fbpx
مونتيسوري مصر- تقدمها مروة رخا

مافيش فايدة #Jan25 #Egypt #SCAF #Politics #AnimalFarm

 

 

مافيش فايدة فى أى حاجة و لا فى أى حد!

أنا مش مكتئبة و لا حتى متضايقة … بالعكس … أنا مبسوطة جدا و عايش مرحلة من أجمل مراحل حياتى كأم لآدم 

و مش متشائمة و لا لابسة نضارة سودا .. اللى يعرفونى شخصيا عارفين انى مبتهجة مبهجة مبهججة!

 

الموضوع ببساطة أن القطر عدى عليا رايح جاى – على رأى عمتى – و تقدروا تقولوا كدة انى شفت كتير و فاض بيا من النفس البشرية المسرطنة!

 

لما قامت الثورة – و لحد ما مبارك اتخلع – و أنا كنت فى حالة نشوة مراهقة من بتوع عم والت ديزنى … غصب عنى تخيلت النهايات السعيدة و التبات و النبات و الفارس أبو حصان أبيض اللى هينقذ البلد و السكان و هيتشال على الأكتاف … هلت عليا أطايف رومانسية طفولية و تخيلت ان الفساد هيغور و ان البلد دى هتقوم و تقف و تطير ولا أجدعها سوبر مان!

 

امتلئ قلبى بالتفاؤل و التسامح و الحب و الاطمئنان على مستقبل الواد بدل ما ألف بيه على بلاد العالم هربا به من مقبرة الابداع و الحرية!

 

و مرت الأيام و ليالى طويلة قدام تويتر و الفيسبوك … و فقت … رومانسية اللحظة تبخرت و اصطدمت بالواقع .. الفساد فى كل حتة يا بشر! الفساد مش فى مبارك و لا الكام وزير و رجل أعمال اللى فى السجن … الفساد فى الجينات … العطن و العفن و العطب فى الـ DNA

 

و رجعت أشوف البشر حيوانات … مرة كنت فى شغلى فى الفندق العريق المرموق و كان فى اجتماع ما بين المدير العام الخواجة و كل مديرين القطاعات و الأقسام و فجأة لقيت عم محمد الخباص و سحنته قلبت على فار و طقم الموافقون ابتدوا يمأمئوا زى الخرفان و كان فى واحد معارض فاهم و على حق سمعته بيزأر و بعدين أخد جنب و ابتدى يلعق جراحه بعد ما اتهش بعيد. وفى الحمار أبو عنين مطفية و فى نطاط الحيط اللى بيلعب على كل الجبهات.

 

الجشع و حب السلطة … حب السيطرة و التدخل فى شؤون الغير … امتلاك الحقيقة المطلقة … القهر عند المقدرة … الفهلوة و اللعب بالتلات ورقات … كل دى صفات الناس اللى صوتهم عالى فى الفندق و التليفزيون اللجنة و الحزب و الكومباوند و البلد و الدنيا كلها!

 

كل ما هيتجمع شوية ناس فى أى مكان هيعملوا كدة فى بعض … كل ما هيتجمع شوية ناس فى مكان واحد هتلاقى فيهم اللى عايز يعمل زعيم بالعافية و اللى عايز الناس تختاره زعيم بدل الزعيم و اللى منفسن على الزعيم الحالى و أى حد مرشح يبقى زعيم و اللى شايف الحق و ايده مش طايلة تنصره و اللى عايم على وش الفتة و طالع نازل مع الموجة و اللى مش فارقة معاه و اهى أيام و بنعيشها! هتلاقى اللى عمل الدين كنيته و لسانه و اللى عمل العلم و العقل لعبته و مواله و اللى عمل زى آسر ياسين فى رسائل البحر – بيتهته قدام الناس لكن بينه و بين نفسه مش بيتهته!

 

كلمة جانبية بينى و بين نفسى: يا ريتنى ما سكنت فى كومباوند .. يا ريتنى عملت زى أحمد مظهر!

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”