ازيك يامروة
انا بشكرك على الخدمة دي حلوة اوي وهتساعدني اني استشيرك دايما
انا هاقولك مشكلة ممكن حد وهو بيقراها يحس انها تافهة بس هي مبوظة حياتي
انا عندي 30 لسه مش متجوزة من عيلة كويسة جدا بكل المقايسس .. وانا بنت بشاهدة الجميع مؤدبة وعاقلة وجدعة واللي لما بتتحط في موقف بتسد وشخصية محبوبة والحمد لله ناجحة في شغلي جدا ومن الناس اللي لما تقابل مع اسر جديدة لاول مرة بعجبهم واعلق معاهم واللي يقول وشها مريح واللي يقول دي بشوشة وخدي من الكلام ده زي مانت عايزة ومن اكتر الناس اللي بقدروني في العيلة الناس المرموقة اوي سواء في العلم او العمل او اجتماعيا دول جزء كبير من معارفي اللي بزودني ثقة في نفسي في جزء تاني من العلية هاقولك عليه بعد المشكلة..طبعا هاتقولي جميل فين المشكلة .. المشكلة بقى ان انا بتقدم ليا ناس غريبة مش مناسبين ليا بالمرة.. ودايما لما حد يعجبني الموضوع يبوظ من اول مقابلة ولما حد مابيعجبنيش يفضل لازق ومتبت ويزهقني في عيشي وفي حياتي
يعني مثلا يجيني واحد ملتزم اوي ومش عنده تليفزيون وانا واحدة اه محجبة بس بسمع اغاني و بلبس بناطيل وع الموضة ودي حاجة مش مناسبه له ولا لعيلته وعايزني انا اللي البس عبايات
او واحد قاعد في بلد ارياف وانا مااقدرش اعيش في بلد ريفي
او واحد شكلة كبير ومبهدل وانا مهندمة جدا
او واحد مستواه الاجتماعي والعلمي اقل مني
او واحد من سني بس من النوع الغشيم اوي اللي لا بيفهم في ذوق او اتيكيت ولا في معاملة البنت وعايش دور راجل في الخمسين..اه انا مش صغيرة بس عايزة اعيش حياتي
عشان مااحيركيش هما معظمهم في العيلة بيكونوا كويسين لانهم دخلين بيت كويس الا قلة اللي بيدخل وهو مش مناسب للبيت عشان البنت دي فيها عيب وهو انها كبرت او زي ما واحدة مامت واحد كنت رافضاه قالت هي المفروض توافق على عيب ابني قصاد انها قربت تعنس .. وش كده.. بس انا ماتهزتش من الكلمة ولسه بصر على الرفض
طبعا بيجني نوع تاني اللي بيعجبني .. وبيكون سال عني وعارف تفاصيل حياتي وكمان بيشوفني قبل مايجي بس النوع ده الموضوع بيبوظ من بعد اول مقابلة .. وانا عارفة ليه … عشان انا لما بشوف الشخص ده وقاعدنا اتكلمنا شوية وحسيت الله هو ده اللي انا عايزاه .. ابتدي اتوتر جدا وابص حوليا وبكون خايفة ممكن حاجة فيا مش تعجبه وبعد الاحساس ده بيكون رد فعلى وردود كلامي مش المفروض بعملها طبيعي….. ليه بيحصلي كده عشان الجزء التاني اللي من عيلتي اللي ماحكيتش عليه الجزء ده بيقيس البنت اما تكون دكتورة او تكون جميلة وفي الحالتين دول بس البنت تستاهل تتشرط وتتامر وتنقى اللي هي عايزاه .. وانا مش فيا الحاجتين دول .. فلازم اقبل بناس من اللي حكيت لك عليهم اقولهم انتوا بالناس دي بتقتلوا فيا حتى الامل اني افكر واحلم اني ارتبط بواحد مناسب ليا لكن مافيش فايدة وفي كل مرة برفض بيزودوا عليا صفة دي طالعة فياها على ايه دي اكيد في حد شاغلها مع اني انا ماعنديش اي علاقة حب او ارتباط مقضياها صالونات بس..
الحاجة اللي نفسي كل الناس تساعدني فيها اني هاقابل شخص انا اعرفه بس هو لا ومن الناس اللي بتعجبني واللي نفسي اكمل معاه حياتي … ونفسي اعجبه .. نفسي مايشوفش عيوبي .. نفسي مااتحطش في موقف اني المفروض اقبل بناس من اللي قولت لك عليهم عشان انا مش فيا اهم ميزتين في البنت من وجهة نظر عيلتي طبعا
انا واثقة في نفسي بعيدا عن المقابلة الاولى عارفة لو نتقابل تاني مقابلة الاول اكيد هاكون على طبيعتي ….. كلام عيلتي بكون نسيته وباكون حاسة اني انا اللي مسيطرة على الموقف مش هو ..عايزة اعرف ايه اللي المفروض اعمله واتكلم معاه في ايه عشان المقابلة تمر بسلام وتيجي المقابلة التانية ويكون الحمل اتشال
اسفة اني طولت عليكي.. واسفة عشان الناس هاتقول موضع هايف.. وهاتقول في حد عنده 30 سنة وكده.. بس ظروفي كده على فكرة انا مش عايزة اتجوز لمجرد اني اتجوز واريح عيلتي .. لا والله انا بدور على اللي اعمل معاه بيت جميل مليان حب وتفاهم وامان وطموح واستقرار
