كلام مهم عن فطام الطفل الرضيع

كلام مهم عن فطام الطفل الرضيع

مقال الفطام ... بس طولوا بالكم معايا 

قبل ما أتكلم عن الفطام عاوزة أحط شوية نقط على الحروف.
* في حاجة إسمها تربية إيجابية .. Positive Discipline
دي أنا ماعرفش حاجة عنها .. لا درستها ولا تخصصت فيها ... لكن في استراتيجيات التوجيه في المونتيسوري درست كلام مشابه لها.

* في حاجة تانية اسمها التربية بالترابط ... Attachment Parenting
دي رائدها د. ويليام سيرز اللي أنا مديونة له هو ومراته وولاده بأفضال كتير لأنهم لحد النهاردة بيشاركوا خبراتهم ودراساتهم وعلمهم.

التربية بالترابط لها 7 أسس - Attachment Parenting 7 Bs:

أولاً الترابط منذ الميلاد واحنا طالعين ... الهدف أن الأم تحفظ طفلها وتعبيرات وشه والأصوات اللي بيعملها و حاجات غيرها كتير.

ثانياً الرضاعة الطبيعية من غير أي لخبطة بالتيتينة ولا بيبيرونة ولا لبن صناعي.

ثالثاً حمل الطفل في شيالة قماش طول ما هو محتاج يتشال عشان يحس بالأمان والحضن ويشوف الدنيا وتتوسع مداركه.

رابعاً نوم الطفل والأم جنب بعض - مش لازم نفس السرير لكن في سرير تم ضمه لسرير الأم علشان تقدر تستجيب لاحتياجات الرضاعة من غير ما تقلق نومها.

خامساً الاستجابة لنداءات الطفل وبكائه وفهم أنه بيحاول يتواصل مش بيتلاعب بيكي.

سادساً تجنب مدربين النوم والرضاعة وغيرهم من اللي بيفسدوا العلاقة الفطرية بين الأم وطفلها.

سابعاً الموازنة بين احتياجات الأم واحتياجات الطفل وطلب الدعم.

هل بقى الكلام دا ناخده حرفياً كدة من غير فهم للمغزى والهدف؟
لأ!
يعني لو الأم بعد الولادة تعبت أو جالها اكتئاب أو رفضت طفلها ولا لو الأم كارهة الرضاعة الطبيعية ولا لو السرير صغير وفعلاً خطر أو أو أو أو ...
طيب الحل إيه؟

الحل أنه بدل ما نسأل إيه المطلوب من الأم ... نسأل هو إحنا عاوزين نحسس الطفل بإيه من خلال كل نقطة من السبعة دول؟ ولما نعرف الإجابة ندور على بدائل.

مثلاً اللي مش قادرة ترضع طبيعي ترضع صناعي بس والطفل في حضنها وعلى صدرها وبتبص له وتضحكله وعينيهم في عنين بعض زيها زي اللي بترضع طبيعي.
بدل السراير الضيقة، مراتب على الأرض ... لو الشيالة مش مريحة ندور على تصميم مختلف ... الأب ولا أي مصدر دعم يشيل الطفل ... المهم في الأخر أن الطفل يحصل على الحب والاهتمام والحضن اللي هو محتاجه.

طيب الطفل محتاج إيه؟
يا ست الكل لازم تقري أو تدرسي كل مرحلة عمرية من حيث نمو الطفل العقلي والحركي والاجتماعي والعاطفي واللغوي ومهارات الاستقلال والاعتماد على النفس.
ليه مهم نفهم الكلام دا ونتعلمه؟ علشان نعرف الطفل قادر على إيه وغير قادر على إيه وتوقعاتنا منه تكون إيه وإزاي.

طيب واحدة خلفت ومش قادرة .. معلش ... بتحصل ... الحل يا الأب يشيل يا أم بديلة لحد ما الأم تتعافى من أي حاجة هي بتمر بيها وتقدر تراعي طفلها.

نرجع بقى لموضوع الفطام .. اللي هو أصل الكلام في البوست دا.

