مروة ازيك… يارب تكوني بخير. سؤالي عن موضوع سي السيد
أصلي ملاحظة ان الزمن دة رجع تاني عن تجربة شخصية وعن تجارب تانية كتييييييير حوالية! ان الولد يقول للبنت ترجع بميعاد ويرفض لبس معين وأفعال معينة وشغل لأ وكدة… ويقول اته بدافع الحب.
ليه يا مروة الناس بتدخل على بعض وتبدأ تغير فبعض! والحل ايه مع الانسان سي السيد!!
شكرا لوقتك
——————————————
سى السيد صناعة حريمى
ما اللى ربته ست فهمته ان دا عادى
و اللى ربته ست شافها بتتقبل دا من أبوه
و اللى ربته ست فضلت تنفخ فيه لحد ما فرقع فى وشنا
دلوقتى بقى .. اللى هتقبله و تستحمله و تنفذ رغباته برده ست .. ست عايزة تتجوز و خلاص .. ست مستعدة تتحمل تعديه على حقوقها … ست مستعدة تضحك على نفسها و تقول هيتغير بعد الجواز .. ست مش فاهمة يعنى ايه حب متوازن و علاقة سوية .. ست فاهمة ان الخضوع و قلة القيمة هتضمن لها جوازة سعيدة
انا شخصيا أحيي سى السيد و جبروته
طول ما فى ست بتربيه و ست بتقبله يبقى له حق يبيع و يشترى و يتحكم زى ما هو عايز
انتى بقى يا لوزة هتعملى ايه؟
