السلام عليكم ازيك يا مروه ؟ مشكلتي هي اني ارتبطت بابن خالتي من 5 سنين الاول احنا ماكنش لينا اي علاقه ببعض عشان هو منفصل عن العيله تماما عشان باباه ومامته منفصلين ومامته متجوزة وهو مقاطعها وعايش مع باباه ومرات باباه وابنهم الصغير صادفت اننا اتكلمنا عل التليفون مره واول ما اتكلمنا حسيت انه حد مختلف عن الصورة السيئه اللي كنت رسمهالو فهو بيشرب حشيش وله علاقات غير شرعيه وغير بار بمامته وبيعاملها وحش اوي بس لقيته حد كويس وهو بيعمل كده لكن بسبب الظروف الللي مر بيها من انفصال باباه وماماته وجواز الاتنين من حد تاني وتفضيل والده لمراته وابنه التاني عليه المهم حبينا بعض وطلب يتقدملي لكن انا رفضت لاني كنت لسه في اولي جامعه وبعدين جاتله فتره اتغير فجاه بعد شهر واحد من ارتباطنا وسابني وقالي انه مش قادر يكمل معايا من كتر مانا كويسه وحترمه وانه بيبقي عايز يعمل حاجات مع البنت اللي معاه زي ما متعود فاما انه يعمل كده معايا او يخوني والاتنين مستحيل فاختار انه يسيبني عشان ميظلمنيش بس قالي انه بيحبني اوي ويوم مهيفكر يتجوز مش هيتجوز غيري فضلنا كده 3 سنين كنت بكلمه كتير في اطار القرابه وكان بيجرحني كتير بانه يحكيلي عن صاحباته البنات اللي بيكلمهم ومكنش بيعمل اي اعتبار لمشاعري وانا كنت بحبه ومش قادره ابعد عنه فاخدت قرار اني ابعد عنه خالص وكنت هتخطب لواحد تاني لكن الموضوع باظ وبعدها لقيته بيكلمني وكنت فاكراه عرف موضوع العريس لكن اكتشفت ان ده مش صح وانه كان متكلم عادي وعايز يرجع ودي كانت اول مره تحصل من 4 سنين لكن هو ظروفه اتحسنت وجاتله فرصة سفر بره ورجعنا لبعض لكن بعدها فرصة السفر باظت واعدنا مع بعض 8 شهور من غير خطوبه لكن الاهل عارفين وبندور علي شقه وكان بيعاملني حلو وبيحاول يعوضني عن اللي فات لكن رجع اتغير تاني ويقول انه مخنوق وعنده مشاكل ويعاملني وحض لحد لما انا اللي زهقت وسيبته لكن كالعاده مقدرتش ابعد عنه فرجعت تاني وبتكلم بنفس طريقه الارتباط لكن مفيش منه اي مقابل فسبته تاني ودلوقتي اتقدملي عريس فكلمت ابن خالتي هزقته علي كل حاجه واني ممكن اتجوز غيره لو ما اخدش خطوه وهو قالي انه بيحبني ومش هيسبني لغيره وطلب مني اديله يومين يتكلم مع باباه ودلوقتي بقالي 20 يوم معرفش عنه حاجه انا بقي مش عارفه اعمل ايه ومش عارفه افسر موقفه ازاي معقوله بقاله 5 سنين بيضحك عليا؟؟؟ ولا هو مش موزون نفسيا عشان الظروف اللي مر بيها ومتعقد من الجواز ولا ايه ؟؟ انا بحبه اوي ومش قادره اشيله من دماغي وحاسه اني مينفعش اكلمه بعد اخر مكالمه مع العلم ان موضوع العريس باظ فمش عارفه اعمل ايه؟؟
_________________________________________
