ازيك يا مروة بجد ربنا يوفقك انا على طول متابعاكي وبحب صراحتك جدا وانك بتقولي للوحش انتا وحش ف عينه عشان كده انا بكتبلك بصراحة جدا و بتمنى انك تساعديني.
انا عندي 21 سنة وحياتي كلها متلخبطة الاول كانو كل اللي حواليا هما السبب ف اللخبطة دي بعدين بقيت انا السبب..باختصار عشان ماطولش عليكي انا يا مروة عملت حاجات كتير ف حياتي مش عارفة عملتها ليه وانا متأكده انها غلط بس كنت بعملها برضو بالعند ف نفسي واهلي
من اول السجاير للمخدرات للشرب والعلاقات من اول ما كان عندي 12 سنة واللي كنا فيه ده كان ستايل حياتنا عادي يعني اهل مطنشين وناس كتيييييييييير اوي نفس المستوى وزينا وكده حكايات كتيرة وطويلة جدا
و كنت كل شوية بحال وزهقت ورجعت تاني وقررت ان كفاية ضياع لحد كده ولقيت نفسي اخيرا وساعدني على كده واحد من صحابي كنا نعرف بعض من فترة ومن اول ما قابلنا بعض حسيت انو شبهي وكنا دايما بنحاول نبعد عن صحابنا واللي بنعمله واتكلمنا كتير اننا عايزين نبطل ونتغير وساعدنا بعض وطلعنا من اللي كنا فيه وبطلنا كل حاجة
وفضلنا فترة نشوف بعض وهو كان بيقولي انو غير كل اللي عرفتهم ف حياتي وهو اصلا عارف كل حاجة عني (كل حاجة فعلا) وبيقولي انه برغم كل اللي انا عملته قبليه هو مسامحني وبيحبني فعلا و فعلا يا مروة هو دماغ ومختلف عامل زيي بالظبط ،انا ف الاول موافقتش وقلتله مش هينفع خلينا صحاب عشان انتا اكيد مش هتنسى كل حاجة ولو ف يوم قلتلي كنتي كذا ولا كنتي بتعملي كذا انا مش هستحملها
قالي انتي بتفكري ازاي انتي متعرفينيش لسه بكرة الايام هتثبتلك وفعلا بقالنا سنة مع بعض وهو كويس معايا جدا وبيحبني اوي لحد امبارح حصل موقف بجد صدمني كنت قولتله اني خارجة وقالي خلاص كلميني لما تنزلي ولما ترجعي عادي يعني زي كل يوم ف انا نمت ومنزلتش ولما صحيت كلمته قلتله سوري مكلمتكش طول اليوم نمت ومحدش صحاني قالي انتي كدابة !!
كده ف وشي يا مروة وبعدين مردش عليا انا كنت عامله حساب الموقف ده من اول ما عرفته بس مش متخيله انو ممكن يفكر كده بعد كل اللي عدينا بيه مع بعض.انا متأكده انه بيحبني وانا كمان بحبه وعمري ما فكرت ادايقه ولا اخونه و ف نفس الوقت بقول ما هو عنده حق يفكر كده ومعندوش حق ف نفس الوقت عشان انا اتغيرت بجد..
ازاي اكسب ثقته ازاي احسسه اني فعلا بحبه ومش هكدب عليه ابدا عشان انا مش عايزة كده ومش عايزة حد غيره ومش عايزاه يظلمني..ولا هو هيفضل كده طول حياتنا بقى كل فترة يطلع ب حاجة كده تفكرنا ب زمان؟؟
انا فعلا محتاجة رأيك ومعلش طولت عليكي
————————————–
بصى يا مشمشة
الماضى الوحش عنده زى ما هو عندك
انتى كل شوية بتتكلمى انه سامحك
انه نسى
انك خابفة يحاسبك
طيب و انتى؟
ما انتى ليكى نفس الحق تشكى فيه و ليكى نفس الحق تخافى منه لا يرجع للى كان فيه و ليكى نفس الحق انك تخونيه
لكن انتى سامحتيه بجد
هو لأ
كلميه مرة أخيرة
لو رد رد لو ما ردش خلاص
و لما تكلميه قولي له انك عايزة تتكلمى معاه بالعقل
و كصديقة
و تقوليله الكلمتين اللى انا قلتهم دول
و تقوليله انك عمرك ما كدبتى عليه
لان اللى بيكدب ضعيف و جبان
و انتى لا ضعيفة و لا جبانة
و تشوفى هيحصل ايه و لو دى أول مرة يحصل بينكم الصدام دا يبقى فوتى لكن لو الموضوع دا متكرر فى علاقتكم يبقى انهى الموضوع