الأطفال مش زي بعض ... من ناحية في طفل من يوم ما يتولد وهو عياطه قليل وراضي بالنوم على ضهره والبص في السقف ومش بيزن وبيسلي نفسه وبينام فترات طويلة سواء بالنهار أو بالليل وهكذا ... طفل سلس .. طفل يفتح النفس على الخلفة 

من ناحية تانية في طفل مش طايق روحه ... عياط وصريخ وتشنيج وشيل ونوم زفت ورضاعة على طول واحتياجات كتير كتير كتير وحاجة تكره الواحد في عيشته 
وبين النوعين دول في درجات كتير من السلاسلة أو الاحتياجات العالية.
مدرسة التربية بالترابط قالت إيه بقى؟

قالت أن الطفل السلس مع أم مبدعة وسريعة الاستجابة زي الفل.
الطفل السلس مع أم شايلة إيدها وماشية ورا كلام المسلسلات هتكون علاقتهم كويسة مؤقتاً لكن لما الطفل يكبر هيزعلها.
الطفل اللي احتياجاته عالية مع أم قايدة صوابعها العشرة شمع ثنائي رائع والأم دي هتشوف حب وعوض عمرها ما تخيلته (أنا الأم دي وآدم الطفل دا)
الطفل اللي احتياجاته عالية مع أم منفضة أو عنيفة أو مصرة تروضه ثنائي بشع والطفل دا هيزعلها ويجيب ناس تزعلها والمستقبل أسود.

نرجع للفطام هههههههههههه

في طفل ممكن يكون مستعد للفطام بعمر سنة أو سنة ونص أو سنتين ... ممكن الطفل دا يفطم نفسه ويبطل رضاعة كدة مع نفسه وممكن يتقبل فكرة الفطام بشوية محايلات ولطافة من الأم.
لكن في طفل تاني احتياجاته مختلفة ومتطلباته أعلى وكل أم عارفة هي مخلفة إيه ... كل أم عارفة حتى لو أنكرت!

آدم ابني طفل حساس ومختلف وكرضيع كان صعب صعب صعب .... وكان مرتبط جداً بالرضاعة ... جعان .. يرضع .. نيمان .. يرضع ... زهقان .. يرضع ... موجوع .. يرضع ... خايف .. يرضع ... بيعيط .. يرضع ... صاحي من النوم .. يرضع ... هينام .. يرضع ... قلق بالليل .. يرضع.

لما قرب على سنتين سألت عن الفطام وجالي هلع من اللي سمعته ... قررت أني لا هحط بن ولا مر ومش هسيبه مع حد وأمشي ولا هقفل الباب ولا هسيبه يعيط ... قررت أني مش هقدر أكسر قلبه ... الفكرة نفسها لحد النهاردة مؤلمة جداً بالنسبة لي. قررت هسيبه يفطم نفسه.

بعد قراري قريت أنه طبيعي جداً أن الطفل يفطم نفسه بين سنة ونص وأربع سنوات.

فعلاً سبته براحته وهو فطم نفسه قبل عيد ميلاده الثالث بكام يوم. قبلها بكام شهر كان بقى بيرضع مرة الصبح ومرة بالليل وبس. لما فطم نفسه .. في ليلة ويوم ... لا رضع بالليل ولا رضع الصبح.

لحد النهاردة هو فاكر ذكريات الرضاعة وفاكر مشاعر الحب والأمان ... الموضوع دا من نعم ربنا عليا وبحمد ربنا أني قدرت أديله حقه وأحترم احتياجاته.

لما اتكلمت معاه لما أصبح مستعد للاستقلال عن الرضاعة كان خوفه الوحيد هو فقد الحضن ... طمنته أن حضني مفتوح في أي وقت وجرب كذا مرة يجي في الحضن في أي وقت لحد ما اتطمن وقال باي باي للرضاعة.

بحكيلكم القصة دي ليه؟
علشان الأطفال مختلفين واحتياجاتهم مختلفة وشغلتنا هي أننا نبص لولادنا ونعرف احتياجاتهم ونديهم اللي هم محتاجينه.
الأمومة صعبة ومؤلمة ومرهقة ... مافيش متعة صافية من غير ألم أو مشقة ... لكن في لحظات حلوة كتير بتهون على الواحد وفي علامات في الطريق بتحسسنا أننا ماشيين صح.

أنا مش بكتب علشان أغير قناعات حد ... اللي مقتنعة بالجداول والتدريب والترويض كلامي مش هيغيرها.

أنا بكتب علشان اللي حاسة أنها لوحدها تتونس واللي الناس هارينها نقد وتبكيت تستقوى بيا واللي خايفة تطمن واللي شاكة شكها يتحول ليقين.

دا فيديو عن تدريب الطفل على النوم والرضاعة
ودا بوست عن خطوات تساعد الطفل على الحصول على نوم أفضل