ازيك يا مروه
اولا انا عايز اقولك شكرا على كل الى انت بتعمليه علشان الناس والقراء بتوعك
انا بحس ان انت فعلا عايزه تساعدى الناس و مش لاى غرض تانى و حكاية تسجيل حل المشاكل دى اكبر دليل على كده
على فكره يا مروه دى حاجه جميلة جدا ، ربنا انشاء الله هايجزيكى ثواب كبير عليها
انا قررت ان انا اكتبلك لانى انا فعلا تعبان قوى و حاسس ان انا بجد هموت من الزعل
الوقت الى بكتب فيه الرساله دى ، انا مقدرش اوصفلك الحاله الى انا فيها دلوقتى من كتر الضيق
انا عايز اقولك ان انا قريت و سمعت كل السيت بتاعك و كل حلقات البرامج بتاعتك و مش عارف استريح
انا بشتغل فى شركة كبيرة فى مصر و عندى 32 سنة
انا اتعرفت على بنت من حوالى سنتين ، اول ما اتعرفنا انا مكنش عاجنى شكلها
و بعدين انا طلبت ان اشوفها تانى ، انا كنت عايز اقضى وقت كويس معاها و خلاص و هى كانت رسمه على جواز
بس انا قلتلها انا مش بتاع جواز و كنت صريح معاها من اول يوم و هى ردت ان انا لما هاقعد معاها فترة طويله هاحبها
ملحوظه: يا ريت يا مروه ردك مايبقاش فيه تحديد لمين الغلطان و مين عمل ايه و ما عملش ايه
انا عارف قبل ما تقولى ان انا غلطان
لكن المهم الوقت الى احنا فيه دلوقتى
المهم قعدنا مع بعض لمده سنه وكنا بننزل كل يوم و هى كانت بتحبنى قوى
المشكله ان انا حسيت بحاجات ناحيتها جامده جدا
فى الاول ما كنتش عارف افسر انا عايز منها ايه
متقوليش ان هو كان مجرد تعود و خلاص لانه مكنش كده
انا كنت عايز مصلحتها و كنت بحبلها الخير و كنت عايز افضل معاها علطول
و هى حسستنى بحاجات جميله قوى وانا كنت بابقى مبسوط جدا جدا و انا معاها
و تحول شعورى لها من مجرد خروجات لحاجه اكبر بكتير
بعد كده فكرت طيب انا كده بضرها و بضيعلها سنين حياتها ، ليه اعمل فيها كده و انا بحبها
فقررت ان انا اسيبها ، هى جت فى مره قالتلى زى كل مره انا عايزه اعرف انت هاتعمل ايه فى موضوع الجواز
فقولتلها انا مش بتاع جواز و احنا نفترق عن بعض احسن علشان انا مش عايز اضرك — ده كان فى مار س 2008
و بعدين انا اتلهيت فى الشغل لان كان عندى شغل كتير جدا جدا و مكنش عندى وقت افكر فى حاجه تانية خالص
الشركة بتاعتى طلعتنى ماموريه علشان امسك المكتب بتاعاها بره مصر
هنا فى الغربه ابتديت اهدى ، و ابدت كل سنين حياتى تتعرض قدام عنيا
اكتشفت ان انا مكنش ليا فى الدنيا اى حد غيرها و ان هى الوحيده الى احسنت اليا ، انا مليش صحاب يا مروه خالص
يمكن يكون حظى وحش فى مسالة الصحاب ، حظى ان كلهم ماكنوش كويسين
المهم ان انا اكتشفت ان احلى لحظات عدت عليا كانت معاها
مش بس كده انا اكتشفت ان مفيش لحظات عدت فى حياتى حلوه غير كانت معاها
فكلمتها ، و هى قالتلى ان هى اتجوزت ، بس انا كلمت صاحبتها و عرفت ان هى ماتجوزتش بس بتحب واحد تانى
و متفقين على الجواز
انا لسه فى الغربه ، مش عارف اهرب من الذكريات
باشوفها فى كل حاجه حوليا و بسمع كل الكلام الى قولناه لبعض تانى فى ودانى
و لما باكل بفتكر احنا كنا بناكل ايه مع بعض
و لما بتفرج على التليفزيون بفتكر ايه الافلام الى شوفناها فى السينما مع بعض
و لما بروح المال بحس ان هى لسه ماشيه جنبى و بتكلمنى
لدرجة ان انا بقيت بابص جنبى و انا ماشى و بتخيلها جنبى
مروه ، انا سمعت رايك ان مفيش حاجه اسمها مش هاحب تانى
و ان الدنبا ما خلصتش لما سالتى ليه اغانى الفراق و الهجر عليها اكبر اقبال
وليه الناس بتحب تعيش فى دور الضحية
انا عارف كل الكلام ده
بس المساله مش كده
مش مسالة واحد زعلان علشان فراق حبيبه
انا بجد حاسس ان انا هاتجنن و مش عارف اتصرف
نا حاسس زى ما يكون حدمن اهلى مات و مش راجع تانى و انا مش قادر انساه
بجد يا مروه زى ما يكون حد مات و نفسك فى خمس دقايق بس معاه
لكن انت مش هاتعرفى ترجعيه تانى
انا ما بنمش يا مروه خالص و كل ما بنام بحلم بكوابيس جامده جدا بتصحينى
انت ممكن تقولى دلوقتى مع نفسك ده مكبر الموضوع
بس ولاهى انا مدى الموضوع حجمه بالضبط
الفكره ان انا حاسس بالفرق ما بين كل حاجه حلوه لما كانت معايا
و كل حاجه وحشه دلوقتى و انا لوحدى
و مش قادر اتخيل انا الايام الجميله الى كنت حاسس فيها بالدفء و الحنان و الحب دى مش هاترجع تانى
تخيلى يا مروه الفرق ما بين معاكى كل حاجه و معكيش اى حاجه خالص
انا عارف ان انا الى اخترت كده ، بس انا فضلت ابعد عنها احسن ما اخلينى معاها و اضرها
فى الاخر يا مروه انا عايزك تعرفى ان انا مليش اى حد دلوقتى فى الدنيا غير ربنا ثم انت
يا ريت تقدرى تساعدينى لان انا فى اخر مرحله من الزعل و الضغط
و يا ريت تردى عليا بالتفصيل على الاخر و تحاولى تدينى حل عملى انفذه
بعيد عن انت لاوم تنساها و شوف واحده تانية و بس لمستبقلك و الكلام ده
،و يا ريت نفضل على تواصل مع بعض لغاية ماعدى المحنة دى
ده لو كنت هاعديها
شكرا ليكى يا مروه
واسف جدا على الاطالة
