انا سمرا و عمرى ما هرتبط علشان كدة

Date posted: July 18, 2009


 

 

انا بنت داخلة على ال30 و مش عارفة ارتبط علشان انا مش حلوة
انا ملامحي مش وحشة انا بحس انها حلوة بس سمراء
لما بيتقرب مني حد بقول بكره اهلو يقلولو لاء دي سمرا او هو يشوف بنات احلي فا يسبني انا مش سمرا افريقي بس سمرا
وفي حد انا اعرفو وقالي تعالي نتجوز انا قلتلو لاء اصل انا مش حلوة قلي طيب مش يمكن احبك
انا شيفاه مش اسمر زي وانا سمرا فا اكيد مش هعجبو
المهم انو بعد الطلب ده ورفضي مبعدش عني وقلي هنفضل اصحاب
وفعلا فضلنا اصحاب
برغم اني بتمناه ليا

__________________________

 

اسمحى لى اصارحك بالحقيقة المرة و اسمحى لى اقسو عليكى و اسمحى لى ابقى قليلة الذوق اخر حاجة

انت عيبك مش انك سمراء … انت عيبك انك غبية .. انا اسفة .. انا فعلا اسفة … انت بجد علتك فى مخك مش فى لون بشرتك

انت مابتفتحيش تليفزيون؟ ما بتشوفيش عارضات الازياء السود .. مش بس سمر . لأ سود .. و زى القمر

و المذيعات الامريكيات السمروات؟

و البرازيليات؟
و غيرهن … طيب ما بتشوفيش البنات البيض الشقر و هما بيحاولوا محاولات مستميتة علشان يسمروا .. اشى بالشمس و ايشى بالمكياج و ايشى بصالونات التسمير؟

تعرفى ان البنت السمرا مش بيبان عليها السن
و ان جسمها بيبان مشدود اكتر من البنت البيضا
و بتكون اقوى جسديا

يا ترى لو كان عندك اعاقة جسدية كنتى عملتى ايه؟
و يا ترى لو خلفتى بنت سمرا هتعملى فيها ايه؟ و هتربيها على الثقة بنفسها ازاى؟
لو ما عندكيش رد يبقى بلاش تفكرى فى موضوع الجواز اصلا بدل ما تخلفى بنت معقدة
و تجيلى كمان كام سنة تشتكى لى من مامتها اللى بتعايرها بلون بشرتها

 

Bookmark and Share