعاش

يعني محتاجني جمبه ..

وانا بيني وبين نفسي كنت باشوف اني ولد محظوظ اني عندي شقة ملك كويسة

قولتلها على دا كله

هيا كانت مصرة ان اهلها مش هايوافقوا انها (تتغرب) برا محافظتها

والاغرب انها هيا شخصيا مكانتش موافقة …العلاقة استمرت اكتر من سنة ونص

وطول الفترة دي خايفين ناخد قرار

كل ما كنا نتكلم ونبعد كنا نرجع تاني لاننا فعلا مكناش بنقدر نبعد عن بعض

كانت كل متقول لازم تقنع اهلي اقوللها اذا كنتي انتي نفسك مش موافقة ..هاقنع اهلك ازاي بشيء انتي مش موافقة عليه

كنت حاسس انها عايزة كل حاجة مع بعض وانا حاجة من ضمن الاوبشنز اللي هيا عايزاها

عاوزة تعيش جمب مامتها …لانها مش عاوزة تعيش مشكلة مامتها تاني (مامتها من محافظة تانية وفيه مشاكل كتير في الاسرة) وهيا زي ما تقولي كدا عندها عقدة من الحكاية دي عشان كدا خايفة تبعد عن اهلها

طبعا انا جيت في الأول وقولت وماله …ماهو الواحد لازم يضحي عشان حبه ..وهيا مهما كان بنت …والراجل هوا الأقوم وهوا اللي مفروض يضحي ويوفر الراحة والامان اللي شريكة حياته تحس بيه

بس مع الوقت اتضح اني يستحيل اروح اعيش في بلد تاني …مش عشان انا خايف اسيب اهلي

لا …دا عشان انا قولت لو مليش خير في ابويا وامي اللي ضيعوا عمرهم وحرموا نفسهم من متع الدنيا عشاني …اكيد مش هايكون ليا خير في الانسانة دي وهيا كانت فاهمة دا كويس

كانت لما نتكلم في الموضوع كنت احس انها عادي جدا ياللا نفركش الموضوع خالص … وانا اللي كنت باقول لأ ناخد فرصة تانية …يمكن يحصل حاجة تصلح الامور

والله يا مروة كنت باحلم بمعجزات تحصل عشان ارضيها …

كان نفسي بجد تكون شريكة حياتي طول عمري …وفي الوقت نفسه اكون في خدمة اهلي ورعايتهم

عارفة حتى الواحد كان بيفكر …ماهو انا لو سافرت برا …منا كدا كدا هاسيبهم ومحدش هاياخد باله منهم

بس مكانش ينفع برضه اقول لوالدي كل اللي انتا عملته خليهولك …بجد كنت باشوف في عنيهم نظرة غريبة …هما موافقين وبيقولوا اعمل اللي انت عايزه وعيش زي مانت عايز …بس احساسي بالذنب من ناحيتهم كان بيطقعني

وفي الوقت نفسه انا كنت عايزها وباحبها جدا جدا ومازلت طبعا ومحبيتش حد غيرها الى الان وحتى مبفكرش في حد تاني

الحكاية منتهية بقالها 8 شهور تقريبا

المهم

النهاية جت ازاي بقى

جت بطريقة عجيبة جدا جدا يا مروة ….

اتكلمنا في يوم وفتحنا الموضوع …ولقيتها بتقول انا موافقة اجي معاك اي حتة …بس انتا اقنع ماما

كان متوقع اني لما اسمع حاجة زي دي ان الدنيا متسعنيش من الفرحة …واني ابقى كدا خدت كل اللي انا عاوزه من الدنيا
وخاصة اني طول الفترة اللي قبلها كنت عاوز اكلم مامتها وهيا اللي كانت رافضة

الغريب انها لما قالت كدا انا استقبلت الحكاية بفتور غريب جدا …وقولت ماشي شوفي ممكن اكلم مامتك امتى او اقابلها وانا جاهز

بعدها بيومين بعتتلي مسج ..بتقول ان مامتها جاية الكلية بكرا وبتقوللي اجي اكلمها وكدا

وافقت …وجهزت نفسي اني مسافر تاني يوم ورايح الجامعة

الغريب جدا اني منمتش طول الليل …وفكرت في حاجات كتير جدا جدا

ومروحتش !!!!! وفضلت قاعد على سريري الموبايل جمبي بيرن وانا مش راضي ارد

فين وفين رديت هيا اللي كانت بتتصل …سمعت ما اكره طبعا …وقفلت الخط

وخلاص كدا خلصت الحكاية

انا ممكن اقوللك مليون سبب يخلوني اتصرف التصرف دا …لكن انا مش عاوز اسمح لنفسي حتى اني اشوه صورتها …لاني في النهاية اخطأت في حقها وجرحتها جرح عمرها ما هتنساه

مقتنع جدا جدا اني غلطان … بس انا بيني وبين نفسي حسيت اني هاروح عشان مامتها تقوللي باباها رافض انها تبعد عننا
وبكدا تبقى كل السكك اتقفلت

