جوزى على علاقة مع واحدة تانية

Date posted: July 19, 2009


 

 

مش عارفه ابتدى من فين بس انا اتجوزت زميلى فى الشغل بعد مواجة صعبة مع اهلى لانة كان لسة فى بداية حياتة وبقالنا دلوقت 10 سنوات وعندى ولدين من سنتين ابتديت احس انه اتغير وابتدى يبعد عنى ويخرج كتير المهم انى اكتشفت انه على علاقه مع واحدة تانى وواجهتة انكر فى الاول وبعدين اقر اقال انه غلطة وانتهت ولكنه كذاب وحياتى تحولت الى جحيم على طول بيتخانق وبيدور على اى غلطة علشان يتخانق عليها واتغير مع اهلة وبقى شخص تانى وانا مش عارفة اعمل معاة اية زهقنى فى كل حاجة الاولاد طبعا حسين بان ابوهم متغير ومبقاش يهتم بيهم زى زمان اهلى كل شوية يقولولى اصبرى علشان الاولاد واهلة كمان بس انا تعبت ابخاف من نفسى لحسن اموتة او اموت نفسى او اخرج ومرجعش تانىهو كذاب على طول وانا عارفة انه بيعرف البنت دى مش قادرة اوصفلك اد اية احساس بشع انك تعيش مع حد كداب ومخادع بالشكل دة

___________________________________________

 
يا ربى … مواضيع الخيانة دى بشعة
 
اختياراتك محدودة
 
يا تطنشى و تقبلى … مش عارفة ازاى .. بس دا اللى اهلك طالبينه منك
يا تتطلقى .. بس قبل ما تتطلقى لازم تفكرى
 
انت قد الطلاق؟
قد مسؤولية الولاد؟
هل هتكونى سعيدة؟
هل هتطلعى احاسيسك السلبية فى الولاد؟
هل هتقدرى تكونى ام و اب فى نفس الوقت؟
 
و شوية أسئلة كمان
هل دفعتيه للخيانة؟
هل اهملتيه؟
هل لك يد فى حالك النهاردة؟
هل سلمتيه لها على طبق من فضة؟
هل اهملت نفسك كامراة؟
هل اهملتيه كرجل؟
 
اه و سؤال اخير … لو انا سالته انت خنت مراتك ليه هيقول لى ايه؟
 
يمكن لو جاوبت على كل الاسئلة دى تقدرى تحددى انت هتعملى ايه
Bookmark and Share