الراجل …
لأ استنوا بس …
ما تقلبوش الصفحة …
المرة دى غير كل مرة …
من سنتين استضافنى حازم الحديدى مع حسين فهمى فى برنامج "الناس وانا"، وكانت الحلقة عن الراجل ومفهوم الرجوله.
أنا لأول مرة هـ اعترف لكم إنى "فتيت"، أيوا يعنى أقول للراجل ما أعرفش؟ أقول له إنى مش فاهمة يعنى إيه راجل ولا إيه لازمته فى الحياة غير للتكاثر؟ أقول له إنى بمليون راجل ورجالة اليومين دول تجوز عليهم الصدقة؟؟
عيب … ما يصحش … ماما هـ تتفرج ورجالة العيلة هـ يسمعونى والحبايب كتير … وزى ما الجيش قال "اتصرف" أنا اتصرفت! عيب ده أنا كاتبة وخيالى واسع مش هـ اعرف "أفبرك" كائن خرافى اسمه راجل؟
المهم لما حسين بيه سألنى قلت كل اللى نفسى فيه ومحدش أخد باله إنى بـ اتكلم عن بابا نويل والساحر أوز فى نفس واحد … وعدت الحلقة.
النهارده بقى أنا جبت التايهة وحطيت إيدى على راجل ولأول مرة فهمت المعنى الحقيقى للرجوله … إيه هى الرجوله؟
الرجوله مش كلمة ولا كلام ومش صفة ولا صفات. الرجوله تخص الست أكتر من الراجل لأنها إحساس الست بـ تحس بيه وهى مع راجل، والإحساس ده بـ يترجم لمواقف كتير.
الرجوله احترام والراجل المحترم يعنى راجل قد كلمته … لما يوعد يوفى ولما يتكلم يصدق ولما يختبر يلتزم بمبادئه. مش "بق" يعنى ولا بياع كلام. الكلام سهل بس الراجل بجد بـ يتربط من لسانه.
الرجوله التزام. تحمل المسئوولية التزام. تحكيم العقل التزام. الصراحة التزام. جدية العلاقة التزام. الشفافية فى التعامل التزام. عكس الالتزام هنا هو الفوضى وإحساس الست فى علاقتها بالراجل زى إحساس الطفلة وهى راكبة مرجيحة … أيوا … شوية فوق وشوية تحت … شوية طايرة وشوية دايخة … وفى أوقات كتير معدتها مقلوبة!
الرجوله تقدير. الراجل الحقيقى مش بصوته ولا بعضلاته ولا بأعضائه. الراجل الحقيقى هو من يدرك ويقدر ويحترم ضعف المرأة الفطرى واحتياجها له.
الرجوله كرم. كرم أخلاق وكرم طباع وكرم مادى. راجل إيه ده اللى ياخد فلوس مراته؟ راجل مين ده اللى كلامه بالقطارة واهتمامه محسوب بالنفس وخلقه ضيق ومش طايق للست كلمة ولا همسة؟ الراجل الكريم مش غنى، لكن الست عمرها ما بـ تحس معاه بفقر ولا حرمان.
الرجوله تسامح. الراجل الحقيقى قلبه كبير وعقله رزين ومش بـ يمشى ورا الموضة وكلام الناس وأحكام المجتمع. الراجل هو اللى بـ يختار الحنان لما غيره بـ يختار القسوة. ويقدر يعفوا عند المقدرة لما غيره من الكائنات بـ يسوقوا العوج.
الرجوله أمان. الراجل مش خاين ولا غدار ولا بصباص ولا حلنجى ولا فهلوى ولا فلاتى ولا بتاع نسوان! الراجل مش اللى يخلى الست عنيها فى وسط راسها من الغيرة والشك وبعدين يقول اتخنقت!
الرجولة ثقة. الراجل الصح واثق من نفسه وواثق من اختياره للست الصح اللى تناسبه. الثقة مش سهلة زى ما انتوا فاكرين … الراجل اللى عنده ثقة باله مرتاح … مش بـ يسأل أسئلة غبية لا عن الحاضر ولا عن الماضى أو المستقبل.
الرجوله ثقة. أيوا تانى … ثقة الست من وجود الراجل جنبها كل ما تحتاجه … ثقتها فى قدرتها على الاعتماد عليه … ثقتها فى قدرتها على البكاء أمامه … ثقتها فى قدرته على احتواء غضبها وثورتها وهرموناتها الملخبطة.
ولما الست بـ تحس إن معاها راجل بمعنى الكلمة زى اللى أنا وصفته ده بـ تقابل رجولته بالاحترام؛ احترام وجوده وغيابه … احترام آراءه وقراراته ومواقفه … احترام وعودها له … احترام مخاوفه وضعفه (أيوا الراجل ضعيف) … احترام أحلامه وطموحاته … احترام اسمه.
لما الست بـ تقابل راجل حقيقى بـ تفتح قلبها وبـ تسلمه عمرها بكامل الرضا.
عزيزى القارئ … انت شايف نفسك راجل؟
انت مش راجل لو
1- صوتك عالى … عمال على بطال … بـ تزعق فيها وانت بـ تتكلم معاها أو بـ تأمرها و لا بـ تتناقش معاها
2- لسانك طويل … بـ تشتمها … بـ تسخر منها
3- لسانك بـ ينقط سم … مش بـ تقول كلام حلو
4– إيدك طويلة … بـ تضربها … بـ تاخد فلوسها … اتحطت على واحدة تانية
5- وشك مقلوب … نكدى … عامل حمش … عايز على طول تعرف غلاوتك
6- بـ تغير من أصحابها البنات … من زمايلها … من كل راجل تكلمه … من المراحيم اللى قبلك
7- بـ تسأل: انت بـ تحبينى؟ انت حبيتى قبل كده؟ كنت فين ومع مين وليه وفين؟ (لو انت راجلها بجد هى هـ تحكى لك)
8- كذبت … اللى بـ يكذب ضعيف وجبان وواطى … مش راجل
9- خنت … اللى بـ يخون ده ما عندوش مبادئ ولا قيم ولا أصل
10- اتهربت منها … لما تتصل وما تردش … لما تقع فى مشكلة وما تبقاش جنبها، لما تقول لك محتاجة تتكلم وانت "تنفض لها" … بعد ما عشمتها بالجواز – أمال هى كانت خارجة معاك ليه؟
11- مش نظيف فى نفسك وريحتك تقرف وبقك قبر.
12- حسيت إنك عايز تخنقنى بعد المقال ده!
You must be logged in to post a comment.