ازيك يا مروه انا اسفه ان كانت مشكلتي كبيره شويه جايز تكون مكرره بس للاسف انا مش عارفه الاقي ليها حل
انا عندي 26 سنه ومش عارفه انا بحب ولا لا… الشخص اللي بقصده معرفتش مشاعري نحيته الا متاخر عشان انا دايما بتعامل مع الحب بطريقة غريبة لما بتشد لحد بدل ما اديله فرصه يقرب ببعد مع اني ببقى بحبه ….هوه اكبر مني بس في الدراسه انا اتخرجت قبله لما اتعرفت عليه كان هوه اللي ابتدي وكانت البدايات مغريه ليا جدا عشان حسيت انه فاهمني جدا
بس فكرتي عنه انه بتاع بنات ومش بيركز في علاقة خلتني استهتر بكل الاهتمام ده …وعشان انا كنت خارجه من تجربه عاطفيه طويله بعد فتره اعترف انه بيحبني بس تراجع بعدها ولما حصل ده انا مشيت العلاقه في اطار الصداقه بس يمكن عشان انا كمان كنت مش مستعده او مش مصدقه انه ممكن يكون بيحبني ….
وكان هوه على علاقة ببنت من بره مصر تعارف النت اللي انتي اكيد عارفاه وعشان اعرفه اكتر هوه عرفني عليها وبقينا صحاب جدا فبقيت اعرف عنه تفاصيله الشخصيه وكمان بقى بيثق فيا جدا ….يعني ادق الحاجات بعرفها انا بس وللاسف ده علقني بيه اكتر عشان لقيت انه مش هايف ولا سطحي زي ما فكرت وخلال علاقتنا بدأ يذاكر ونجح وقرب يخلص وكل ده هوه معترف بيه اني وقفت جنبه….
اللي حصل انه ساب البنت دي وده خلاني اقول انو اخيرا بدأ يحس بيه عشان في خلال المده اللي سبقت انه سابها انا كنت اعترفتله اني بحبه بس هوه بعدها استفزني فعشان العيب اللي عندي اللي حكتلك عنه سحبت كلامي كله وفكرت ابعد… بس هوه رجعلي تاني وفضلت ساكته لقيت اني مش المفروض اوضح اكتر من كده
كان هوه اتعرف على بنت تانيه من على موقع من النت كنا عاملينه عشان نكتب مواضيع وكده وهيه من اول يوم قالتله انها بتحيبه وهوه قاللي بس انا مهتمتش عشان قلت انها علاقه عابره ومش حتكمل…. خصوصا انه قاللي انه مش بيفكر يرتبط وبعدها صرحلي انه بيحبني وانه شايف اني مش ممكن يلاقي حد كده يتفاهم معاه….
بس كله ضاع في الهوا لما اكتشفت انه حيخطب البنت دي عشان هيه صغيره وانا بيني وبينه سنه واحده ومش ممكن استناه لحد ما يبقى جاهز …وانه شايف ان ده ظلم ليا ….الوضع الراهن دلوقتي بعد صد ورد وخصام وصلح اننا بقينا صحاب انتيم بس انا لسه بحبه وهوه كمان وده بيبان كل ما نشوف بعض بنبقى عاملين مجهود عشان نعرف نتعامل
وهوه طبعا خاطب البنت دلوقتي وبينهم 9 سنين فرق ده غير انها من مكان تاني وبالرغم من كده لسه بيعتمد عليه في كل حاجه خاصه بيه… السؤال اعمل ايه ادافع عن حبي ليه ولا ده مش حب …..افضل صحبته وهوه تقريبا بقى مش بيحكيلي حاجه وده محسسني ان العلاقه بيننا ناقصه مفهاش كلام زي الاول…
اقطع علاقتي بيه وابعد وده عملته قبل كده وكان مؤلم ….انا جربت ادخل في علاقات بعد كده كلها فشلت عشان الكيميا اللي ما بيننا مش حصلت مع حد تاني…ولو اللي بينه وبينها حب مش بيعتمد عليها ليه في اي حاجه من اللي بيعتمد فيها عليا مع العلم ان اللي بعمله لازم يعمله حد بيحبه مش مجرد صاحبته يعني انا اللي بصحيه وباخد بالي منه وبتأكد انه كويس عشان باباه متوفي يعني المفروض هيه تاخد الدور ده ….توارد الخواطر بيننا فظيع حاجه زي اللي في الافلام …ولا هوه كده بيستغل حبي ليه عشان كده ماشي على كل الجهات…ياريت اسمع رايك ..انا اسفه على الاطاله
