بس يا سيدى و قلت لها سجلي له و افضحيه

Date posted: June 29, 2010


 
 
 
هاى يا مروه انا عارفه انى بتقل عليكى وبدوشك بس انا بثق فى رايك وبقتنع بكلامك عشان كده لما بتقابلنى مشكله بحب اخد رايك فيها
فاتمنى لو وقتك يسمح تقرى رسالتى وتقوليلى رايك
انا بشتغل
medical representative
فى شركة ادويه
 
احنا شغلنا طبعا دعايا فى مجال الادويه بنزور دكاتره ونسوق لدوا الشركه وشغلنا بيتحسب بالارقام اللى بيحققها الدوا ده فى السوق طبعا ممكن تكونى عارفه طبيعة الشغلانه وعندك فكره عنها
 
المشكله بقه يا مروه هيا مديرى انسان واطى جدا فمنتهى قلة الادب بيعاكس وبيزود فى الكلام مش معايا ببس مع كل بنات التيم منتهى السفاله واحيانا يطلب نخرج فى الويك اند على سبيل الهزار وطبعا طبيعة الشغل تخليه ممكن يحب ينزل معايا دوبل فيزيت وساعتها بكره اليوم ده لانه بيقعد كل شويه يخرم من اى كلام ويحكى عن وساخته ومغامراته ولما راح البلد الفلانيه الستات عاملين ايه ولما سهر فى الحته الفلانيه حصل ايه
 
ده غير معاكساته وقلة ادبه معايا على الاخر مبقتش قادره استحمال الكلام بالاسلوب ده
الفكره هوا بيعمل كده مع كل البنات فى التيم بتاعنا وللاسف محدش فيهم عايز يتكلم او نجمع بعض ونشتكى كل واحده خايفه على وظيفتها والمرتب ومعندهاش استعداد تخسره وبينى وبينك لاقيت نفسى لو عملت ثورجيه ولميت البنات عشان نشتكيه اولا مش هيسمعو كلامى ثانيا الكلام هيوصله هيوصله وساعتها هيقلب عليا ويلبسلى اى حاجه ويمشينى
 
طبعا انا بحاول اسكو ومديلوش فرصه يتكلم معايا كلام سافل او يعاكس بس مش قادره اسكو زى مانا عاوزه لانى خايفه يقلب عليا يا مروى وساعتها هيمشينى من الشركه باى طريقه او على الاقل هيقفش عليا جامد فى الشغل ويتلككلى والعيشه تبقه طييييين….. المشكله مش فى انى امشى المشكله انى لما اجى اشتغل فى شركه تانيه بياخدو feedback عنى من الشركه القديمه ولو عرفو انهم مشونى هتبقه نقطه مش فى صالحى ابدا
ولو انا ساعتها قولت ايه السبب اللى مشونى عشانه ببقه بسوأ سمعتى فى المكان الجديد اللى انا رايحاه …وصدقينى فى شغلتنا دى هوا يقدر يتلككلى على اى حاجه طبعا مش بن يوم وليله لكن ممكن يرتبلى حاجه ويمشينى ولحد ما يمشينى صباح ومسى الغتاته والقفش
 
انا مش عارفه يا مروه اعمل ايه فكرت اجيب نمرة بيته واكلم مراته بس من غير ما اقول شخصيتى الحقيقيه بس مش عارفه نتيجة الموضوع ده هتكون ايه
لو عندك حاجه تقوليهالى ياريت تفيدينى لانى خلااااااااااص مش قادره وهفتح دماغ السافل ده قريب
 
——————————
 
شوفى يا ستى
 
فى صنف من البشر يخاف ما يختشيش
 
و انا بصراحة الصنف دا بيعمل لى حساسية
 
و عشان كدة نصيحتى هنكون متطرفة نوعا ما
 
انا عايزاكى تسجلي له
 
ممكن تسجلى بالموبايل او ممكن تسجلى بجهاز تسجيل صغير من اللى بيتباعوا فى راديو شاك
 
افتحيه و سيبيه شغال
 
و بعد ما يخلص حكاياته المقرفة اقفليه
 
و انقلى التسجيل على الكومبيوتر و ابعتى له الملف فى ايميل
 
ساعتها بقى هيتلم و يسكت و هدديه انه لو حاول يأذيكى فى الشغل أو لو حاول يرمى بلاه على اى واحدة من زميلاتك التسجيل دا هينتشر على الفيسبوك و على المدونات و هيوصل لمراته و للشركة الأم و للعالم كله و مستقبله هيضيع
 
و هو متحرش و المتحرش جبان و بيستقوى على الضحية اللى هتخاف منه و هتسكت
 
اجمدى كدة و خليه عبرة
Bookmark and Share