انا يا مروه عندي 19 سنه و حبيت واحد من فتره و هو معايا في الجامعه بس اكبر مني ب 3 سنين و هو حس بيا و جيه قالي نرتبط بس مش هيقدر يقولي بحبك غير لما يحسها فعلا و الكلام ده من 8 شهور بعدها بشهر قالي انه بيحيني و ميقدرش يعيش من غيري و كلم ماما و انا اخويا صعب شويه ياعني مينفعش اكلم ولاد ولا اي حاجه كده اخويا لما عرف بهدلني و ضربني بس انا وقفت قدامه و قلتلو ان انا بحبه قالى خلاص يبقى ماتكلمهوش لحد ما يتقدم رسمي و اللي شافعلى شويه في الموضوع ان ماما كانت عارفه بس و فضلت اكلمو بعلم ماما بس اخويا ميعرفش و والدته كمان كلمتني و بعدها ماما قالت لبابا و هو كلم بابا مع العلم ن بابا مسافر اصلا و اخويا الاصغر مني كان عارف اه كان بيعترض اوقات بس كنت بصعب عليه و الولد ده انا اتغيرت عشانه 360 درجه قالى ماتكلميش حد ولاد في الاول حتى الموعدين اللي عليا عشان مينفعش و هو البنت اللي بيحبها المفروض انها متعرفش حد قعدت فتره لحد ما اتعودت و كنا بنتخانق بسبب ده كتير ان حد يسالني على حاجه في المحاضره و ارد مثلا لو معيد كلمني و رديت عليه بس و بطلت كل ده و هو فضل يشك فيا و قالى هخلى حد معاكي زي ما يكون مراقبك كده قلتلو اوك عشان بس يثق فيا و اتاكد اني مش بعمل حاجه خالص حتى في الدراسه مش برد ولا بتكلم طلب مني منزلش من البيت خالص حتى لو مع ماما مكنتش بنزل خالص حتى مع ماما ماكلمش قرايبي قلت اوك ياعني من الاخر بقيت لوحدي في الدنيا بس انا فيا عيب عصبيه اوي و غيوره اوي هو كمان صراحه مكنش بيدايقني خالص و مكنش بيكلم بنات خالص طلب مني اتنقب عشان محدش يبص عليا و بالذات الناس اللي كنت اعرفهم في الجامعه و محدش يتكلم عليا يا كده يا مروحش الجامعه و انا في كليه هندسه واللى يغيب 3 مرات يجيلو حرمان قلت اوك هتنقب بس ماما و بابا مرضيوش و انا رفضت الاول و اتخانقنا عشان دي عباده بتاعت ربنا بس و قالى قربي اوي من ربنا لحد ما تحسي انك عايزه تعملى كده و هو كان عارف ان هو اول حد في حياتي عشان انا مش بصاحب و مينفعش اظلم البنيادم اللي هكمل معاه حياتي و حبيتو اوي كده عشان حسيت انه هو ده اللى هكمل معاه حياتي عشان هو مكنش بيلعب بس كان كل يوم و التاني خناقه بسبب اني كنت بعرف ولاد زمان زمايل ياعني و اني خرجت 3 مرات في جروب كبير ازاي مامتك تسمح بكده و على فكره هو مش متدين ولا حاحه و كنت بتعصب كل مره و اقوا كلمه سيبني بقى انا تعبت بس هو بيفهم انها عصبيه و كنت بوصل ل انى يوغم عليا او افقد الذاكره لمده يوم مثلا و من16 يوم بالضبط بدات احس انه متغير معايا و قلتلو كده قعد يقولى لا ياعني مثلا انا لو كنت مخنوقه و بعيط و هو خارج يسيب خروجته و يقعد يكلمني و هو اصلا كان بيكلمني 24 ساعه في اليوم حتى لو مع صحابه من 16 يوم كنت مخنوقه و بعيط حاول يهديني من غير كلمه