قومت قفلتها انا وبلا رجعة …والى الان ندمان ندم شديد جدا

والدي كان بيقوللي بلاش …مش عشان هيا انسانة وحشة …كان بيقوللي هيا مش عاوزة تضحي ولو حصل في يوم وقالتلك انها هاتروح معاك اي مكان هاتبقى انسانة متمردة واي مشكلة هاتحصل هاتقوللك انا قولت كدا من الأول والكلام دا كله

عارفة يا مروة ..كانت محسساني انها ممكن تروح مني في اي لحظة ….ممكن تتخطب بعد كام يوم مثلا

احساسي اني لازم اضحي وهيا لأ …اني لازم اعمل كل حاجة عشان الحقها والا هاتضيع
احساسي اني مجرد حاجة من ضمن حاجات كتيييييير هيا عاوزاها في حياتها …انا واهلها وصحابها وخروجاتها وكل حاجة

فكرة انها تستفز غيرتي …او تستفز نقطة اني عايزها بأي طريقة دا حسسني اني بني ادم مش تمام والمفروض اكون اعقل من كدا

والله مرة قالتلي انا مش هاقدر اعيش في مكان تاني عشان صحابي اللي انا متعودة اخرج معاهم

وكذا مرة جالها عريس …وتقوللي كدا عيني عينك ..العريس من بور سعيد ومهندس بترول وعنده شقة وايه …يعني لقطة ….كدا بنفس اللفظ

اكيد كبعا كنت باتضايق واتنرفذ وهيا كانت تراضيني

في الوقت نفسه هيا كانت كل حاجة في حياتي …رميت كل شيء في حياتي ورا ضهري وخليتها هيا رقم واحد

مش عارف هيا استغلت دا استغلال مش صح ولا ايه

جايز كنت مدلوق زيادة والبنت بتحب الواد التقيل

لما كانت بتبقى مع صحابها كانت تقريبا بتنساني

طول ماهيا في بيتها ولوحدها كنت انا بابقى كل حياتها

انا مبقولش انها تقطع حياتها ليا …لا خالص …بس فيه بني ادم الواحد بيحس انها مهما بعد عنه او نسيه فهوا في باله …وبني ادم تاني اول ما ينشغل بصحابه وحياته ينسى حتى يطمن الطرف التاني بمسج او حتى رنة

مع دا كله انا باحبها جدا وما زلت واتمنى يوم يرجعنا لبعض …

عارفة انا عايش دلوقتي على ذكرى جميلة جدا وكلام حلو ونظرة رقيقة عالقة في متحف الذاكرة

بس مفيش حاجة جوايا تخليني حتى احاول ارجع دا تاني …

باعرف اخباراها من بعض اصدقاءها او معارفها واتمنى لها حياة كريمة بجد زي ماهيا اتمنت

جايز هيا محستش بيا زي مانا حسيت بيها لاني فشلت في اني اوصللها دا بطريقة مناسبة
 

السؤال هنا بقى ….ايه تفسيرك للي انا عملته دا يا مروة …مع كامل اقتناعي انه غلط

غير كدا …هوا مش طبيعي يعني اللي بتحب راجل بتروح معاه في أي مكان ؟؟؟؟ وتبدأ معاه حياته …ولا ايه اللي مفروض يكون يعني ؟

وازاي اقدر اعيش حياتي تاني وافكر في انسانة تانية بدال مانا عايش على انقاض ذكريات

شكرا انك قريتي رسالتي الطويلة دي …وارجو اني اشوف ردك قريبا

 

—————————————

تصدق يا مشمش لو قلت لك ان اللى انت عملته دا مش غلط و ان انا فاهمة كويس اوى انت عملت كدة ليه

بص يا مشمش .. كل واحد فينا من جواه عارف الحقيقة .. حقيقة اى حاجة .. حقيقة مشاعره … حقيقة موقفه .. حقيقة اى موقف هو بيتحط فيه … و انت من جواك كنت عارف انها مش الزوجة اللى انت عايزها … و من جواك انت كمان عارف ان الحب مش كفاية و ان حبك ليها مش كفاية … لما اتحطيت فى موقف الجد عقلك طغى على قلبك و عملت اللى عملته

انت كنت عارف كويس اوى ان انت بالنسبة لها عريس جاهز بس اللى بيميزك عن اى عريس عادى انها عرفتك و عرفت مشاعرك ناحيتها … و كنت عارف كويس انها مش هتسعدك … و كنت عارف كويس انها مش هتربى عيالك زى ما انت عايز … و كنت عارف انها انانية و مش جدعة معاك

و انت دلوقتى عارف ان الموضوع بقى ذكرى و هيفضل ذكرى و مافيش داعى تغذيه لانه لو صحى هيبقى وحش مدمر هيقضى على الذكرى الحلوة و على المستقبل كمان

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”