صباح الخير أستاذة مروة
كنت قلت لحضرتك اني هاخد رأيك في موضوع حصل معايا و يكاد يجمد قلبي من الحزن او الاندهاش ،،، و هحكيه ليكي بأختصار علشان وقت حضرتك
انا اسمي مينا و بدرس في كلية الهندسة هنا في اسكندرية ،،، من سنتين تعرفت على انسانة و حبيتها بجد و قعدنا مع بعض فترة لغاية ما صارح كل واحد التاني بحبه ،، الانسانة دي في احدى الكليات الأدبية و انا للأسف متعثر شوية في كليتي مش لأسباب عدم المذاكرة لكن يمكن لأني مش بحبها و ده عيب مني انا ،، ما علينا ،،،، الانسانة دي اصغر مني و لكنها كانت اكبر مني في الدراسة بسبب تعثري في الكلية
و لكني صممت على الارتباط بيها و حكيتلها على ظروفي و هي قبلت بكده و كان الفرق بيننا سنة دراسي واحدة قالتلي هستناك فيها لغاية ما تخلص ،، و هي بجد ادتني دفعة للأمام في دراستي لمن للأسف في نفس السنة والدي مرض جدا و دخل المستشفى و و كانت فيه ظروف خليتني اعيد السنة دي و كنت داخل الامتحانات مش مركز خالص ،،، مع اني في نفس الصيف ده سافرت الغردقة و لأول مرة اتغرب عن بيتي و اهلي و قعدت هناك 4 شهور اشتغل و كنت حاسس اني بشتغل علشانها هي علشان اجيب تمن خاتم او دبلتين او الحاجات دي لأني مقبلش ان بابا يديهوملي و لأول مرة اصرف على نفسي و اعيش لوحدي لكني كنت مبسوط و كمان علشان اشتغلت في مجال الانشاءات اللي هو مجال دراستي
فكنت بحوش فلوس و كنت بحسن من مستقبلي علشان يكون معايا خبرة عند التخرج و اعرف اشتغل كويس و ده مش متوفر لمهندسين كتير ،،،، المهم ،،،، اتطحنت جامد الصيف ده و ساعات كنت ببخل على نفسي بتمن الغدا في سبيل اني اجيبلها هدية حلوة و انا راجع ،،، لكني في اصيف ده و بعد رسوبي لاحظت انها اتغيرت و مبقتش تقولي انا بحبك او وحشتني او الحاجات دي و لما سألتها قالتلي ان ده بتوجيهات غير مباشرة من مامتها ،،،، و ده كان اول تصادم بين تفكيري و تفكيرها ،، اه نسيت اقولك اني كنت مكلم مامتها في الموضوع ده و كانت مرحبة جدا و كمان هي ورطتني في انها قالت لباباها من اول الموضوع مش عارف ليه و ده كان مثار استغراب الجميع و كان باباها كمان مرحب ،،،،
المهم رجعت على اول السنة الدراسية و الموضوع كان فيه تعقيدات كتير لأنها كانت عاوزاني اجيب والدي و اروح اتقدم لكن انا مكنتش عارف اقول لبابا لأني لسه في سنة تانية و كمان معرفش رد فعله فكنت مستني سنة تاتلة و اكلمه في اخرها بحيث يكون فاصلي البكالوريوس و كمان علشان بابا مش هيساعدني بفلوس كتير لأنه طبيب من الطبقة المتوسطة ،، يعني مش هيجيبلي شقة ولا حجة هيا يادوب مساعدة على اده و انا مش ممكن اطاليه بحاجة اكتر من كده كتر الف خيره انه رباني و وصلني للدرجة دي ،، فمكنتش عاوزه يتحط في موقف يسيء له او يصغر من قيمته قدام الناس او ابوها ،، و خصوصا ان ابوها راجل معاه دبلوم صنايع لكنه بيشتغل في شركة البترول فمستواهم المادي اعلى مننا حبتين ،،، مرت الايم و فيه مشاحنات الى ان جاء يوم راس السنة و كنت عندهم في البيت جايبلها هدية و باباها قعد معايا و قالي لازم تعمل حاجة و فين الشقة و عازين شبكة و دبل و عاوزين مواعيد للخطوبة و الجواز و ترتيبات المصاريف هتكون ازاي على الأهل ،، قولتله يا عمي انا لسه بدرس و حضرتك عارف كده كويس و بابا مش هيساعدني بالقدر ده و انا اللي هبني حياتي بنفسي ،،،