حلوه مع انه كان زمان بيقولى اهدي يا حبيبتي مش كده يا جوجو و كلام كده اليوم ده بقى بعد 15 دقيقه بالضبط قالى باي عشان صحابي الاسلوب كان متغير و كل فتره يكلمني دقيقه يسال و يقفل و لما اكلمو يقولى اقفلي انا مع صحابي مع ان زمان كان عادي فا اتعصبت لما رجع يومها كنت متعصبه و كلمتو و قلتلو في بنات اكيد او وحده تانيه حتى كلامنا في التليفون قل قالى مهو كان غلط الكلام الكتير مع اني ما كنت بقول كده كان بيولي انا كده و مش هكون غير كده بس و زي ما يكون صدق الكلمه و من يوميها و انا بكلمو كل يوم و اتحايل عليه نرجع و اه ماما كلمتو هزقتو بس بعدها كلمتو قالتلو معلش بس جهاد منظرها بقى يصعب عالكافر عياط على طول مفيش نوم ولا اكل و اغمائات و تتنقل المستشفى ولا اي حاجه و انا اتحايل و في مره اتعصبت اوي لما قالى لا شتمتو و امبارح قالى خلاص و انا انهارت و قعدت اخبط راسي في الحيطه لحد ما فقدت الوعي فا ماما كلمتو بهدلتو تاني و بعدها انا دخلت عالفيس بوك اعتزرتلو و انا عملت الفيس بوك عشان اوصلو و اعرف اخبارو بس و النهارده لقيتو ماسحني طبعا قعدت اعيط و كلمتو علمايل و قعدت اتاسفلو و اقولو جربني تاني طيب ارجعلى بس و هو يقولى انا مبقتش احس قلتلو مش هعمل حاجه تضايقك تاني يقولى حرام عليكي نفسك متعمليش كده و لو في ايميل عندك انا ممكن ابعتلك الكلام كلو بالضبط انا مش عارفه اعمل ايه تاني انا بموت خلاص انا قلت لماما نسافر اسكندريه عشان هو من هناك و بفكر اروحو تحت البيت و لما ينزل اقولو ساميحني قدام الناس كلها قوليلي اعمل ايه
اه اكيد هتسالي فين صحباتي البنات بطلت اكلمهم و غيرت نمرتي ومدتهاش لحد عشان البنات بيكلمو ولاد و بيجيبو سيرت اي حد معايا فا مينفعش اكلم حد و هما مش زيي فا مينفعش الناس تشوفهم معايا هيقوو اني زيهم و انا مش كده
_______________________
ايه دا؟!!!!!! ايه يا مشمشة دا؟؟؟؟؟؟؟؟؟؟؟؟؟؟؟
انت ازاى هانت عليكى نفسك للدرجة دى؟ انت بنت ناس و لا جارية؟ دا انا لو عندى خادمة فى البيت مش هاعمل فيها كدة
انت فين مخك؟ فين شخصيتك؟ فين ارادتك؟ فين انت اصلا؟
انت تحولت من فتاه فى مقتبل العمر الى مسخ!!! ايوة مسخ و خيال لعيل عامل فيها سبع البرمبة
من كلامك عن اهلك واضح ان انت متعودة انك تبقى تابع … ظل لاى راجل فى عيلتك
لكن اللى انا مش فاهماه .. بأى حق واحد زى دا يتحكم فيكى و يحرم عليكى عيشتك بالمنظر دا؟ و كمان بتقولى مش متدين .. ايه فى دينك قال ان واحد لا تربطك بيه اى صلة يحرم عليكى الخروج مع امك و الكلام مع صديقاتك و الحوار مع المعيدين و الرد على الزملاء …. لأ و كمان عايز يخبيكى ورا نقاب اسود علشان يلغى وجودك بقى خالص!!!!!!!!! ربنا نجاكى من بنى آدم مريض و مقرف و انا كشفت لك نقط ضعفك … اعملى بقى اللى عقلك يشور عليكى بيه و ماتجيش تشتكى بعد كدة
