fbpx
مونتيسوري مصر- تقدمها مروة رخا

جوزى ادمن النت .. ارجعه ازاى؟

انا هحكيلك على شويت حاجات حاصلة فى حياتى وعايزة رايك جدا انا متجوزة بقالى سنتين كانت السنة الاولى كويسة جدا جدا من السنة التانية ولما ولدت جوزى اتنقل من شغلوا سافر بقت اجازتو 10 ايام معايا وعشرة شغل

من ساعت مسافر وانا حاسة غريب مكلمات تلفون ونمر غريبة ونمر بتتمسح ولما كنت بواجة كان بيقولى انى مجنونة وبيتهياقلى لحد ملاقيت مسجات وحاجات كدة وفضلت بدور وراة وعلطول شاكة فية لحد مجة شهر 3 الى فات لقت متسجل فى موقع شات وكاتب نمرة موبايلو وبعات كلام لبنات

لما واجهتو اتئسفلى وقالى انا غالطان وحئك عليا وسمحتو بس مش قادرة اصدقو خالص بعدها بااسبوع عرفت انو قابل واحدة وبيقول انها بنت صاحبو كان بيديها حاجة لبباها عشان كانت جمبنا وبباها فى المعادى طبعا انا اكتشفت لوحدى مقليش وبعدين بشهر كان واقف فى الشارع بيتكلم فى الموبايل لمدة نص ساعى وانا شيفاة من البلكونة لما طلع سالتو قاى محصلش انتى مجنونة وبيتهيالك وبعد 4 ساعات قالى انا اسف كنت بتكلم مكلمة شغل مكنش ينفع ااقولك

المفروض انى اصدق كدة بسهولة عادى انا تعبت مش قادرة اصدق دة كل دة غير الحجات المحكتهاش والى زاد ممتو هى ساكنة جمبى انا لما جوزى كان بيجى اجزتو كان بيعد 10 ايام معايا انا كنت بروح لمامتو 6 ايام من العشرة وطول عمرى كويسة معها لقتها بتقول لابنها ان انا مش بحبها ومش بحبها تيجى عندى وانى حبساة ومش بخرجو وهو كان بيدافع عنى جدا بعد فترة حصلت مشكلة بينى انا وجوزى وهو سافر قعدت فى بيتى وكنت مكتئبة مش بكلم حد ومش برد على حد لحد ما هديت رحت لى حماتى اسلم عليها لقتها زعلانة وعايزة تنصحنى على اية مش عارفة

بس انا قلتلهم انى مش عايزة اتكلم فى حاجة دلوقتى زعلت واتصلت بجوزى وعيطت واشتكتلو وعملت مشكلة كبيرة اوى وانا جوزى دلوقتى مش بيكلمنى خالص انا مش عارفة اعمل اية انا تعبت وزهت منهم جدا
 

________________________________________________

 

أهلا يا حبيبتى
 
انتى و جوزك ضحايا
 
أيوة
 
جوزك لما شغله اتنقل بعيد و بقى بيقضى وقت كتر فاضى و بعيد عنك و عن أسرته و أصحابه … قال يعمل زى الناس و أهو كله لعب … عمل زى الناس و دخل على النت و ابتدى يلاغى دى و يشاغل دى و أهو بيتسلى
 
اللى جوزك كان مش عارفه ان الموضوع دا ادمان .. ايوة! الدخول على مواقع التعارف ادمان … الكلام مع ناس أغراب ادمان … علاقات النت ادمان … الخيال و جو الغموض ادمان
 
و واحدة واحدة جت رجله و بقى مش عارف يبعد و لا يتراجع
 
انتى بقى طبعا و لا كان على البال و لا على الخاطر
 
هو مسافر و انتى مشغولة بابنك و ببيتك و بحياتك و لما بيرجع بترحبى بيه عادى
 
يعنى انتى اعتبرتى نفسك زوجة بس فى الايام اللى هو فيها هنا و بقية الايام هو مع نفسه و انتى مع نفسك
 
النت فتح عينيه على حاجات جديدة و كتيرة و قابل بنات مختلفين عنك فى كلامهم و ملاغيتهم و دلعهم و حواراتهم
 
و من هنا حصلت المشكلة
 
الحل؟
 
تغيير مسار جوزك
 
مهما لومتى و مهما عاتبتى و مهما هو وعد … مش هيقدر يبعد و لا ينسى و لا يتغلب على الادمان دا
 
يا تقبلى و تعيشى زى ما ستات كتير عايشين و اجوازهم سارحين على النت
 
يا تتعبى شوية و ترجعيه ليكى
 
تتعبى ازاى؟
 
انك تعملى واحدة على النت و تراسليه و تشاغليه و تجيبى رجله
 
انتى عارفاه كويس و عارفة مخارجه و مداخله و نقط ضعفه .. هيبقى سهل انك تتفوقى على اى واحدة تانية
 
و شجعيه انه يحكى و انه يشتكى من مراته – اللى هى انتى برده
 
و افهمى هو بيدور على ايه برة
 
اتعرفى على الجانب الخفى من شخصية جوزك … الجانب الالكترونى فى العالم الافتراضى
 
الموضوع مش سهل و هتتعبى
 
هتسمعى نقدك بودانك
هتسمعى كلام حب من جوزك لواحدة غيرك حتى لو هى انتى برده
ممكن تكتشفى حاجات فى ميوله و احتياجاته الجنسية تكون صادمة بالنسبة لك
هتصعب عليكى نفسك
 
لكن اوعى تفقدى اعصابك لو انتى فعلا عايزة ترجعيه
 
لازم شخصيك اللى على النت تتغلب على كل بنات النت علشان فى الاخر جوزك يفضل بتاعك و بتاع ظلك لوحدكم
 
مع الوقت انتى نفسك اتغيرى .. ادمجى شخصية النت الخيالية مع شخصية الزوجة الواقعية
لحد ما يلاقى فيكى كل اللى هو محتاجه من شخصيتك بتاعة النت
 
 
الموضوع صعب لكن لو انتى عايزاة لازم تتعبى

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”