fbpx
مونتيسوري مصر- تقدمها مروة رخا

التوقعات المرئية فى الحياة الزوجية

ازيك يا مروة اخبارك ايه
فى موضوع شاغلنى و تاعبنى جدا من ساعة ما اتخطبت من 6 شهور و قبلها تقريبا شهر تعارف
انا الحمد لله شكلى كويس معقول محجبة فشكلى فى الحجاب عادى ممكن من غير حجاب اكون جميلة جدا و ملفتة

لكن من ساعة ما اتخطبت و عرفت طريقة تفكير خطيبى و انه زى اى شاب بيتمنى بنت بمواصفات حلوة فى كل حاجة شعرها بشرتها جسمها ده حقه و انا ما قلتش حاجة بس هو من النوع اللى بيدقق زيادة جدا و بيقارن مع الممثلات و نجمات الجمال و ينسى ان ديه ممكن تكون عاملة ايه فى نفسها و حاطة ايه و ان كل البنات عندها مشاكل و محدش مية مية متظبط من غير ما يعمل حاجة
انا حاسة انى محطوطة فى اختبار اكبر منى اوى و خايفة ما الفشل
انا حبيته فعلا و نفسى اسعده و هو بيحب فيا كل حاجة بس قلقان من المواصفات اللى كان بيتمناها انها فيا ولا لاءة
معلش انا عشان اوضحلك هاضطر اطول شوية

انا شوية انفى كبير و فيه انحناء فى فترة التعارف كلمنى عن عملية تجميل و انا قلتله اقبلنى كما انا او اتركنى لان المسالة ديه صعب جدا انى اعملها اولا من مبدا دينى عشان لا اغير خلقة الله و خصوصا انى و لله الحمد فعلا شكلى حلو على بعضه يعنى ناس كتير بتقولى انى شبه غادة عبد الرازق قبل عملية التجميل اه طبعا هى بقت اجمل لكن انا مش عاوزة اعمل تجميل المهم هو اعتذر و قال انه قابلنى و حاببنى

ديه حاجة فى الاول

و على فكرة انا قابلته بشعرى مرة فى البيت عندنا عشان من حقه يشوفنى و يعرف شكلى ازاى على بعضه هو شايف بنات هنا و هناك لكن يتفاجئ بمراته بعد كدة ازاى اكيد هيستغرب الشكل ان ماكنش عارفه لان فعلا الحجاب بيدارى و يغير الشكل

لكن مشكلتى بقا الكبيرة اوى و تاعبانى اوى و بفكر كتير افسخ الخطوبة هو بيحلم زى اى واحد ببنت شعرها ناعم طويل انا شعرى قصير و مش ناعم هو طبعا شافه معمول مش بطبيعته لكن انا صريحة معاه عشان مصلحتى انى اكون صريحة بقوله ان شعرى مش ناعم
بيحلم بواحدة بشرتها حلوة و بيتكلم فى كدة كتير و يعلق على الممثلات ديه بشرتها كويسة و ديه لا هو طعا شايف وشى و بشرته لكن ما خفى كان اعظم انا بشرتى فيها مشاكل كتيرة و خطوط بيضا انا بحاول اعمل اللى اقدر عليه و ربنا يعيننى ليزر او اى حاجة لكن مهما عملت مش هبقى واحدة تانية
انا خايفة جدا لانى يهمنى سعادته و هيكون قهر و ذل ليا انى احس انه مش مبسوط بيا و عينه مش مليانة اسيبه بكرامتى احسن رغم حبى له و هتكون برضه صدمة كبيرة ليا لكن بايدى اعمل ايه
شعرى بشرتى ترهل شوية الحمد لله فى حاجات حلوة كتير جدا لكن هو بجد بجد طبعه صعب و بيركز اوى و بيتكلم فى كدة انا صريحة معاه و هو قالى بصراحة انا عاوزك انتى يكون فيكى اللى اتمناه
بجد يا استاذة مروة انا محتارة

انا رغم انى بنت يبدو عليا انى هادية و بتعامل مع الناس فى حدود لكن معاه مش كدة بنتكلم فى اى حاجة حتى الجنس بحب اننا نقرب لبعض فيه بس بالكلام بس مفيش اى تطبيق الحمد لله

