ازيك يا مروه
ممكن تكون مشكلتى مش مشكله كبيره اوى بس هى مشكلتى او بالمعنى الاصح هى مشكله الناس مش انا
انا عرفت واحد من سنتين وكان ساعتها لسه في الكليه وكنت حبيته جدا بس انا من النوع القويه واما لقيت ان ظروفه صعبه وممكن تقولى مستواه اقل منى شويه مش كتير بس اقل فبعدت عنه وبعديه عرفت 2 والاتنين كان مستواه والماديات بتاعتهم كويسه وكانوا كل ما احكى لحد عليهم يقول يا سلام البنت عرفت تختار بس في الحقيقه انهم طبعهم كان وحش جدا وطبعا سبت الاتنين المهم بعد كده جت الظروف انى رجعت للى حبيته الاول وبقالنا دلوقتى فتره مع بعض مش هقلك فظاع بقي ومفيش زينا بس احنا متفهمين جدا وبنحب بعض واى موضوع بيبقي ارائنا متوافقه هو راجل وفي كل الصفات اللى اتمناه في اللى يرتبط بيا من صدق لحنيه لنى ممكن اعتمد عليه لتحمل المسئوليه كل حاجه كان نفسي فيها لانى اصلا بابيه متوفي ومليش اخوات وهو بصراحه معوضنى عن كل دول هما جم البيت واحنا رحنا لهم عشان الموضوع يبقي شبه رسمى وهو نقصله الجيش ويشتغل ومن دلوقتى هو بيشتغل مع باباه ومع اخوه هو واخوه عندهم مكتب كمبيوتر وانا معنديش مشكله معاه خالص
المشكله بقي ان هو من منطقه شبه ارياف وانا من منطقه نضيفه مش هقولك راقيه بس نضيفه والحاجه التانيه انه بيت عيله وهو ليه اخين ولاد غيره وكل واحد من التلاته ليه شقه في العماره دى ومعندوش القدره انه يجيب شقه غيرها وطبعا مينفعش يبعها انا شخصيا معنديش مشكله في كده المشكله في الناس في قريبي اما ماما قلتلهم اعدوا بقي بقي انتى الى كنا فكرين انها هتقع وقفه تقع على جذور رقبتها بقي انتى يحصل فيكى كده انتى نسيتى عمك مين نسيتى خالك مين نسيتى انتى مين انتى ازاى تعملى في نفسك كده وليه تجوزى واحد ابوه شغال كذا لان ابوه عنده ورشه وشغال مهنه يدويه وليه تعيشى بعيد عننا وهو ايه اصلا ومستقبله ايه قولت لهم انا هجوزه بكره انا لسه فضلى سنه الكليه وهو سنه الجيش وبعد كده اما نشتغل نجوز عادى ياما ناس بيعملوا كده مش جديده يعنى وبالنسبه لبيت العيله بنات كتير من صحابي كانوا عايشين كده مع اهل ابوهم واما ربنا رزقهم جابو بدل الشقه اتنين ده واحد بيبتدى حياته قعدوا يقولولى وليه كل ده ممكن يجيلك واحد في الفتره دى وتعلقي نفسك ليه
واللى بيكلم ده اصلا كان جايب لبنته شقه تجوز فيها وخلا جوزها ميعملش اى حاجه في الشقه ودلوقتى وهما عندهم عيال بيخليها هى اللى تربي وتشتري وتعمل كل حاجه وهو مسافر على طول يعنى مش الراجل صاحب الاختيار السليم المهم انا دلوقتى هما قرفونى وقعدوا يقولوى انتى لازم تخلصي من الموضوع ده لان مينفعش الواحد ينزل الواحد بيطلع وانتى بتتدبي والراجل جيب وده هيصرف عليكى منين من مامتك ولا هياخد من ابوه وتعيشى طول عمرك مزلوله ليهم تنضفي ليهم الشقه وتبقي الخدامه بس انا مفهمه اللى انا بحبه انى مش متعوده على جو العيله وممكن انزلهم الصبح اصبح عليهم وشكرا ومامته حتى فهمه انى مش متعوده على الدوشه واخواته والجو ده وهى قلت له نفس الكلام واحنا متفقين انا طبعا مصدعه من ساعه ما اكلمت مع قريبي رغم ان دول ايه عينه مش كلهم دول خالتى وجوزها بس بس انا فعلا سخنه ومصدعه وحسه انى ضغطى عالى انا بحبه جدا ومش هقدر ابعد عنه لانى غلط وبعدت عنه قبل كده واتاكدت انى مش هلاقي واحد يسعدنى زيه لان هو ده الراجل اللى انا عايزاه نسيت اقولك ان جوز خالتى بيقولى ان حبيبي ده فهمنى قبل ما انا افهمه وعشان كده حببنى فيه وعرف انى فرصه بالنسبه له عشان كده متمسك بيا
المهم انا امبارح كنت بكلم مع حبيبي قولت له على اننا اما اكلمنا مع قريبي انهم معترضين على انك بعيد وعلى انه بيت عيله مقولتلوش على اى حاجه تانيه بس هو زعل وقالى يعنى احنا عايشين في اخر بلاد المسلمين وابويا غلطان انه عايز يجمعنا يعنى هو اى واحد مش لو معاه فلوس مش هيبنى بيت ويلم فيه ولاده وزعلان وانا تعبانه وكل ده واللى عمله جوز خالتى عشان هو جيبلى عريس تبعه بس ايه جى عشان يعيش معايا انا وماما يعنى جى ياخد عروسه بالشقه مش هيتعب في حاجه بس طبعا اما عرف الموضوع قالى لازم تخلصي الموضوع بتاعك ده الاول قبل ما نفتح الموضوع الجديد انا عايزه اخد رايك في كل اللى حصل ده لانى فعلا تعبانه وانا عارفه انا عايزه ايه بس انا مش عارفه الناس بتعمل كده ليه ياريت تقوليلى ايه رايك واعمل ايه واقولهم ايه معلش انى طولت عليكى شكرا
———————————————-
اللى بيحصل دا ما يرضيش حد …. خالص
مش انت واضحة و صريحة و مفهماه نظامك … و هو واضح و صريح و فاهم اللى ليه و اللى عليه … و مامتك كانت موافقة لحد ما الناس اتدخلوا … يبقى ليه نوقف المراكب السايرة؟
و بعدين خلينا واقعيين ما فيش جوازة كاملة و لا هايلة من كل النواحى … و كل واحد و واحدة بيختار المشكلة اللى يقدر يتأقلم معها … فى ناس ممكن تتحمل الفقر … فى ناس ممكن تتحمل الغربة … فى ناس ممكن تعمل اى حاجة علشان الفلوس .. فى ناس ممكن تقبل بيت العيلة … فى ناس ممكن تقبل مطلق او مطلقة … يعنى ما فيش حد كامل و ما فيش جوازة كاملة .. الموضوع كله عبارة عن انت محتاجة ايه و مستعدة تضحى بايه علشان الاحتياج دا
