عزيزتى مروه لا اعرف من اين ابدأ انا متزوجه من 18 سنه جواز عادى صالونات لاكن الحب جه على طول فى فتره الخطوبه وعندى 3 اولاد اكبرهم 17سنه واصغرهم 6 سنين وعلاقتى بجوزى كويسه جدا ومفيش مشاكل الا المشاكل العاديه اللى بتحصل فى اى بيت المهم جه يوم ووالدتى تعبت وروحنا بيها المستشفى وكانت هناك مفاجئه القدر ليا وهى واحده كان يعرفها جوزى قبل جوازنا يعنى معرفه تسالى ممكن تقولى
وهى زمان كانت بتحاول ترسم عليه بس اهله هو مرضوش بيها وخلاص الموضوع انتهى واتجوزنا لاكن لما شافها هناك وهى مكان شغلها فى المستشفى معرفش ايه اللى حصله هى اول ما شفته لزقت فيه واخذت منه كارته الخاص بحجه انها عاوزه تساله عن حجات فى شغله انا عارفه انه لو كان مش عاوز يديها الكارت كان ممكن ميدهاش بس ده اللى هو عمله ومن ساعتها بدأ الجحيم
مع العلم ان جوزى محترم جدا وبيصلى الفرض فى الجامع وعامل عمره وحج وبيخاف ربنا بس معرفش ايه اللى حصل من ساعه ما شفها المهم انا مكتشفتش اى حاجه من دى الا بعدها بكام شهر لما لقيت تليفوناته كترت اوى وبدأ يتوشوش وهو بيتكلم ولما واجهته حكالى وقالى انا معرفش انا عملت كده ازاى ودى غالطه وهى اصلا مش محترمه لانها متجوزه وعندها عيال بس هى اللى بتلحقنى وبتقعد تقولى انها مش قادره تنسانى وانها عاوزه تتطلق من جوزها علشانى وكلام قليل الادب كتير
وهو اللى بيحكيلى وبيقول عليها انها مش محترمه وطبعا كان سؤالى طيب لما انت عارف كده ليه مستمر ليه بتكلمها يقولى مش عارف هى اللى بتلاحقنى بس خلاص انا هبعد وطبعا انا حاولت اصدقه ولاكن مفيش شهر واكتشفت انه لسه على علاقه بيها انا ساعتها واجهته وتعبت وجالى شبه شلل وجه اهلى واهله وعرفوا الموضوع وامه قالتلوا انتى كده بتغضب ربنا وعندك بنت ومراتك زى الفل وتبقى ولا ابنى ولا اعرفك لو لسه بتكلمها واهلى وقفوله وحلف انه مش هيكلمها تانى
وخلاص بس بقالى سنه عايشه فى الجحيم ده وطبعا مقولتش حاجه لاهلى تانى علشان مصغروش ادمهم وعلشان والدتى ست كبيره مش حمل زعل اعمل ايه مع العلم ان جوزها عرف انها بتكلم واحد تعب وجاله جلطه وساعتها جوزى تعب اوى وضميره انبه وقعد مكتئب ويدعى ربنا انه يخلصه منها ومفيش يا مروه اول ما جوزها خف رجعت تحاصر جوزى تانى
وهو ضعف ادامها هى عامله زى الاخطابوط مش عارفه اعمل ايه فكرت اكلم جوزها اقوله بس هى كده ممكن تطلق وتفضى لجوزى خالص طيب انا برضه مش هعرف اكلمها لانها انسانه مش محترمه ومش هعرف اتعامل معاها طيب اعمل ايه وانا عارفه ان الحل كله فى ايد جوزى انه هو اللى يوقفها عند حدها وهى معرفش ايه الضعف ده وعدم الاراده مش عارفه اعمل ايه انا تعبت وجالى الضغط وهو بيقولى انتى اللى بيتهيئلك ولو تعبتى مش هتلاقى حد يخدمك مروه دى اخرت الاخلاص والحب والعشره ولا ايه؟مع العلم انى بحاول اخده براحه وزودت جرعه الحب والحنان معاه وعمرى ما قولتله لا على حقوقه الشرعيه حتى لو انا مش عاوزه يعنى اعمل ايه تانى ؟!
