اولا السلام عليكم ورحمة الله وبركاته
انا مش عارفه اذا كنتي هتتمي برسالتي ولا لأ
عمري 32 سنه
رغم ان تعاملاتي مع الناس كتيرة ويوميه ومتنوعه في طبقات مختلفة من الناس الا اني عمري ما دخلت في علاقة عاطفيه من اي نوع مع اي شاب العلاقات كلها كانت في نطاق الزماله واحيانا صداقه بس
عمري ما حد جه في يوم قالي بحبك او انا عايز ارتبط بيكي ولحد ما ده اثر على ثقتي بنفسي في الموضوع ده
رغم اني بشهاده معظم الناس محبوبه وجميله ولبقه في التعامل ويشهادتي لنفسي بعتبر نفسي انسانه عاقله بفكر في اي قرار كويس وباخد القرار الصح
لحد هنا مفيش مشكله بس نظرا لاني حاسه ان في حاجه ناقصاني فكونت صداقات من على النت او بالاصح دخلت في النت ادور على حد يحبني وللاسف حصل
الموضوع بدأ بصداقه عاديه وبعد كده صداقه اقوى كنا بنتكلم على النت كل يوم تقريبا طول اليوم
لحد ما حسيت في يوم انه متغير ولما سالته قالي انه بيحبني حاولت ابعد معرفتش حاولت نفضل اصدقاء ما نفعش ودلوقت هو بيفكر في الجواز مني وهو تقريبا انسان فيه كل اللي اتمنيته بس متجوز وعنده اطفال وعشان كده انا مش قادرة اوافق
طول عمري بشوف اللي بيتجوز على مراته شخص خاين وبشوف الست اللي ترضى تكون زوجه تانيه خاينه حراميه اخدت راجل من بيته ومراته
دلوقتي انا اللي بقيت في الموقف ده
احنا من اول ما كنا اصدقاء وهو بيحكي لي انه كان بيحب واحده وخطبها والقصه ما كملتش وان مراته ما عوضتش احساسه بالحب اللي كان عايش فيه
طبعا انا عارفه انك هتقولي ابعدي بس صدقيني بحاول وبفشل
في الاول كنت مقتنعه اني هاقدر اسيطر على نفسي وقت ما اقرر ابعد هاعرف واني كنت شايفه الموضوع عندي تعود او احتياج للحب مش حب
بس دلوقتي مش عارفه اعمل ايه وانا عرفته اني عمري ما هاقدر اكون الزوجه التانيه ولا مرات الاب
بس دلوقتي لان هو مش بيساعدني ابعد مش عارفه ابعد
حاولنا ناخد فرار البعد ده النهارده بس ماعرفناش لقيته بينهار وانا كمان
كل اللي قدرنا نعمله اننا ناجل فكرة الجواز وناجل الكلام فيها
وعلى فكرة انا عارفه ان اهلي مش هيوافقو عليه بظروف جوازه ده
بس احيانا برجع افكر ايه المشكله اني اتجوز واحد يكون لي نص الوقت بدل مانا طول الوقت لوحدي
و مش يمكن اكون عندي مشكله في الانجاب واضطر برده اتجوز واحد متجوز وعنده ولاد فيكون اللي بيحبني احسن
وبفكر طيب عشان كلام الناس بس الناس على طول بتتكلم وهما عملولي ايه وانا لوحدي
انا بحاول احكي ليك كل اللي جوايا يمكن تقدري تساعديني
هو برده مش عايز يتخلى عن مراته واولاده وان لو هي طلبت الطلاق هو هيرفض وانه مش شايف فيها عيب غير انها مش ماليه فراغه العاطفي
ساعديني لو سمحتي
بس عايزه الكلام بينا يكون عن طريق الايميل ما تعرضيش مشكلتي في السيت بتاعك
شكرا
______________________________