قاللي ماليش فيه
الموضوع ده كان قبل امتحانات التيرم بأسبوع و طبعا دخلت متدمر و للأسف طلعت بمواد كتير ،،، لأن الكلام ه حسسني بالعجز ز حسني انها هتضيع من ايدي و اني مساويش حاجة علشان مملكش فلوس و خصوصا انه قاللي حرام البنت تتركن كده جنب ابوها ،، لو جالها عريس جاهز ياخدها على طول و قالهالي كده في وشي ،،،، لكني مكنتش عارف ارد عليه لأني اول مرة اتحط في موقف كده ،،،، مرت الايام و ابوها يزيد من ضغوطه و كلامه كل شوية و انا قولتلها توصله يستنى لغاية اخر السنة يمكن ربنا يسهل لكنه غضب و قال لازم ييجي دلوقتي هو و ابوه و يتقدموا علشان العداد بيعد عليا كده ،،،، في كل ده مشوفتش ليها رأي مخالف او مستقل عن ابوها او امها لكنها كانت معاهم على طول الخط ،،،، و كان اقصى حلم ليها انها تتخطب و ترقص و تلبس فستان و تعمل شعرها ،،،،،
في يوم من الايام كنت بتصل بيها مردتش عليا و بعدها اكنت بتكنسل و اكتشفت انه فيه واحد تقدم لها و هي قعدت معاه و اقتنعت بيه من قعده واحدة و كانت بترتب مع صاحباتها ازاي هترقص يوم الخطوبة و البوفيه هيبقى عامل ازاي و هتلبس ايه و هتعمل شعرها ازاي و هترقص سلو على اغنية ايه ،،، كل ده من ورايا و كانت هتغير رقمها في يوم تلبيس الخاتم هتخلي واحدة صاحبتها توصلي انها اتخطبت و طبعا مش هعرف اوصلها او اكلمها ،،،، الموقف ده وجعني جدا و خصوصا اني خيرتها بين انها تكمل معايا او تنفصل عني و هي تمسكت جدا انها تكمل
انا في اخر الاسبوع اتصلت بيها من برة و هزأتها و فوجئت بيها تنها و بتبكي في التليفون و تقولي انا اسفة و مش عارفة عملت كده ازاي و انا خلصت الموضوع و الحاجات دي لكني رفضت اني ارجعلها تاني و الموضوع اتقفل على كده ،،،، و مرت الايام و كانت بتوصلني اخبار انها منهارة نفسيا و مش عارف تذاكر و كده و بصراحة انا اشفقت عليها من الالم النفسي ده ،،، و في نفس الوقت انا ظهرت نتيجتي و كنت شايل مواد كفيلة بأنها تخليني اعيد السنة لتالت مرة مع اني كنت مذاكر كويس جدا التيرم ده لكن وقت الامتحانات حصل اللي حصل مع والدها ،،،، و كانت هي اول واحدة ابلغها مش عارف ليه و قعدنا مع بعض و قولتلها انا بلغتك علشان متبقيش تعيطي عليا و انتي سايباني لأننا كده مينفعش نكمل مع بعض ،، المسافة بعدت جدا بيننا و انا اشفق عليكي من تحمل تبعات تمسكك بيا ،، و قولتلها انا مسامحك جدا و ربنا يسعدك في حياتك ،،
لكنها تمسكت بيا جامد و كانت منهارة و ندمانة و امام دموعها قررت اني افضل معاها لغاية ما التيرم يخلص و تخلص كليتها بسلام و تعدي الامتحانات على خير و تعرف تذاكر و بعد كده هقعد معاها و افهمها تاني على الوضع و قولها اني بنسحب من حياتها علشان تشوف مستقبلها و متربطش نفسها بواحد زيي ،،،، اه نسيت اقولك ان اللي كان متقدم خريج معهد خدمة اجتماعية و عنده سنترال و شقة كمان و ه كان اهلها طايرين بيه جدا و هي كمان كانت مقتنعة بالرغم من فرق التعليم ،،،، و كنت في النهاية هبعتلها بوكية ورد ابيض على البيت و بعدها هسافر الغردقة تاني و اختفي من حياتها و كنت عارف انها هتتعب شوية لكنها هتوافق بأول عريس يجيلها لأن ده هو حلم حياتها انها تتجوز و تلبس الفستان الابيض و ترقص في الفرح ،،،،،