لكن معرفش ليه هو بعد كل ده بيقولى انا برضه حاسس انك مؤدبة كانه مش مصدق ان الكلام اللى بنقوله مع بعض عن علاقتنا بعد الجواز هيكون بجد حاسس انى بقوله كدة بس مش هاعمل كدة

احنا بقالنا فترة مخطوبين ليه هو لسة متردد من ناحيتى فى النواحى ديه رغم الى بعمله هو بيحبنى و متمسك بيا فى صفات كتير مهمة الحمد لله لكن متردد و قلقان من النواحى اللى قلتلك عليها سواء التعامل بعد الجواز و تقبلى لطلباته المعينة رغم انى فعلا سعيدة بيه كدة و بقوله الكلام ده اقصد طلباته و احلامه فى العلاقة الخاصة
و قلقان كمان من انه مايلاقيش الشكل اللى بيحلم بيه فيا انا صريحة بس اعمل ايه اكتر من كدة و لا اسيبه و خلاص و اريح دماغى و اتعب قلبى

احب اعرف رايك
و سورى انى طولت ميرسى يا مرمر

—————————————–

 

مشمشة
 
أنا عايزاكى تخلى خطيبك يقرا ردى عليكى
 
——————-
 
شوفى بقى
 
خطيبك اللى هيبقى جوزك هيتصرف ازاى فى المواقف الآتية و اعذرينى فى التفاصيل
 
عملتى حلاوة و بعدها باسبوع ابتدى الشعر ينبت على خفيف و بعدها باسبوعين ابتدى الشعر يطول بس مش كفاية انه يتشال تانى .. يعنى هو لازم يستحملك بشعر على الاقل اسبوعين .. هيعمل ايه؟ هيحسسك بايه؟
 
عملتى شعرك عند الكوافير النهاردة و كنتى قمر و تانى يوم ابتدى يزيت و تالت يوم ابتدت ريحته تطلع … هتغسليه و تبقى فلة؟ و لا هتسيبيه ملزق علشان يبقى شكله ناعم؟ و لا هتعملى شعرك عند الكوافير مرتين فى الاسبوع؟
 
حامل … دايخة و بترجعى و مش طايقة نفسك و شكلك عدى عليكى قطر .. هيعمل ايه؟
حامل و ابتدى وزنك يزيد .. هيعمل ايه؟
ولدتى و جسمك اتغير .. هيعمل ايه؟
ولدتى و مش لاحقة تروحى للكوافير و ساعات بتتأخرى فى عمايل الحلاوة .. هيعمل ايه؟
 
و انتى بتطبخى اتدلقت مياة سخنة على ايدك .. و بعد العلاج الحرق ساب آثار … هيعمل ايه؟
 
و امثلة كتير و مواقف اكتر و اكتر هيعمل فيها ايه؟
 
النقطة التانية اللى عايزها اقولها لك ان انتى من حقك كإنسانة انك تتجوزى واحد حاسة معاه بالأمان .. مش هيسيبك لو شكلك اتغير بفعل الزمن و عوامل التعرية
 
النقطة التالتة انتى من حقك كإنسانة انك تحسى انك اجمل واحدة فى عين جوزك حتى لو الناس كلها شايفاكى تقرفى
 
النقطة الرابعة لو خطيبك فضل كدة انتى عمرك ما هتحسى بالسعادة كزوجة و لا كأم
 
النقطة الخامسة فى مصنع عرايس صينى بتتنفخ ممكن خطيبك يشترى من عندهم عروسة تنفعه
 
النقطة السادسة خطيبك مش كامل الأوصاف … يعنى بيتنعكش و بتطلع له ريحة و كرش و لغد و لو هتعامليه بالمثل فانتى من حقك تطالبيه انه يكون شبه مهند فى كل وقت و مكان
 
موضوع بقى انك مؤدبة و انه خايف لا البطيخة تطلع قرعة
طبعا حقه
بس انتى كمان من حقك تقلقى لا هو يكون بق على الفاضى و لا نفسه قصير و لا – على رأى أحمد حلمى فى السلم و التعبان – كورته مفسية
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”