لو الناس سألوك على سن عروستك .. تقول ايه لو هى اكبر منك؟

Date posted: November 3, 2009


 
 
 
انا بنت عندى 27 سنة واخدت الحمد لله كروسات كمبيتر كتير واخر دبلومة كنت بعملها كان معايا واحد زميلى كنا بنتعامل مع بعض عادى جدا وغالبا معظم شغلنا كان مع بعض لحد ما فى فترة فى نهاية الكورس ( على فكرة الكورس دى كان مدته تقربيا احد عشر  شهر ) لقيت زميلى مضايق وكلنا الجروب كله لاحظ كدى كنت بتكلم معاه عادى وقاله مالك  فيه حاجة فى البيت مثلا مش يرضى يقول كان يقولى حاجة مضايقنى وهتخلص كمان شهرين كدى ولا حاجة المهم بعد كدى باسبوع لقيته بيقولى تحبى تعرفى ايه اللى مضايقنى لقيته قالى
 تقدرنى تتنازلنى عن ال 3 سنين الفرق بينا وقالى مش عاوز رد دوقتى
اكيد حضرتك عرفتى ايه المشكلة
المهم لما قالى كدى انا سالته امال ايه اللى هينتهى كمان شهرين
قالى كنت بفكر فى موضوع الارتباط وهل هوا ينفع ولا لا عشان فرق السن وكمان كنت فاكر ان ارتباطى بيكى دى عشان احنا مع بعض على طول فى مكان واحد فترة كبيرة ( احنا كنا فى الكورس من 9 صباحا لحد الساعه 3 وايام  المشروع كان احيانا بتوصل لحد 10 بليل )
الصراحة يا استاذة مروة انا فى الاول كنت رافضة او مش مستوعبة الموضوع لانى عمرى ما فكرت ارتبط بحد اصغر منى فرديت عليه وقولته مش ينفع ودى فعلا يمكن عشان احنا مع بعض فترة كبيرة
خلصنا الكورس وكنا بنتكلم نت احيانا بس مش كتير كان بيكلمنى فى الموضوع دى دايما وبيقولى انا والله مش بحاول اقنعك او اضغط عليكى انا بس عاوز اطمنك انى هبقى كويس معاكى ومش تخافى منى
بعد الكورس ربنا وفقنا بمنحة كنا كل الجروب  مقدمين فيها  والقدر شاء انى اكون انا وهوا من دون الجروب كله فى مركز واحد مدة المنحة دى تقريبا 6 شهور
فى الفترة دى لقيته بيقولى انا قولت لماما عليكى ومش اقنعت فى الاول بس انا اقنعتها وقولتها الرسول عليه الصلاة والسلام كان اصغر من السيدة خديجة ودى مش عيب ولا حرام
بصراحة انا لما حسيت انه متمسك بيا بدات افكر فى الموضوع وخاصه انه له معزة لانه محترم ومؤدب حتى المستر كان مسميه فى الكورس الجنتل مان
بس اللى مخوفنى اوى كلام الناس
خايفة منه لا يجى فى يوم من الايام يعايرنى بسنى او يسبنى ويدور على حد اصغر منه او مش يقدر يتحمل مسئوليتى ممكن حضرتك تقولى انه بقاله سنه او اكتر معايا يعنى عرفاه
هرد على حضرتك انه من حيث الاخلاق والادب والاحترام الحمد لله موجودين انما تحمل المسئوليه مش جربته ولا اعرف
 
على فكرة انا سالته مرة
لو حد سالك على سنى هتتكسف تقول قالى مش عارف ودى خوفنى اكتر
 
 
على فكرة فى البيت عيلتى عرفاه كويس من كلامى عليه بس كنت بتكلم عليه قبل ما يقولى على موضوع الارتابط دى انما بعد كدى كلامى عنه قل ممكن حضرتك تقولى مش قولتى لماما ليه
عشان هوا مش جاهز خالص لا عنده شقه ولا شغل كويس او ثابت وانا خايفة كمان من رد الفعل بصراحة فسيباه لحد لما يجى يتقدم رسمى
 
انا حكيت لحضرتك الموضوع من الاول خااااااااااااااااااااااالص عشان ارتاح وتقولىل اعمل ايه انا تعبانه جدا ونفسى اريح عقلى شويه من التفكير
 

 

——————— 

 
 
انا مش هعلق خالص على موضوع جاهز و مش جاهز علشان انتى ادرى بظروفك و عيلتك و ممكن تقبلى ايه و ترفضى ايه
 
لكن انا هعلق على السن
 
اولا 3 سنين دا كلام فاضى
ثانيا ماحدش بيمش و سنه مكتوب على وشه
ثالثا الناس اللى هتسأل عن سن العروسة دى ناس تافهة و قليلة الادب و مايتردش عليهم اصلا .. ناقص كمان يسالوه على لون ملابسك الداخلية
رابعا اهم حاجة ان مامته توافق عن اقتناع
خامسا لو انت حاسة انه راجل و ناضج و عارف هو بيعمل ايه يبقى على البركة
سادسا ما حدش بيتجوز و بيضمن ان جوزه مش هيتجوز عليه و لا هيخونه .. مش مغسل و ضامن جنة
سابعا الست بتكبر قبل الراجل لما بتهمل فى شكلها و جسمها و ترفض تتدلع على جوزها و تدلعه علشان قال ايه – عيب
 فى حاجات تانية اهم بكتير من السن … زى الاحلام المشتركة و الاهداف و الحوار و الاحترام و التفاهم و الطباع
 
ابقى اسمعى الحلقات دى معاه و اتناقشوا فيها و انت تعرفى هو مناسب و لا لأ
 
 
Bookmark and Share