طبعا انا بتابعك على قد ما اقدر بس برده مهما سمعت منك مش هيكون ذي ما اقولك على اللي جوايا اللي اكيد بيختلف عن غيري
كنت سمعتك في الراديو بس من ع النت و كان كلامك على الذكاء العاطفي وللاسف مكملتش باقي الكلام عشان النت فصل بس اللي وصلت له في الاخر ان عندي غباء عاطفي
وللاسف انا بواجه مشاكل كتير و ماما بتقولي انتي اللي حساسه زياده عن اللزوم مع اني لا ارغب سوى الاحترام في التعامل لا اكثر و لا اقل و اي قلة ادب من اي حد صغير في السن اظن ان من حقي اني لازم اعرفه مقامي صح
انا على فكره عندي 27 سنه هتقوليلي و لسه هبله هقولك اه و بزعل كتير وبضايق اكتر من حاجات تافهه و بسيطه
انا كنت حاطه لنفسي قوانين و ماينفعش اخرج عنها انا كنت في كلية هندسه وللاسف مفيش وقت حتى اني اتنفس مش احب ..مرت سنين الكليه من غير ولا حاجه..و طبعا انا من المنصوره البنات مالهمش طبعا دعوه بالولاد واللي ليه هيتقال في حقها كتير.. في فترة المشروع شهرين لا غير اتعرفت على مجموعة المشروع وفي خلاله واحد عرض عليا انه يتقدم لي و انا رفضت الموضوع تماما و قلت له يعتبر ان كأن محصلش حاجه خالص و انسى وخلاص على كده ..و في يوم مناقشة المشروع واحد قالي انه معجب و انه معرفش يتكلم عشان الدراسه و قدامه لسه الجيش و الشغل انا فتحت له الباب و ان مفيش مجال عندي غير الرسمي و هو معرفش يعمل حاجه و اتقدم لي واحد رفضته بس بابا ارغمني عليه و حاولت اكلمه عشان على الاقل يقابل اخويا عشان امنع موضوع الخطوبه فكان لينا صديق بيوصل الرسايل ما بينا المهم هو برده معملش حاجه و انا اتخطبت وفسخت و جت لي فرصة سفر بره و سافرت رغما عن انف الجميع في خلال فتره سفري الصديق ده كان دايما بيسأل عليا وانا كذلك..و بعد كده لاقيت الشخص اللي فتحت له الباب جاب رقمي بره و انا قفلت معاه خالص و سألت صديقنا على انه عرف الرقم من مين و حلف مش منه بس انه هو حكاله ان ظروفه اتغيرت و انه عايز يطمن عليكي بس و كلام من ده و حاول يقنعني اني اخد اللي بيحبني و مخدش اللي بحبه و حوارات من دي كتير و انا قلت له ان الموضوع ده ينتهي نهائي الحديث فيه و اني مفكرتش ابدا فيه و مجرد واحد فتحت له الباب و هو معرفش يعمل حاجه و خلاص خلصنا
و بعد ماجيت كنت بتكلم مع صديقنا ده كتير و كان لسه بيدور على شغل لانه يادوب خلص جيش و حوارات كتير و اتفقنا و اختلفنا و عرفت كتير من شخصيته و عجبتني بحق و الفتره الاخيره الاقيه يجي المنصوره هو مش منها يعني سفر و اتقابلنا و قعدنا مع بعض مرتين .. اتكلمنا في كل حاجه و بدون ابدا التطرق لاي مشاعر كلها احوال الدنيا و البشر غير كده مفيش ..فكرت ان ممكن اكون في حالة اعجاب بيه و ده اكيد ..طب و هو ..مش عارفه ..هل من الممكن انا بس اللي بيتهيئ لي .. هل من الممكن انه يكون حاطط حساب لصاحبه ..حاولت اوضح له اعجابي الاقيه يسكت خالص حاولت اوضح له ان مش عايزه اعرف او اسمع عن اي حد من زمايلنا الاقي ساعات يحكي لي عملوا ايه و راحوا فين..حاولت اعرف ايه اللي في دماغه طلع الممثله نور اللبنانيه حلم حياته ..عرفت حاجات كتير لكن معرفتش هل انا امثل شيئ و لا لأ
مش عارفه اقرب و لا ابعد ..هل شايفني مجرد واحد صاحبه و بيقضي معاه اليوم و خلاص..هل شايف اني بما اني خرجت معاه اني سقطت من نظره .. هل انا بس اللي بيتهيألي..هل انا بس معجبه بيه لكن هو لا ..هل حاطط اعتبار لصاحبه ..هل ظروف ..مش عارفه اوصل لحاجه نهائي لا بخير و لا بشر
انا بس عايزه اوضح لك حاجه
ماما بتحاول تدفعني لاي موضوع جواز .. بمعني ان ممكن يكون شخصيتيتن مختلفين عن بعض خالص دراسيا و اجتماعيا و ماديا ..و في الحالتين الاقيها عامله لي البحر طحينه .. لما بشوف كده بحس انها عايزه تخلص و خلاص..لان واحد في السما وواحد في الارض و برده تقولك يلا
