مروة رخا لمجلة احنا – أوف

Date posted: April 1, 2010


 

أوف!!!! 

 
و لولا الملامة كنت استبدلتها بتلات حروف تانية احتجاجا على الأسئلة اللى بتركبنى العصبى دى
 
السؤال الأول: انتى مسلمة؟
 
أولا و أنت مالك؟
ثانيا باين من اسمى
ثالثا سؤالك كدة شكله استنكارى استفزازى زى أسئلة المذيعات اياهم! ناقص تكفرنى وش كدة .. عينى عينك! يا باى
 
السؤال التانى: احنا مرجعيتنا ايه؟ مش ديننا؟
 
أولا يعنى ايه مرجعية؟ ايه الكلمة المجعلصة دى؟ ما كل واحد حر يرجع للى يرجع له!ه 
ثانيا بقى و دا الأهم … الـ "نا" دى راجعة على مين؟ لو عليا يبقى انظر اجابة السؤال الأول! و لو على الناس يبقى انت مالك بيهم
ثالثا الـ "نا" دى بتعبر عن الـ 80 مليون؟ مسلمين و مسيحيين و بهائيين و لا دينيين و ملحدين و مش عارفين؟ 
فعلا؟!!ه 
ايه النصاحة دى! و لا تكونش راجعة على المسلمين بس؟ الشيعة و السنة و السلف و الوسط و المنافقين و الممثلين و المتدبسين؟!!ه
 
السؤال التالت: انتى مش محجبة ليه .. و لا انتى مش مقتنعة ان الحجاب فرض؟
 
سؤال ثقيل من حد حشرى .. و من تدخل فيما لا يعنيه سمع ما لا يرضيه
سؤال فيه جر شكل و اللى بيجر شكل القطة بتخربش ايده و تشرح وشه
سؤال ما يستاهلش يترد عليه لانه يندرج تحت بند المهاترات
 
السؤال الرابع: انتى دراستك ايه علشان تبقى خبيرة فى العلاقات العاطفية؟
 
يا مواطن …. ياللى حافظ مش فاهم … خبيرة مشتقة من الخبرة و الخبرة نتاج الخبرات و التجارب الحياتية مش من الكتب 
و لو مش عاجبك الكلام اتناقش و لو مش مقتنع غير القناة … احنا فى بلد ديمقراطى
 
السؤال الخامس: انتى مش متجوزة .. يبقى ازاى بتحلى مشاكل الناس العاطفية؟
 
طبعا دا تلقيح كلام … المعنى اللى فى بطن الشاعر بيقول انى فاشلة فى علاقاتى و مش عارفة اتجوز يبقى بأى وش باتكلم فى العلاقات العاطفية!ه
كلام خنيق من عيل سيس هيكون موضوع مقال شهر مايو!ه 
ليه ما تقولش انى نجحت نجاح باهر فى تفادى اكتر من 300 لغم فى حقل الغام مالوش خريطة؟ لا و ايه … عملت كدة خريطة كروكى و من كرم اخلاقى بـ اديها للناس!ه
 
السؤال السادس: انتى ليه بتطلبى فلوس من البرامج اللى انتى بتطلعى فيها؟ مش عيب؟
 
خلاص حقك عليا! بعد كدة هاعمل مكتب و استقبل فيه الناس و ادفعهم 100 جنيه فى المرة … و الحسابة بتحسب! و هاطلع فى التليفزيون و اعمل دعاية للمكتب و استرزق من مشاكلكم!!ه
 
السؤال السابع: (من البنات فقط) انتى ليه بتحبى ولاد اصغر منك … بكتير؟
 
علشان اقدر!ه
 
السؤال الثامن: (من الولاد فقط) انتى حبيتى قبل كدة؟
 
طبعا لأ!!!!!ه
(يا عبيط)
 
السؤال التاسع: انتى ليه ليكى أصحاب ملحدين أو لا دينيين؟
 
و انا مالى!!! هو انا ربنا؟ هو انا باكتب حسناتهم و سيئاتهم … فعلا انا مالى!!!ه
يعنى لو انا عايشة فى موزمبيق كل ما هتعرف على حد هسأله عن معتقداته قبل ما اعتبره صديق؟ ايه المنطق الغريب دا!!ه
 
السؤال العاشر: انتى ليه ليكى اصحاب مثليين جنسيا؟
 
انا هرد عليكم بمقدمة أنا كتبتها لكتاب
"فى بلد الولاد"
 
سبحان الله يا أخي على الناس إللي بتفرض رأيها على غيرها
 
هو ربنا إمتى اتنازل عن صفة الألوهية وعملها "دايفيرت" للبشر ؟
إمتى قال لكل واحد إنه من حقه يحاكم إنسان تاني باسم التدين والقيم والمبادىء ؟
إمتى و فين قال يا بني آدم من حقك إنك تحيي وتميت ؟
إمتى قال إنك لما تقابل واحد في الشارع تفكر في عاداته الخاصة وميوله الجنسية ؟
النهاردة إنت بتشاور على "المثلي" وبتتهمه بالشذوذ …. لكن اسمح لي أقولك إن لو في حد شاذ هنا فهو ليس المثلي … الشذوذ بعينه هو إنك أول لما تقابل حد تفكر في عاداته الجنسية وتصرفاته في السرير !
أخي المواطن دع الخلق للخالق … وخليك في حالك

 

Do not judge a man or a woman before you have walked a mile in his or her shoes
 
أوووووووووووووووف بجد
Bookmark and Share