هاى يا مروه ازيك , انا عندى 24 سنه بنت عاديه عشت كل حياتى فى ظروف مش عاديه فى بيت اهلى ومن غير دخول فى تفاصيل بقت توجعنى لمجرد التفكير فيها نتيجه حياتى دى انى بقيت طول الوقت بدور على الحب والحنيه اللى عمرى ما حسيت بيهم قبل كده .
وطبعا جريت ورا اول حد حاول يقرب منى فى فتره الجامعه مكنتش بحبه بس اتعلقت بيه من حبه ليا لانه كان بيحبنى اوى بس للاسف حبه ده مع الوقت بقى غيره وشك وخنقه زودت الكابه اللى فى حياتى وفضلت فى ضغط ومشاكل معاه لغايه لما الموضوع خلص وسبنا بعض .
بعدها بفتره مش كبيره اتعرفت على شاب اكبر منى بسنتين اتكلمنا وحكالى كل حاجه عنه ومن غير كسوف ويمكن دى اول حاجه شدتنى ليه انه بيتكلم عن اى ظروف مش كويسه ليه بصراحه ومن غير تجميل , باختصار يا مروه الولد ده اقل منى فى التعليم وفى الظروف الماديه والاجتماعيه طبعا ده انا عارفاه من اول مره اتكلمت معاه فيها بس بصراحه موقفتش كتير قدام الموضوع ده لانى كنت معجبه بيه او يمكن قلت بينى وبين نفسى ان ظروفى الاعلى منه دى مجرد مظهر باين للناس لكن الحقيقه اللى انا حاساها من جوايا انى مش اعلى من اى حد..المهم احنا دلوقتى بقالنا سنتين مرتبطين .
وهو لسه قدامه مش اقل من سنه كمان علشان يبقى فيه ارتباط رسمى ..انا معاه وتايهه مش عارفه افكر فى اى حاجه بقى هو الحاجه الكويسه الوحيده فى حياتى بس فى نفس الوقت فى حاجات فى شخصيته مش بحبها وبتخوفنى .
بترعب يا مروه لان حياتى اللى جايه دى هى الامل الوحيد عندى وخايفه اكون اخترت حد غلط .واكمل بقيه حياتى برده فى تعاسه .انا حاسه انى بدات اهد كل حاجه كويسه بينى وبينه طول الوقت قاعده مستنيه حاجه يعملها علشان اعلقله عليها او اتخانق واقوله انه غلط .طول الوقت بشتكيله انه مش مهتم بيا ولا بيحبنى زى الاول وهو يحلفلى انه متغيرش .
انا مش عارفه انا صح ولا غلط انا حتى مش عارفه هو فعلا اهتمامه بيا قل ولا انا اللى بطلب منه زياده عن طاقته علشان اعوض اللى بشوفه من اهلى .طبعا هو ميعرفش اى حاجه عن المشاكل اللى عندى وزيه زى كل الناس شايفين الصوره من بره مش عارفين اى حاجه من الحقيقه….انا من اللى شفته يا مروه مبقاش عندى طاقه انى اواجه اى مشاكل او حتى افكر او اخد قرارات فى حاجه ..لو فهمتى حاجه من كلامى ده قوليلى اعمل ايه ومعلش لو كنت طولت عليكى وهطلب منك طلب ياريت لو نشرتى الرساله دى متنشريش الاسم ولا الميل
————————————-
اهلا يا مشمشة
انا مش عايزاكى تغلطى غلطة بنات كتير و تهربى من الواقع المر لقصص حب وهمية
انا مش باقول انه مش بيحبك
و مش بقول انك مش بتحبيه
لكن تعالى نبص للموضوع من زاوية تانية
انتى دلوقتى مقهورة فى بيت اهلك
لكن مش قادرة تعملى حاجة لانك معتمدة عليهم فى كل حاجة
يبقى ليه تكررى نفس الغلطة و تروحى فى علاقة تعتمدى فيها على حد تانى؟
ما تتعلمى كويس
و تشتغلى كويس و تستقلى ماديا
عشان فى اسوا الظروف ماتحسيش بالقهر تانى
لو انتى بقى مصرة عليه يبقى
أنا مش هينفع اختارلك يا جميلة
لو انتى حاسة بالفرق و حاسة انك مش هتندمجى مع اهله و بيئته يبقى الارتباط دا محكوم عليه بالفشل
لو حاسة انك لو خلفتى هتبقى مش عايزة ولادك يختلطوا بأهله و قرايبه يبقى الموضوع مش نافع
لو حاسة انك هتتكسفى منه يبقى بلاش
