مش عارفة حاجة فى اى حاجة

السلام عليكم ورحمة الله وبركاته…
اااااه يا مروة لو تعرفى انا أد ايه محتاجة رأيك…انا بجد تعبانة ومش عارفة اعيش…بجد …انا حتى مش عارفة اكتبلك ايه مشكلتى؟ مشكلتى باختصار انى "مش عارفة حاجة فى اى حاجة"فعلا دايما محتارة ومتردده وقلقانة.
انا زمان كنت بنت كل المؤشرات بتقول انها شخصية -محترمة-مؤدبة -اصحابى بيلجأوا لى فى حاجات كتير – عاقلة-متفوقة دراسيا …..كل ده كان لغاية ثانوية عامة-بدأت مشكلتى تظهر لما لقيت نفسى مش عايزة كليه معينة ومش حابة مادة معينة ولا مجال معين مش عارفة انا عايزة ايه؟اخويا الكبير قاللى هاتى بس المجموع وبعدين فكرى المهم جبت مجموع يؤهلنى لكلية مرموقة فى الصعيد(انا من اسكندرية)وفعلا رحت وبعد يوم واحد كتبت طلب تحويل فجأة وقررت دخول اى كلية والسلام المهم فى اسكندرية ودى -للاسف-كانت نقطة التحول فى حياتى دخلت كلية التربية على اساس انى مدخلتش الكلية اللى بحبها يبقى ادخل كلية تشغلنى وتجيب لى فلوس ومن ساعتها وانا عرفت معنى التخبط فى اتخاذ القرارات والندم -دخلت الكلية بكرهها وبكره كل حاجة فيها حتى المدرجات وقضيت اسوأ ايام حياتى فى الكلية وخرجت مش ناوية اشتغل بيها وقعدت فى البيت سنتين لغاية ما زهقت نزلت اشتغلت مدرسة(وانا حاسة انى مقهورة)وقضيت 3 سنين شغل حاسة فيهم بالقهر والاحباط(اسفة للاطالة بس انا بجد متلخبطة)وفجأة سيبت الشغل بعد ما اثبت نفسى فيه وقلت ده مش طموحى ؛اشتغلت سكرتيرة سنة وكنت ناجحة (هما اللى بيقولوا)وسيبته وقلت ده مش طموحى؛اخيرا اخدت كورسات كمبيوتر وقلت هو ده المجال اللى بحبه لقيت نفسى مش قادرة اعمل فيه اى نجاح مش قادرة اقعد واذاكر اى برنامج واتفوق فيه قلت ياااه حتى ده مش طموحى ؟؟؟ طيب انا ايه طموحى ؟؟؟انا مش عارفة .
حتى على المستوى العاطفى عمرى ما حبيت ..ولا اتحبيت وكل ما اروح اشوف عريس فى قعدة صالونات انا اللى بترفض لغاية ما خلاص مبقاش عندى ثقة فى نفسى ب0%مهما حاولوا اللى حواليا يأكدوا لى انى شكلى كويس.
هى دى مشكلتى ….بقيت مش عارفة اى حاجة فى اى حاجة … مفيش ثقة فى شكلى ولا تفكيرى انا ساعات بسأل اصحابى( تفتكرى انا ممكن اشتغل ايه؟) (هو انا محترمة ولا معقدة؟)(كونى معرفتش اعلق حد-زى ما بيقولو لى-واتجوزه ده احترام ولا عبط؟) انا عندى 29 سنة والوحدة والفراغ هيقتلونى….خلاص هتجنن…نفسى افرح..نفسى احس بالنجاح.. عايزة يبقى ليا كيان …نفسى اعرف انا عايزة ايه؟
انا خلاص مبقيتش بثق فى نفسى ولا تفكيرى ولا اى حاجة بعملها كل اللى بعمله انى باكل وازيد فى الوزن واتضايق اكتر…والصبح ابقى مش عايزة اصحى من النوم..اصحى ليه؟رحت لطبيب نفسى حالتى اتدهورت اكتر..قوليلى اعمل ايه؟انا حاسة انى متنحة مش فاهمة حاجة انا عايزة ايه؟امشى فى انهى طريق؟اعمل ايه فى حياتى اللى حاسة انها بتضيع منى؟
ارجوكى يا مروة تردى عليا انا تعبانة اوى ومش عارفة مين يدلنى على الصح…
والسلام عليكم ورحمة الله وبركاته

_____________________________

اهلا يا مشمشة

اللى حصل لك لما سافرتى الصعيد هو اللى بيحصل لأى حد فى الغربة .. شعور بالغربة و عدم القدرة على التأقلم .. عزلة و وحدة و خوف .. و دا اللى رجعك … اغلب الناس بتتاقلم من 3 الى 6 شهور سواء ان كان تألم على شغل جديد او بيت جديد او مدينة جديدة

اما بقى عن موضوع الكلية … وارد جدا ان الواحد يدخل كليه غلط و فى ناس بتلاقى صعوبة فى التأقلم على جو الجامعة بالمقارنة بالمدرسة … انت فى مدرستك كان زمايلك او زميلاتك من مستوى اجتماعى متقارب … ساكنين فى نفس المنطقة او قريب … الاهل شبه بعض … لكن فى الجامعة انت عندك ناس من كل مكان و من كل خلفية

احنا مش هنعرف نرجع ايام الجامعة و نصلحها

لكن ممكن نعالج اللى حصل بسببها

حياتك مش هتقف الا بموتك و من هنا لحد وقته الاختيار ليكى … يا تعيشى سعيدة يا تعيشى ميته

انت ممكن تخلى جامعة مفتوحة و تدرسى اى مجال يستهويكى او تاخدى كورسات متنوعة فى مجالات متعددة

طيب تختارى ازاى؟

احنا دلوقتى ربنا انعم علينا بالانترنت … يعنى اى مجال ممكن تقرى عنه مقلات و مقالات من مختلف بلاد العالم

انت كمان ممكن ترجعى لمجالك الاصلى بس بنظرة متطورة .. يعنى انت فى الكلية درستى المبادئ و الطرق القديمة فى التدريس ..ممكن بقى دلوقتى تبحثى على النت عن الطرق الحديثة و الاكتشافات الجديدة فى علم نفس الطفل .. انت اصلا ممكن تتخصصى فى مجال محدد زى الاطفال اللى عندهم توحد او اعاقات ذهنية او عدم القدرة على التركيز او اى مرض اخر و تبقى هى دى نقطة تميزك عن اى مدرس تانى

و ممكن تخلى فى اسلوب تدريسك دراستك و حبل للكمبيوتر

من الاخر ما ترميش حاجة .. كل تجارب الانسان اتوجدت علشان يتعلم منها و يستغلها

اما بقى موضوع العرسان .. فدا امر متوقع … مين عايز يتجوز واحدة عندها 29 سنة و روحها روح عجوز تنتظر الموت؟ مين عايز واحدة مكتئبة مين عايز واحدة مش بتضوى و مطفية؟

انا مش قصدى اكون قاسية عليكى .. انا عايزاكى تلحقى نفسك قبل ما تتطفى خالص و وقتها كل الابواب هتتقفل فى وشك