بيتنا مش نضيف و ماما مهملة و بابا كبر دماغه مننا

انا معجب جدا بيكى وبارئك الى معظمها بيبقى الاصح وعشان كده هعرض عليكى مشكله من مشاكلى الى مش عارف اعمل فيها ايه
من البدايه انا مشمش عندى 22 سنه فى طالع سنه 4 معهد التعاون اكيد مش عارفه لانه مش موجود على الخريطه اصلا
المهم
مشكلتى فى بيتنا مش بره البيت
هى ماما وااخواتى
انا مولود فى السعوديه وعشت هناك 6 سنيين ومن ساهت ما اتولدت فى مشاكل بين ماما وبابا ومش هقولك بقى على الاهل وعميلهم سواء من ناحيه بابا او ماما
ونزلنا مصر انا و ماما واخواتى الصغيريين لانى كبيرهم بس من ماما وفى ليا اخ كبير من ام تانيه باب طلقها وكاننوا هيرجعوا لبعض بس اتوفت ولما كان هيرجع لها كانت ماما مراته برضه
المهم نزلنا والمشاكل زادت لتدخل الاهل اهل بابا مش طايققين اهل ماما وكده بقى وكله بيسخن بعضه ومش امهم العيال لدرجه انى جت فتره مشوفتش بابا 5 سنيين وهو فى السعوديه الفتره ديه كانت ازبل فتره فى حياتى لانى كنت سايع بجد وسقطت فى ثانويه عامه والمهم بابا نزل وانا فى 2 ثانوى وكنت بعدها وكنت بحبه قوى وكان بيشجعنى على المذاكره ومكنش حد مصدق انى انجح ونجحت و3 ثانوى شديت حيلىالمهم لما بابا نزل كان عندنا شقه تانيه فى نفس المنطقه وهى تمليك مش ايجار وكان موضبها احسن توضيب واحنا ساكنين فى عين شمس المهم روحنا قعدنا معاه فى الشقه التانيه انا واخواتى كلهم ما عدا اخويا الصغير لانه معوق ذهنيا كانت ماما بترعاهوعلاقتى بماما كانت مش ولا بد حتى وانا عايش معاه اللمهم بابا قعد فى مصر 4 سنين وكانت المشاكل من كل ناحيه منى ومن اخواتى ومن ماما و هو مش عارف يتاقلم مع الوضع فى مصر وعايز يسافر تانى لغايه لما حالته النفسيه بقت زفت واتوفى بالكانسر فى الصدر المهم دلوقتى انا عايش مع ماما انا واخواتى فى شقه واحده ومش عارفيين نتاقلم على الوضع او انا الى شايف كده كل واحد عايش بدماغه الى تريحه ومفيش تعاون اسرى بينا خالص ومفيش حد بيخاف على التانى والخ…………. المشكله الكبيره دلوقتى مش ديه وبس
ماما
مش بتهتم بنفسها خالص ولا بالشقه خالص ومش هقولك بقى المنظر بتاع الشقه بقى عامل ازاى ومظهرها هى عامل ازاى وانا مش بحب كده وديه مشكله كبيره قوى عندى وهى ملهاش دعوى باى حاجه غير انها تروح الشغل وتيجى تعمل الاكل وتاكلنا وتاكل اخويا المعوق لما يجى من المدرسه وبس ممكن تغسل المواعيين وبس خلصت على كده وبتصرف علينا بجانب الى بيجى من المشروع الصغير الى كان بابا الله يرحمه عامله وبس ومفيش طبعا بينا لغه حوار الى عايز حاجه من التانى لازم يعمل مشكله ويزعق وكده واخويا الصغير زيها كده ياكل ويسيب مكان ما اكل ويلبس الجذمه ويلف بيها فى الشقه وطبعا الشقه بقت عامله زى الشارع تقريبا ومبقتش قادر اوفق بين الشغل والدراسه وانى ارجع انظف انا فى الشقه ومن عدم ثقتى فيها بقييت انا الى اغسل هدومى بنفسى ومبقتش عارف هل ديه حياه شاب فى سنى ونفسى اخرج وبخرج بس ساعات مبلقيش وقت خالص ولو حصل انى عايز اخطب وجم اهل خطيبتى عندى البيت هعمل ايه مش عارف قخويا الصغير بيقول لما تيجى تخطب نبقى نجييب حد ينظفها وفى بنت بتيجى تنظف الشقه كل اسبوع بس الى هيا بتعمله عاجب ماما ومش عاجبنى بتمسح وتكنس وخلاص ومش الشقه كلها كمان ومبقتش عارف اعمل ايه انا حاسس ان ديه مش مشطله واحده طبعا و حاسس انى ممكن ابقى زيهم كده ونفسى فى حل ممكن بس بسرعه بجد

وانا اسف قوى انى طولت عليكى وخدت من وقتك كتييير كده

والسلام عليكم ورحمه الله وبركاته

____________________________________________

شوف بقى … انت قلت لى ان انت واثق فيا و فى رأيى … يبقى انا عايزاك تقرا ردى للأخر و تفكر فيه كويس

مامتك صعبانة عليا أخر حاجة
انت بتتكلم على ست عاشت فى الغربة و مهما كان المستوى المعيشى فالغربة برده تأثيرها بشع على النفس … من وحدة لحنين لاكتئاب لعدم أمان

و حياتها الزوجية كانت كلها مشاكل بغض النظر عن مين السبب … المهم كانت حياة صعبة و زوجة تانية و مشاكل مع الزوج و مع اهل الزوج .. يعنى بهدلة و نكد

و بعدين هى بقت هنا معاك انت و اخواتك و والدك هناك … دا حمل يقسم الظهر و مسؤوليه مرعبة و من كلامك انت كنت صايع و الله اعلم اخواتك وروها ايه

غير دا ودا فى اخوك المعاق ذهنيا .. يعنى طفل عمره ما بيكبر و مسؤوليته مرهقة و التفكير فى مستقبله و حاله لو هى جرالها حاجة كابوس مرعب

و بعدين وفاه جوزها .. مهما كانت المشاكل اللى بينهم بس اهو كان شايل معها

من الأخر الست دى القطر عدى عليها رايح جاى … و أولادها لا حاسين و لا مقدرين و لا متعاونين و شايفة القرف و النكران فى عينيهم … عايز يبقى شكلها ايه؟

و على الرغم من كل دا .. بتطبخ و تشتغل و تدير المشروع و بتجيب واحدة تنضف … انا … و انا قاعدة فى التكييف أهو تعبت لها

فى مثل يا مشمش بيقول

never judge a man or a woman before walking a mile in his or her shoes

يعنى ما تحكمش على حد قبل ما تحط نفسك مكانه و تعيش حياته

لو غيرت نظرتك لأمك …انت هترتاح و هى هترتاح

أما موضوع الخطوبة و الكلام دا .. البنت اللى تستعر من اهلك ما تلزمكش و اللى تقرف من بيتك بناقصها