و استمرت علاقتي بيها اسبوعين و كانت بتوقلي ان اهلها ضاغطين عليها و انا باباها مقتنع جدا بالشاب ده و بيقولها اديه فرصة تانية و انه بيكلمها كل يوم لكنها هتنهي الموضوع في اقرب وقت لما اتعرف تقعد مع باباها لأنه كان بيسافر كتير ،،، و في يوم من الايام من ضمن الكلام قولتلها اني مبقتش اصدقها زي الاول و انه حصل شرخ في العلاقة و هي قالتلي انها مقدرة ده و هتقعد طول عمرها تعتذرلي عن الموقف اللي هي عملته فيا و اني لازم اسامحها ،،،، و قولتلها اني مسامحها ،،و بعدها بيومين لقيتها مش بترد عليا و بتكنسل برضو و اكتشفت انها ضرت فرح اخت نفس الشاب و وصلت العروسة لغاية بابا شقتها مش عارف بمناسبة ايه و انها رجعت مع الشاب ده لوحدهم الساعة 3 و نص الفجر و كل ده طبعا بأذن من باباها و انها حددت معاه الميعاد اللي يتقدم فيه و ميعاد الخطوبة ،، و قالت لواحدة صاحبتها توصلي انها مش بترد عليا لأني مش بثق فيها و اني مش بصدقها و بعد لما عرفت اني عرفت اللي هيا عملته مع الشاب ده قالت لصاحبتها توصلي ان الموضوع انتهى خلاص و ياريت متصلش بيها تاني ولا ابعت رسايل لأنها بتخاف على شعور الشاب ده و هو مالوش ذنب في اللي بيحصل !!!!! ،،،،،
طب و انا
ليه عملت معايا كده
ليه كانت بتحور عليا كل ده
ده جزائي اني رجعتلها علشان نفسيتها متدمرة و انها خلت معظم الناس اللي يعرفونا يترجوني اديها فرصة تانية
ده جزائي اني رجعتلها علشان تعرف تكمل التيرم ده و بعد كده كنت هنسحب بشياكة و بطريقة متوجعهاش
هي كده عاملتني بطريقة مافيهاش رحمة خالص
يعني لو كان عندها كلب كانت عاملته بطريقة فيها كرامة شوية
او حتى تقدير لعلاقة كانت قائمة على مدار سنتين
بجد مش عارف
انا هجنن و قلبي يعتصره الألم بجد
انا مش ببكي عليها ولا حاجة
انا اللي واجعني الموقف الاخير
ليه كانت بتكذب عليا ،، مع اني مكنتش بعاملها غير احسن معاملة
معاملة الأميرات
وجعتني جدا جدا جدا
و افقدتني الثقة في نفسي و حسستني اني ولا حاجة و ان المشاعر و الحب و الحاجت اللي عملتهالها كانت ولا حاجة
و تعمل كده في خلال يومين بس
تكون مع واحد تاني ؟
معلش طولت عليكي
لكن حبيت اعرف رأيك في الموضوع ده لأني للأسف هتجنن و من ساعتها مكلمتهاش حفظا لكرامتي
و مسحت كل رسايلها و صورها و مكالمتها علشان متضرهاش على فكرة
لكني حاسس ان كرامتي مجروحة و مشاعري اتهانت
لو فيه حاجة ممكن تفيدني في الموضوع ده انزلها او اسمعها ممكن تقوليلي عليها من فضلك
على فكرة في اول الموضوع فيه واحدة صاحبتها تبقى اخت صاحبي قالتلي انها بياعة و معندهاش ولاء لحد
و قالولي ان اسرتها بتفكيرهم و تصرفاتهم مش هينفعوا مع اسرتي لأختلاف في الثقافة و طرق التربية و التوجية
مش عارف هل انا غلطان لأني مسمعتش الحاجات دي ؟
شكرا و اشكر سعة صدرك
