انا انسه عندى 24 سنه وبشتغل مدرسه فى مدرسه لغات ومن شهرين ونص كان اول شغلى واتعرفت على مدرس زميلى فى المدرسه المهم بعد شهر من استلامى الشغل لقيته فتحنى فى موضوع ارتباط بصراحه انا متوقعتش منه انه ممكن يكون اعجب بيه وبصراحه انا كمان كنت معجبه بيه
بس اول معرفت انه متجوز وله بنت شلته من دماغى على طول
المهم شرحلى ظروفه ايه ظروفه بقى اولا هو وقت مافتحنى فى الموضوع قالى انه منفصل عن مراته من حوالى سنه وعنده طفله منها وانهم متفقين على الطلاق وده هيتم بعد شهر من تاريخ ماكلمنى فى الموضوع وان علاقته بيها طيبه وانه دايما بيكلمها علشان يطمن على بنته وانها اكتر من مره تشجعه بأنه يرتبط بغيرها المهم انا فى كلامى معاه قلتله ايه
المطلوب منى دلوقتى قالى انك تصبرى شهر لحد مالامور تظبط المهم فى الفتره دى لقيت كل اللى بتمناه فى الراجل اللى عاوزه ارتبط بيه معاه واكتر واللى حببنى فيه اكتر انه كان بيخاف عليه من نفسه وكان محترم جدا جدا معايا ومش عارفه ليه دونا عن كل اللى عرفتهم اتعلقت بيه هو
المهم اول ماخلص الشهر فوجئت انه بيقولى فى يوم انا روحت البيت لقيت مراتى رجعت البيت وقالتلى انا مش عاوزاك تتطلقنى وبدون اى مقدمات قلتله هى عرفت انك هترتبط بغيرها قالى اه انا للأسف قلتلها ولقيته فى اليوم اللى هى رجعت فيه نزل من بيته
وكلمنى وقالى انا مش عارف اعمل ايه ياريتك تقدرى وتقفى جنبى انا والله ناوى معاكى خير بصراحه يامروه انا بعد كلامه معايا يومها انهرت مبقيتش عارفه اعمل ايه ولا انا كده موقفى ايه ورفضت انى استمر بوضعه ده بعد مامراته رجعتله ورفضت انها تطلق منه
بصراحه يامروه انا بحبه قوى ومش عارفه ليه هو بالذات اللى حبيته برغم ظروفه الوحشه الكتير دى انا بموقفى منه ده ابقى غلطانه وانى ضيعت منى اغلى حب انا يامروه مش عاوزه اجور على حق حد وهى برضه اولى بيه منى هو بيتهمنى انى مبحبوش لانى بسهوله سيبته بس والله هو برضه لو مش عاوزها ممكن يطلقها بدون موافقتها برضه مش عارفه ايه سر تمسكه بانها تكون راضيه عن فكره الانفصال منه ردى عليه يامروه ووجهينى للصح الله يخليكى
