الصداقة على النت بين الرجالة و الستات

ازيك يا مروه
حقيقي انتي نموذج يفرح اوي وياريت كل الناس يتعلمو منك
مش هطول عليكي لكن انا باختصار عندي مشكله
انا متجوز وخلف وبحب مراتي جدا

واعرف واحده بئالي 3 سنين بس اصدقاء مش اكتر من كده واصدقاء فيس بوك بس يعني عمري ما قابلتها مجرد كلام في التليفون والمسنجر وعرفتها وانا متجوز وهي عارفه كده وانا بصراحه بعتبرها صديقه ليا لكن في فتره معينه كنت بحكيلها عن بعض المشاكل اللي كانت بتواجهني مع مراتي بصفتها صديقتي وكنت ساعتها في لحظه ضعف مني وانا بحكيلها لدرجه اني اتعلقت بيها بس انا سيطرت على نفسي ومقلتلهاش لحد ما هي جت قالتلي بصراحه انها بتحبني جدا ومش عارفه تعمل ايه وبصراحه هي صحت احساسي ناحيتها من تاني لدرجه اني قلتلها اني كمان بحبها وتعاملنا مع بعض زي اي اتنين بيحبو بعض وبصراحه انا عشان بحب مراتي اوي عملت وقفه مع نفسي وانا مقتنع ان اللي انا فيه مع البنت ده غلط وعشان كده قررت اني اقطع اي وسيله اتصال بيني وبين البنت دي وده تاعبني نفسيا مش عشان حاجه غير انها صعبانه عليا لكن كحب وكده انا مقتنع اني حبيتها في لحظه ضعف

عارف انك ممكن تقوليلي فين السؤال
انا نفسي مش عارف فين السؤال انا كنت عايز اخد راييك اعمل ايه مع النت دي مع العلم اني لما كنت بتكلم معاها قلتلها وبكل صراحه ومخبتش عليها اني عمري ما هفكر اني اتجوز على مراتي وهي كانت موافقه لكن انا اللي قررت اني اعمل ستوب مع نفسي عشان عارف وقتنع ان علاقتي بيها غلط
اعمل ايه؟؟؟

———————————————————-

شوف يا مشمش

انت واحد محترم

واحد غيرك كان أخدها حلوانة فى سلوانة و عاش حياته لكن انت عندك ضمير و مبادئ

احنا بقى هنعتمد على الضمير و المبادئ دول فى حل مشكلتك

أول حاجة انت عارف ان انا متفتحة و متحررة كمان و مش ضد الصداقة بين الرجالة و الستات

لكن فى خطوط حمرا لو الواحد عداها بيدخل فى مرحلة الخطر

الفضفضة
هى دى اللى بتقرب الناس من بعض و بتشيل الحواجز و بتخلى المشاعر تتولد

يعنى انت ممكن يبقى لك صديقات على النت لكن الكلام يكون فى مواضيع عامة

اللحظة اللى تدخل فيها فى الكلام الشخصى هى اللحظة اللى بتغامر بيها بكل حاجة

و بعدين فى صمام أمان تانى لو خايف تضعف

ما تعملش حاجة تتضايق لو عرفت ان مراتك عملتها .. و دا على فكرة قمة العدل بعيد عن المجتمع الذكورى و الغباء الحيثى

يعنى لو انت هتضايق ان يكون لها أصدقاء شات على النت .. يبقى انت كمان ما تعملش كدة

لو هتضايق لو لها أصدقاء و بتدلعهم و بيدلعوها .. يبقى انت كمان ما تعملش كدة

لو هتضايق انها بتحكى لهم عن حياتكم .. يبقى انت كمان ما تعملش كدة

لو هتضايق انها بتشتكى لراجل تانى منك .. يبقى انت كمان ما تشتكيش لست تانية منها

لو هتضايق لو الموضوع اتطور و بقى فى تليفونات ما بينهم .. يبقى انت كمان ما توصلش الموضوع للتليفون

و بصراحة لو حاسس ان اللى انا بقوله دا صعب التنفيذ يبقى يقطع النت و النتيت و اللى بينتتوه 
🙂

استثمر الوقت و المشاعر دى فى انك تقرب من مراتك و بنتك
🙂