ازيك يا مروة معلش انا عايزة احكيلك موضوع يوخصنى وعندى احساس الموضوع دة ممكن يضايقنى عمرى كلة بس يا ريت تفيدينى ويرجعلى احساسى بثقة النفس.انا عندى 23 سنة اتجوزت من سنة تقريبا بس انفصلت بعد جوازى 6 شهور لانة كان عندة مشكلة وياريت تكونى فهمانى المشكلة دية طبعا ملهاش علاج لان كان عندة ضعف جنسى طبعا انا لسة بنت لانى روحت وكشفت ودة كلام الدكتورة
انا مش عايزة اطول عليكى طبعا انا اول ما اتجوزت مكونتش فهمة اى حاجة عن الجواز لان ان تربيتى فل بيت عيب اننا نتكلم فل مواضيع دية المهم جاتلى فرصة شغل ومن كلام اصحابى عرفت ان حياتى فيها حاجة غلط وكمان هو كان بيعمل تصرفات اكدتلى كل حاجة لانة مثلا كان بينام فى عرفة لوحدة و سوء معاملة وحجات كتيرة كدةالمهم اهلى عرفو الموضوع و تم الانفصال لان الحياة مكنتش نفعة خالص انا دلوقتى حاسة ان حياتى مدمرة من الموضوع دة انالسة صغيرة عندى احساس انى مش هعرف ارتبط بحد خالص من ظروفى وفعلا انا فى شاب كويس جدا عايز يرتبط بيا و مكسوفة اوى احكيلو الطروف بتاعتى لدرجة بقول اسيبو اهون من انى احكيلو اى حاجة بخاف يسبنى علشان ظروفى حتى هو لو اتمسك بيا ممكن اهلو ميوفقوش علشان ظروفى ال حصلتلى معلش انا طولت عليكبى بس يا ريت تقوليلى اعمل ايةلانى خايفة للانى علشان فكرة كونت متجوزة قوليلى اعمل اة علشان عندى احساس ان ا لموضوع دة يهيضايقنى عمرى كلة قولي اعمل اة لو سمحتى علشان حاسة انى تايهة
________________________________________________________
انا فضلت باصة لرسالتك و مش قادرة احدد احساسى
جزء منى متضايق من اهلك و الاهل اللى زيهم و الشباب اللى هيتجوزوا و يربوا اولادهم بنفس الطريقة اللى اهلك ربوكى بيها … أدى اخرة التقفيل و الجهل
و جزء منى متضايق منك انت شخصيا و من كل ولد و بنت بيقدم على الجواز من غير ما يثقف نفسه .. انا مش باتكلم بس جنسيا .. انا باتكلم فى كل نواحى الحياة الزوجية .. ازاى ما جيبتيش كتاب و لا روحتى لدكتور و لا دوكتورة يشرحولك مين فين؟
ما علينا … انت خلاص اتطلفنى الحمد لله
قدامك اختيارين
اولا ممكن تعيشى ال 50 سنى الجاية من حياتك مكتئبة و وحيدة علشان 6 شهور صعبة مريتى بيهم
أو
ثانيا ممكن تتعلمى من الدروس المستفادة من التجربة علشان تطلعى منها انسانة اقوى و زوجة افضل و ام اعظم و بعدين تبصى لقدام و تستمتعى بحياتك لانك ما خسرتيش حاجة
اهم حاجة بقة ثقتك بنفسك و نظرتك لذاتك
يعنى لو هتبصى لنفسك على انك فازة مشروخة الناس هتعاملك على انك سلعة معيوبة
و لو هتقدمى اعتذارات هتتعاملى كأنك مذنبة
و لو ارتبطى بواحد مكسوف منك يبقى قلته احسن
و لو ارتبطى بواحد اهله رافضينك يبقى برضه قلته احسن
كرامتك سلاحك و اعتزازك بنفسك تاجك و لو طاطيتى و انحنيتى هتعيشى مذلولة
