اتجوزيه يا لوزة قبل ما تعنسى

Date posted: February 11, 2010


مروة

ازيك …..وحشتيني أوي أوي بجد

المهم يا منقذتي….انا حالتي الأيام دي سيئة جداً جداً…. فوق ما أي حد ممكن يتصور…تعبانة أوي و محتارة و حزينة و مش قادرة أشوف اي ضوء في مستقبلي.

انا سني بيكبر و السنين بتجري بسرعة شديدة و خايفة أخد اللقب ( عانس)

من 5 شهور كان نفسي أحب و اتخطب و اتجوز و يكون عندي أطفال و أعيش سعيدة حتي لو في منغصات…هي دي الحياة حلوة و مرة….

المهم اني بقالي فترة …..حاسة نفسي مش قادرة أحس بأي حاجة من حواليا….حاسة اني فقدت القدرة علي اني أحب…..معقولة بسبب اني خرجت من جرح لجرح تاني و تالت اكون فقدت القدرة اني احب او احس بحد……انا تعبانة اوووووووي

فاكرة الشاب اللي كنت حاكيتلك عليه و انه اتقدم و كان بيقولي انتي اكبر مني و عايزة تخسي و الكلام السخيف دة…..كانت أمنية حياتي اننا نتجوز و ياخدني في حضنه…عارفه لما تبقي محتاجة انك تحسي بالحب و الاحتواء في نفس الوقت….هو ده اللي انا محتاجة….بس بعد الصدمات مش قادرة أحس اي حاجة

المشكلة المرة دي: واحد كان متقدم لي من 4 سنين في نفس الوقت اللي اتقدم لي خطيبي الأولاني و انا رفضته بذوق و شياكة…..الأستاذ كرر طلبه تاني و بيقول: “” انا بحبك و ما قدرتش في الفترة دي أحب حد تاني او أحس بحد تاني وحاخليكي أسعد واحدة في الدنيا وبحبك يا أجمل حاجة في عمري و انا بشوفك كل يوم بقلبي ووووووووووووووووووووووووووووو”

مشكلتي في الأتي:

1.انا مش قادرة احس بأي حاجة من اللي قالها

2. هو ولد محترم و مجتهد لكن من مستوي اجتماعي و مادي أقل بكتير

3. و الأهم اني مش قادرة اتخيل نفسي معاه( أكيد فاهمه قصدي)

I cannot imagine myself kissing him or sleeping with him.

4. انا أعرفه من فتره لكن عارفه احساس الكيميا انه ممكن يشدني مش موجود أصلاً

**** يا تري أوافق عشان القطر ميفوتنيش…….و أوافق عشان

I have needs that urge me to be satisfied

**** و لا أرفض عشان ما دمرش نفسي

**** يا تري لو استنيت ممكن يجي حاجة ترضيني و لا حارجع أقول يا ريتني

__________________________

أنا مش هقولك الكلام بتاع تطيب الخاطر و التصبير و كدة
الوحدة فعلا وحشة و صعبة و انتى ليكى احتياجات و دا حقك
فخلاص .. وافقى على العريس بدل ما تعنسى
و أهلا بيكى فى دنيا جديدة … باب مقفول عليكى مع راجل حاسة انه اقل منك ماديا و اجتماعيا … راجل كل كلامه مش بيمس اى حاجة فيكى … راجل نايم جنبك كل يوم … راجل مطلوب منك تضحكى فى وشه و تهتمى بيه و بطلباته … راجل بعد شوية هيبقى ابو ولادك … ولادك اللى هيكبروا يلاقوا امهم على طول مكشرة و مش راضية و مش طايقة ابوهم و لا طايقاهم
و ابوهم دا طبعا مش هيفضل تحت رجليكى على طول … ماهو بتاع ايه بتعامليه معاملة العبيد؟ هو مش من نفسه يتحب و يتحضن هو كمان؟ مش من نفسه يحس ان مراته بتحترمه و فخورة بيه؟ تفتكرى هيبقى رد فعله ايه لما يقرف من لوية بوزك و من عينيكى المطفية؟
هيحب على النت؟ هيتجوز عليكى؟ هينتقم منك علشان وافقى عليه فى يوم اغبر اتقدملك فيه؟
وافقى يا لوزة قبل ما تعنسى
Bookmark and Share