عزيزتي مروة
أنا اتفرجت عليكي في برامج كتير بس أول مرة اكتب لك بس يا رب تحليلي مشكلتي
انا اتعرفت من حوالي سنة ونص على شاب من الانترنت من أحد مواقع التعارف وهو كان مطلق واحدة من حوالي سنة بعد زواج دام شهر واحد بس وكان السب زي ما قال ان عندها عيب خلقي وانه من الواضح انه كان حاطط عينه على فلوسها عشان هي كانت غنية جدان، المهم اتعرفت عليه وقربنا لبعض وابتديت اتشد له جدا لأن كان دمه خفيف جدان وكنت اول مرة في حياتي اتعرف على واحد وارتبط بيه، بعد شويه ابتديت الاحظ انه عصبي جدان وفي مرة من خناقتنا شتمني بلفظ قذر جدان وخصمته فترة طويلة لكنه رجع واعتذر لي وقعدنا كده كتير في خناقات وصلح لحد ما يوم قررت اني اسيبه خلاص لأني مش مقتنعة بيه ولأني حتى لو باحبه ماينعفش اتجوزه لأنه عصبي أوي وتعاملاته صعبة جدان.
بعد كده بفترة قصيرة جدان اتقدم لي شاب كان متقدم لي من حوالي 5 سنين وكانت حصلت مشاكل قبل كده بس لما اتقدم تاني حسيت اني منجذب له وتمت الخطوبة بسرعة أوي ومن غير مشاكل وقعدنا شهرين في خطوبة تقليدية جدان يزورني كل يوم جمعة ويكلمني في التليفون كذا مرة في اليوم بس ماكنتش باحس ان فيه حاجات مشتركة بيننا كتير كنت دايمان باقارن بينه وبين الولد اللي انا كنت عارفاه لحد مالقيت نفسي في يوم مش طايقاه وحاسه اني محتاجة أرجع للأولاني فابتديت اعامله معامله سيئة واضغط عليه أوي لحد ما لقيته مابقاش ييجي حتى يوم الجمعة وبيقول انه عنده مشاكل في الشغل جامدة جدان، المهم انا صبرت عليه حوالي شهر وبعدين بعت له رسالة فيها كلام جارح جدان ليه وطلبت فيها اني افسخ الخطوبة عشان هو مابيعرفش يعامل بنات الناس، وكنت معتبرة نفسي خلاص لغيت الخطوبة دي ورجعت اكلم الأولاني خلال الشهر ده وابتدى يشجعني على فسخ الخطوبة عشان يتقدم لي، وكان متحمس جدان أنه يتقدم خصوصان انه كان هايسافر بعد فترة قصيرة وبعد شوية من المكالمات والتعاملات لقيته فعلان ماينفعش خاااالص وخاصة انه كان بيهددني انه هيأذيني ويأذي أسرتي، أنا واثقة انه مايقدرش يعمل حاجة بس خلاص لقيت نفسي مش قادرة اكمل مع الشخصية دي.
فقررت أرجع لخطيبي، وانا دلوقتي باحاول أصلح الموضوع معاه بس هو لسه بيقول انه عنده مشاكل في الشغل واتكلمت مع أخوه وقاللي برده أنه عنده مشاكل في الشغل، أنا عايزه أرجع لخطيبي وأصلح الموضوع معاه لأني دلوقتي واثقة أن هو ده الشخص اللي أنا عايزه أكمل معاه، أنا حكمت قلبي وعقلي المره دي ولقيت أن ده الاختيار الصح، بس المشكلة أني مش عارفه دلوقتي أعمل معاه ايه، أنا مش عارفه اوصله، مش عارفة أقابله، مش بيكلمني وانا بابعت له ماسج كل يوم عشان أشجعه في وسط المشاكل اللي عنده بس هو مش بيرد على رسايلي، وآخر مرة اتكمنا من أربع أيام ، كلمته وكان برده في الشغل وكانت مكالمة قصيرة عشان كان لسه عنده مشاكل.
رأيك أعمل ايه بقى عشان أصلح الأوضاع معاه؟؟؟؟
وخاصة أن أحد مشاكل شخصية خطيبي أنه مش بيحب يتكلم عن مشاكله خالص أو يتكلم معايا عن حاجات مضايقاه حتى لو كن مضايق مني ودي بتخلي تعاملي معاه صعب
_________________________________________