في مره قعدنا تناقشنا في موضوع التكافؤ ده اللي اتنبح صوتي فيه..لاقيتها بتقولي ما انا مكنتش عايزاكي تجيبي العربيه ..ليه.. عشان مش كل اللي هيجيلك عنده عربيه و هيقول لا ده عايزاني اصرف عليها و على عربيتها كمان ويبعد عن الموضوع من اساسه..وكمان ليه تاخدي الماجستير هما كانوا شغلوكي بشهادتك عشان تقولي ماجستير..ما كده كده مش عايزين بنات.. ومش كل اللي هيجي لك برده معاه ماجستير يا دوب مخلص شهادته بالعافيه..لا و كمان انا بحاول ادور على شغل بس في تخصصي .. تقولي حاولي في اي جهه اي حاجه المهم تشتغلي عشان العرسان بتبص انك بتشتغلي وبتجيبي قرش و هما عايزين اللي يساعدهم مش قاعده في البيت
اللي عايزه اوصله لك..اذاي احب نفسي و انا حاسه ان امي بدل ما بتدور لي على الاحسن مني او على الاقل ذي ما بقولها من مبدأ التكافؤ.. عايزاني انا انزل بكياني عن مستوايا قدام نفسي..و بحس اني بحارب لوحدي لما بيكون في موضوع بالشكل ده
جايز معنديش ثقه في نفسي بس اكيد برده الثقه دي بتبقى نابعه من تشجيع اللي حواليا وبرده مش حاسه بكده من ماما
لكن مع الشخص ده حسيت ان ممكن يكون في تكافؤ بينا و كمان انا عجباني فعلا شخصيته.. و حاولت اقرا في الابراج لاقيت ان شخصيته كده كده جذابه-ميزان- لكن مش هتمشي معايا-جدي-بس قلت يمكن و كمان شوفت الى حد ما اهتمام منه بس جايز لما اهتميت انا بيه..مش عارفه برده
انا معرفش ايه وضعه صراحة بس عادي زيي عادي..لكن احنا من النوع مش اللي ليه طلبات..اللي موجود اهلا و سهلا و بنكمل عليه المهم الشخص..بس معرفش اذا كان فعلا الصوره دي وصلاه له و لا .. بس انا عرفته ان اخويا مسافر فمعملش اي حاجه هنا لمراته بس واخدها معاه و كذلك اختي نفس الوضع.. يعني شايفني على بلاطه..هو الكبير و اخواته كلهم صبيان ووالده والدته فهمت انهم بيروحوا يعملوا عمره كل سنه تقريبا او سنه و سنه يعني.. مش هقدر من خلال كل ده اني احكم اذا كان وضعه كويس و لأ بس انا بعتبر انه لأ و برده ده هيمشي معايا..عادي اموري كلها في الاعتدال شقه ايجار الاساسيات بس- اي جديد بيجي بيبقى حلو وخلاص.. عادي مفيش حاجه تعجز اي انسان المهم الشخص
اتكلمت له كتير على عرسان جت و اتريقت عليهم و رفضتهم و وضحت اسبابي و ان مش ده اللي يمشي معايا ..تكونش الرساله وصلت غلط..مش عارفه
بس انا بقول دايما انه حاطط اعتبار لصاحبه..مش عارفه و كأنه بيحاول يفكرني ويقولي احنا بينا صاحبي.. مش عارفه له حاول يذكره في حكاوينا كذا مره
اوقات ساعات بنهزر عادي و ممكن نقول كلام اعجاب برده عادي بس كأنه هزار في هزار كله و مفيش حاجه جد
معلش هزعجك معايا
امبارح اتكلمنا ع الشات..كنت طلبت منه ينزل لي فيلم قالي انه نزله في اجازته اللي فاتت و انه هيجيبه الاجازه دي ..لاقته خلص الحوار و مقلش جاي..فسألته قالي ما انا كنت هجيبه بس عندي مشاوير ممكن اجيبه بكره بس همشي على طول.. -يعني على اعتبار ان احنا ممكن بنقضي بتاع ست ساعات مع بعض و نتغدى و رغي رغي و لوك لوك..حسيت ساعتها ان انا اللي بطلب منه يجي.. قلت له لا خلاص مش لازم قالي المره الجايه قلت له اللي يعيش و انا في نيتي اقوله لأ ده ان طلب..معرفش الموقف نرفزني
معرفش بعد ما بعتي لي .. حسيت ان اللي بنعمله فعلا شغل عيال في عيال
بس فعلا احنا كده ..صغيرين قوي ..يمكن عشان محدش فينا مر بتجارب تخلينا نكبر فعلا في افعالنا و ردورد افعالنا و افكارنا..والله ما انا عارفه حاجه..حاسه في اني في توهه .. اقول لو يجي بس.. و اوقات اقول ان شاء الله عنه ما جه في اسن منه و برقبته و انا استاهل سيد سيده .. او اللي فعلا يحسسني اني محور حياته
