ما تستغربش من رسالتى و لا من كنيتك … أنا فعلا حاسة انك مخطوف و مش عارف تهرب من اللى خاطفينك … حاسة انك وقعت فى الأسر و مش عارف تتفاوض على هروبك
ابنى المصدوع
"المصدوع" كلمة ابتكرها أبويا الدكتور رخا لما يكون الواد من دول قاعد على الأكل و مش طايق يبص له و عمال يقلبه يمين و شمال فى الطبق يمكن يخلص لوحده من غير ما يضطر ياكله.
المصدوع بتبقى عينه مطفيه و كأنه هيغلبه النعاس هروبا من الأكل و عضلات وشه كلها بتتهدل كأنها هتقع على الترابيزة من كتر الرفض المكتوم.
المصدوع بيكوم الأكل فى بقه … شوية يعمل كورة فى الخد اليمين و شوية يعمل كورة فى الخد الشمال … و الأكل مش بيتبلع!
ابنى المصدوع أنت أكلت فوق طاقتك و فاض بيك و امبارح رجعت علينا من كتر القرف.
بابا الدكتور رخا برده كانت له أغنية شهيرة للطفل المصدوع و هو قاعد على الترابيزة – ممنوع عليه انه يقوم – كانت بتقول " يا مخمر عاليمين … يا مخمر عالشمال" و يفضل يعيد و يزيد فيها لحد ما المصدوع يطفح و يقوم.
الثوار امبارح كانوا بيغنوا لك "يا مخمر عاليمين .. يا مخمر عالشمال" يمكن تقوم من على الترابيزة و تنزل الميدان!
كدة؟
كدة تقول كلام يجيب لك الكلام؟
دا انت دكتور و مهندس و شريف … ازاى تقرا علينا المسخرة دى؟ كلامك كان كله تسويف و ترحيل و تزويق … كلام عايم لا محدد بفعل و لا بتاريخ
ليه تقعد على الترابيزة و تطلع فى التليفزيون و أنت مصدوع؟
ليه تخمر عاليمين و تخمر عالشمال؟
عزيزى الدكتور عصام شرف … اتصرف قبل ما "البرطيعة" ريحيتها تطلع!
You must be logged in to post a comment.