تقييم مبدئي للمدارس الأونلاين – ما بعد المونتيسوري

تقييم مبدئي للمدارس الأونلاين - ما بعد المونتيسوري

صباح النور والبنور
بعد الفيديو دا عن بدء رحلة ما بعد المونتيسوري في البحث عن مدرسة أونلاين معتمدة في أمريكا، هكتب لكم تقييم مبدئي لكل مدرسة من اللي بحثت عنهم/فيهم. اتفرجوا على الفيديو ضروري علشان ماحدش ياخد كلامي كشيء مسلم بيه.

قبل الدخول في التقييمات، هكتب المعايير واحتياجاتي:
1- معتمدة اعتماد واسع داخل الولايات المتحدة الأمريكية
2- أونلاين
3- للمرحلة الإعدادية الأميركية (Middle School)
4- فيديوهات شرح جذابة ويتم تحديثها
5- متاح التواصل مع معلمين كل مادة
6- سرعة الرد على التساؤلات
7- منهج واضح ومنظم وأونلاين بالكامل (مافيش حاجة هتتشحن على مصر أو منها)
8- تنوع وسائل قياس الفهم وعدم الاعتماد على المقالات المطولة سواء في الشرح أو المهام.
9- مرونة المنهج والأكاديمية
10- احترام التنوع والاختلاف
11- مدة الدراسة 12 شهر مش 9 أو 10
12- السعر والمنح

أول مدرسة/أكاديمية: Acellus Academy
كنت متحمسة جداً في الأول لحد ما قريت ريفيوز مهببة. بعتلهم أسأل عن مخاوفي واحتياجاتي – مافيش رد. طبعاً قررت حذفها من الخيارات المتاحة.

الثانية: The Keystone School
اتقفلت من الأسعار ومافيش نماذج للفيديوهات التعليمية. كل النماذج صور وكانها باوربوينت. الريفيوز كمان مش حلوة وكتير قالوا الشغل كتير والمناهج دسمة وكمان التصحيح مجحف والمدرسين مش بيردوا.

الثالثة: Clonlara
الفكرة حلوة جداً لكن مش مناسبة لآدم خالص. يعني لو أنا بختار مدرسة ليا أنا كنت اخترتها. الاعتماد على البحث فقط في سن آدم دلوقتي مش مناسب. الاعتماد على المشاريع والتساؤل والرحلات الميدانية كمان مش مناسب. أنا ما وصلتش للأسعار من كتر ما طريقتهم مش مناسبة لآدم.

الرابعة: Bridgeway
المثل بيقول عاوز تحيره خيره! أهو دا اللي حصل مع الأكاديمية دي. عندهم اختيارات كتييييييييييييييييييير وغالية ولما دعبست في الريفيوز اكتشفت أن الاختيارات الكتير دي متاهة للمشترك. تشتكي أن مافيش مدرسين يقولك ما أنت اللي اخترت. تشتكي أن الكتب ما وصلتش يقولك ما أنت اللي في بلد بعيد (وأنا أصلاً مش عاوزة حاجة تتشحن). كمان قريت أنهم معتمدين على فيديوهات منصات تانية وبس كدة.

الخامسة: Forest Trail Academy
بعتلهم طالبة نماذج من الدروس والفيديوهات. ماحدش رد أصلاً. أول القصيدة!

السادسة: American High School
الفيديوهات وحشة جداً ... ما شوفتش أي حاجة تانية عندهم.

السابعة: Pearson Online Academy
التدريس معتمد على قراءة كتييييييييييييييييير وملفات كتيييييييييييييييير ولما المدرسين بيعلموا لايف بيكون العدد فوق ال40 وأحياناً فوق 50!

الثامنة: Calvert Academy
من الأول وأنا مش متحمسة. كالفرت معروف أنه منهج أكاديمي أوي لكن بعد كل الفشل اللي فوق دا قلت نشوفهم. في الأول كان كله تمام وتواصلت معهم على الشات وفهمت أن التسجيل بيكون على التليفون وفي زي اختبار تحديد مستوى في الأول. بعتلهم إيميل بأسئلة زيادة وبلخص فيه كلامنا اللي فات وطالبة نماذج من الدروس والفيديوهات. مافيش رد.
كمان قريت الشروط والسياسيات بتاعتهم لقيت أن من حقهم يقفلوا ويغيروا ويعدلوا ويعملوا أي حاجة براحتهم من غير الرجوع لينا. طبعاً سألت علن الموضوع دا في الإيميل اللي ما حدش رد عليه.
لما قريت الريفيوز اتفاجأت أن كلها عن منهج تابع لهم للتعليم المنزلي وأن مافش كلام عن الأكاديمية دي وأن كالفرت اتباع من كام سنة.

فاضل مين على قائمتي؟
K12
Oak Meadow
Excel High School
Sterling Academy
Connections Academy
Odysseyware Academy
Imagine Edgenuity
Ignitia Virtual Academy
Mizzou Academy
ومازال البحث مستمراً ...