بتخونه مع صاحبه و هو بيخونها مع مرات صاحبه

Date posted: May 4, 2010


 
 
 
عزيزتي مروة… مش هاطول عاليكي.. بس ولاد الحلال دلوني عاليكي و من ساعتها و انا متبعاكي … الله يعينك يا صديقتي…

 

باختصار … انا زوجة -27 سنة- حياتي اصبحت باردة جدا بعد زواج 4 سنوات… عايشة لوحدي.. المسؤلية و كل حاجة لوحدي البيت و البيبي … و انتي عارفة الباقي
بدور علي الحنان علي الامان علي الاقل كلمة حلوة تساعدني اني اكمل… و لاقيت الشخص الي يساعدني.. الي حس بيا.. يبقي صديق زوجي… يمكن انا مش بعرف اتكلم و اعبر كويس بس هو بيقول كل كلمة جوايا من غير منطق…

 

لحد دلوقتي كلامنا جميل , محترم, بيساعدني اوي و يقويني… بس لو عدي يومين ماتكلمناش بيوحشني… و لما بشوفة بحس اني عايزة اجر عالية و اترمي في حضنة… انا مش بحبة.. بس محتجالة..!!!

 

مش دي المشكلة.. المشكلة ان جوزي معجب بمراته… اه و بيتكلموا … و بيمسح الرقم من موبيله زي مانا بعمل … بس عارفة… انا مش زعلانة.. مش غايرانة… يمكن ده عشان برود العلاقة بيني و بين جوزي… يمكن مالينا من بعض و محتاجين نغير… يمكن عايزاه يبعدها عن صحبه عشان يكون لي لوحدي…
مش عارفة … تعبانة .. محتارة…

 

بس مش عايزة اكون خاينة

————————————-

أنا قريت رسالتك كذا مرة و كل ما اجى أرد أمسح الرد
 
الأول كنت هرد بلسان الصح و الغلط و المثاليات و بعدين لقيت انى مش هضيف ليكى حاجة … ما انتى عارفة الصح و الغلط فمسحت الرد
 
و بعدين كنت هرد بلسان الدين و وصلت لنفس النتيجة السابقة
 
و بعدين سألت نفسى: هى مشمشة بعتت لى ليه؟
 
لقيت ان فى 3 اجابات
 
 يا بتفضفضى … و أدينى سمعت
 
يا عايزانى أواوفقك و لو ضمنيا … و اهو جوزك مهملك و بيخون صاحبه مع مراته زى ما صاحبه بيخونه معاكى و انتى بتخونيه مع صاحبه زى ما هو بيخونك مع مرات صاحبه .. و اتساوت الروس
 
و فى الحالة دى رأيى مش هيقدم و لا هيأخر لأنك هتستمرى فى العلاقة دى لحد ما تاكل بعضها – زى النار كدة
 
يا عايزة تختارى بين جوزك و صاحب جوزك … علشان ما تبقيش خاينة زى ما كتبتى
 
و فى الحالة دى لازم تختارى بأسرع وقت ممكن
 
لو اخترتى جوزك .. يبقى علاقتكم الأسرية تتقطع تماما بالعائلة التانية و انتى و جوزك (مع بعض) تفتحوا صفحة نضيفة و تحطوا ايديكم فى ايدين بعض و تقتلوا الملل و البرود اللى دخل علاقتكم
 
لو اخترتى صاحبه … يبقى تطلبى الطلاق بغض النظر عن هتتجوزى صاحبه و لا لأ
 
لأن حتى لو صاحبه اختفى من الصورة هيبقى فيه غيره و غيره لانك بتدورى على احتياجاتك برة
 
و جوزك واضح ان هو كمان مش مبسوط معاكى و بيدور على الدفئ فى مكان تانى
 
علاقتك بجوزك هتستمر او هتنتهى بقرار مشترك ما بينكم
 
لازم تتكلموا
 
Bookmark and Share